മലപ്പുറം: സ്ഥാനാര്ഥി നിര്ണയവുമായി ബന്ധപ്പെട്ട് മുസ്ലിം ലീഗില് തുടരുന്ന തര്ക്കങ്ങള് പരിഹരിക്കാന് ഇന്നലെ പാര്ട്ടി സംസ്ഥാന അധ്യക്ഷന് ഹൈദരലി ശിബാബ്തങ്ങളുടെ പാണക്കാട്ടെ വസതിയില് ചേര്ന്ന സെക്രട്ടറിയേറ്റ് യോഗത്തില് തീരുമാനമൊന്നും ഉണ്ടായില്ല. സ്ഥാനാര്ഥിപ്പട്ടിക നാളെ പാര്ട്ടി സംസ്ഥാനപ്രസിഡന്റ് പ്രഖ്യാപിക്കുമെന്നറിയിച്ച് പി കെ കുഞ്ഞാലിക്കുട്ടി വാര്ത്താലേഖകരുടെ ചോദ്യങ്ങളില് നിന്ന് തന്ത്രപൂര്വം ഒഴിഞ്ഞുമാറി. 12 സീറ്റുകളെയെങ്കിലും ചൊല്ലി ലീഗിനുളളില് രൂക്ഷമായ തര്ക്കം തുടരുന്നതായാണ് സൂചന.
കേന്ദ്രമന്ത്രി ഇ അഹമ്മദ് ഒഴികെ പതിനാല് നേതാക്കള് യോഗത്തില് പങ്കെടുത്തു. സെക്രേട്ടറിയറ്റിലെ അംഗങ്ങളില് ഭൂരിപക്ഷവും അവനവന്റെ സീറ്റുറപ്പിക്കാന് വ്യഗ്രതകാട്ടിയതിനെത്തുടര്ന്ന് ഫലപ്രദമായ ചര്ച്ച നടന്നില്ല. മലപ്പുറം ജില്ലയിലെ കൊണ്ടോട്ടി, കോട്ടക്കല്, വള്ളിക്കുന്ന്, കാസര്കോട് ജില്ലയിലെ കാസര്കോട്, മഞ്ചേശ്വരം, തൃശൂര് ജില്ലയിലെ ഗുരുവായൂര്, പാലക്കാട് ജില്ലയിലെ മണ്ണാര്ക്കാട്, കോഴിക്കോട് ജില്ലയിലെ രണ്ട് മണ്ഡലങ്ങള് തുടങ്ങിയവയിലെ സ്ഥാനാര്ഥികളെ സംബന്ധിച്ചാണ് വടംവലി രൂക്ഷം. അതിനിടെ കുഞ്ഞാലിക്കുട്ടിയുടെ വിശ്വസ്തരെ വിജയം ഉറപ്പുള്ള സീറ്റില് മത്സരിപ്പിക്കുന്ന തരത്തിലാണ് ലീഗിന്റെ കരട് സ്ഥാനാര്ഥിപ്പട്ടിക തയ്യാറാക്കിയിരിക്കുന്നതെന്ന് വ്യക്തമായി. അബ്ദുറഹ്മാന് രണ്ടത്താണി, കെ എന് എ ഖാദര്, അബ്ദുറബ്ബ്, ഉബൈദുള്ള, എം ഉമ്മര്, യൂത്ത് ലീഗ് നേതാവ് എന് ഷംസുദ്ധീന് എന്നിവര്ക്ക് സീറ്റ് ഉറപ്പായിട്ടുണ്ട്. തിരൂരങ്ങാടിയിലെ സിറ്റിംഗ് എം എല് എ കുട്ടി അഹമ്മദ്കുട്ടി ഇപ്പോള് തയ്യാറാക്കിയ പട്ടികയിലില്ല. മൂന്നു തവണ മത്സരിച്ചവരെ മാറ്റിനിര്ത്തുക എന്ന വാദമാണ് കുട്ടി അഹമ്മദ് കുട്ടിക്കെതിരെ പ്രയോഗിച്ചിരിക്കുന്നത്. ആരോഗ്യപ്രശ്നങ്ങളും കുട്ടി അഹമ്മദ്കുട്ടിയെ ഒഴിവാക്കാന് കാരണമായി ചൂണ്ടിക്കാട്ടുന്നു. എന്നാല് കുഞ്ഞാലിക്കുട്ടിക്കെതിരെ ഉയര്ന്ന പുതിയ വിവാദങ്ങളില് വേണ്ടത്ര പിന്തുണ എം എല് എ എന്ന നിലയില് കുട്ടി അഹമ്മദ് കുട്ടിയുടെ ഭാഗത്തു നിന്ന് ഉണ്ടാവാത്തതാണ് പട്ടികയില് നിന്ന് പുറത്താവാന് കാരണം. എം കെ മുനീറുമായി അടുത്ത ബന്ധം പുലര്ത്തിയത് ഷാജിക്കെന്ന പോലെ കുട്ടി അഹമ്മദ്കുട്ടിക്കും വിനയായി. തന്നെ ഒഴിവാക്കിയതില് കുട്ടി അഹമ്മദ്കുട്ടി ലീഗ് നേതൃത്വത്തെ പ്രതിഷേധം അറിയിച്ചിട്ടുണ്ട്. തന്റെ നാടായ താനൂര് മണ്ഡലത്തിലെങ്കിലും സീറ്റ് കിട്ടുമെന്ന് അദ്ദേഹം പ്രതീക്ഷിച്ചെങ്കിലും ഒരിടത്തും പരിഗണിക്കേണ്ടെന്നാണ് കുഞ്ഞാലിക്കുട്ടിയുടെ നേതൃത്വത്തിലുള്ള സ്ഥാനാര്ഥിനിര്ണയ കമ്മറ്റി തീരുമാനിച്ചത്. തിരൂരങ്ങാടിയില് കുഞ്ഞാലിക്കുട്ടിയുടെ ബന്ധുവായ പി കെ അബ്ദുറബ്ബാണ് ലീഗ് സ്ഥാനാര്ഥി. താനൂരിലാകട്ടെ പാര്ട്ടി ജനറല് സെക്രട്ടറിയുടെ വലം കൈയ്യായ അബ്ദുറഹിമാന് രണ്ടത്താണിയും സീറ്റ് ഉറപ്പാക്കി കഴിഞ്ഞു. വള്ളിക്കുന്നില് കോഴിക്കോട്ട് നിന്ന് എം സി മായിന് ഹാജിയെ ഇറക്കുമതി ചെയ്യുന്നതിലും കോട്ടക്കലില് സമദാനിയെ മത്സരിപ്പിക്കുന്നതിലും അണികളില് കടുത്ത പ്രതിഷേധം അലയടിക്കുകയാണ്. രണ്ടിടങ്ങളിലും റിബലുകളായി മത്സരിക്കാന് പ്രാദേശിക നേതാക്കള് ഒരുങ്ങുന്നതായാണ് സൂചന. മുനീറിനും യൂത്ത് ലീഗ് സംസ്ഥാന പ്രസിഡണ്ട് ഷാജിക്കും ഇത്തവണ മലപ്പുറത്ത് സീറ്റുണ്ടാകില്ലെന്നും വ്യക്തമായി. മലപ്പുറത്തു നിന്ന് എം ഉമ്മറിനെ മങ്കടയിലേക്കും ഈ മണ്ഡലം തന്നെ വേണമെന്ന് വാശിപിടിച്ച മഞ്ഞളാംകുഴി അലിയെ പെരിന്തല്മണ്ണയിലേക്കും മാറ്റിയിട്ടുണ്ട്. കുഞ്ഞാലിക്കുട്ടി വേങ്ങരയില് മത്സരിക്കാനാണ് ഉദ്ദേശിക്കുന്നത്.
‘Uncategorized’ വിഭാഗത്തിന്റെ ശേഖരം
സ്ഥാനാര്ഥി നിര്ണയം: ലീഗില് തര്ക്കം തുടരുന്നു
Posted by ജനയുഗം വാര്ത്തകള് on മാര്ച്ച് 15, 2011
Posted in Uncategorized | Tagged: കുഞ്ഞാലിക്കുട്ടി, മുസ്ലിം ലീഗ, സമദാനി, ഹൈദരലി ശിബാബ്തങ്ങ | Leave a Comment »
ഉപഗ്രഹ റേഡിയോവിനൊരു ചരമഗീതം – അഷ്ടമൂര്ത്തി
Posted by ജനയുഗം വാര്ത്തകള് on മാര്ച്ച് 9, 2010
ഉപഗ്രഹ റേഡിയോവിനൊരു ചരമഗീതം
അഷ്ടമൂര്ത്തി
അശ്വത്ഥ് വളരെ സാവധാനത്തിലാണ് വാഹനമോടിച്ചിരുന്നത്. എയര്പോര്ട്ട് റോഡു വിട്ടപ്പോള് ഞങ്ങളുടെ വര്ത്തമാനം അടങ്ങി. വാഹനത്തില് മൗനം നിറഞ്ഞതറിഞ്ഞ് അശ്വത്ഥ് പതുക്കെ റേഡിയോ ഓണ് ചെയ്തു. ഏതൊക്കെയോ എഫ് എം ചാനലുകളിലൂടെ പരതിപ്പരതി അയാള് വിവിധ് ഭാരതിയില് എത്തി. കന്നഡപ്പാട്ടുകള് ഞങ്ങള്ക്കു രസിക്കില്ലെന്ന് അയാള്ക്കറിയാമായിരുന്നിരിക്കണം.
രാത്രി പത്തുമണിയായിരുന്നു. അനൗണ്സറുടെ കനത്ത ശബ്ദത്തില് ‘ഛായാഗീത്’ എന്ന് റേഡിയോവില് അറിയിപ്പുണ്ടായി. ”മേ നാ ഭൂലൂംഗാ” എന്ന പാട്ടാണ് ഒഴുകിവന്നത്. അതെന്നെ വര്ഷങ്ങള്ക്കു മുമ്പുള്ള ബോംബേ രാത്രികളിലേയ്ക്ക് കൂട്ടിക്കൊണ്ടുപോയി. തുടര്ന്ന് ”മേരാ ജീവന് കോരാ കാഗസ് കോരാ ഹീ രഹ് ഗയാ” എന്ന പാട്ടായിരുന്നു. അതോടെ ഗൃഹാതുരത്വത്തില്പ്പട്ട ഞാന് തളര്ന്നുപോയി. ആകാശവാണിക്കും വിവിധ് ഭാരതിക്കും ഒരു വ്യത്യാസവും വന്നിട്ടില്ലല്ലോ എന്ന് അല്പം സന്തോഷത്തോടെ ഞാന് ചിന്തിച്ചു. അനുനിമിഷം മാറിക്കൊണ്ടിരിക്കുന്ന ലോകത്തില് ചിലതെങ്കിലും മാറ്റം കൂടാതെ നില്ക്കുന്നുണ്ടല്ലോ. അത്രയും നല്ലത്.
റേഡിയോപ്പരിപാടികളും ദിനചര്യയും തമ്മില് ബന്ധമുണ്ട്. റേഡിയോ സുഖമുള്ള ഒരു അലാറം പോലെയാണ്. പശ്ചാത്തലത്തില് ഓരോ പാട്ടും ഓരോ പരസ്യവും നമുക്കുള്ള സൂചനകളാണ്. സെക്കന്റുകള്ക്കുവരെ സമയം പാലിക്കുന്ന ആകാശവാണിയേക്കുറിച്ചു മാത്രമാണ് ഇതു പറയാവുന്നത്. എന്റെ ബോംബേജീവിതത്തില് വിവിധ് ഭാരതിക്ക് നല്ല സ്ഥാനമുണ്ടായിരുന്നു. രാവിലെ 7.30നുള്ള ‘സംഗീത് സരിത’ തുടങ്ങുമ്പോഴാണ് ജോലിക്കിറങ്ങാറ്. രാത്രി ഏഴു മണിക്കുള്ള ‘ഫൗജി ഭായിയോ കാ ഫെര്മായിഷ്’ തുടങ്ങുമ്പോഴാണ് ജോലി കഴിഞ്ഞെത്തുക. രാത്രി 10 മണിക്കുള്ള ‘ഛായാഗീത്’ കഴിഞ്ഞിട്ടേ കിടക്കാറുള്ളൂ. ബാസു ഭട്ടാചാര്യയുടെ ‘അനുഭവ്’ എന്ന സിനിമയില് വിവിധ് ഭാരതിയിലെ പരിപാടികള് ബോംബേദിനചര്യയുമായി മനോഹരമായി ബന്ധപ്പെടുത്തിയിട്ടുണ്ട്.
ഏട്ടന്റെ വീട്ടിലെത്തിയപ്പോള് പതിനൊന്നു മണിയായി. ഏട്ടനും ഏട്ടത്തിയമ്മയും അപ്പോഴും ജോലിത്തിരക്കിലായിരുന്നു. ഇരിപ്പുമുറിയിലെ ടിവിയില് എന്തോ നടക്കുന്നുണ്ടെങ്കിലും രണ്ടുപേരും അതു കാണുന്നില്ല. ’ഛായാഗീതി’നിപ്പോഴും ഒരു മാറ്റവും വന്നിട്ടില്ല എന്ന് ഞാന് ഏട്ടനെ അറിയിച്ചു. ഏട്ടന് പക്ഷേ എന്റെ ഗൃഹാതുരത്വത്തില് പങ്കുചേരാനുള്ള മൂഡിലായിരുന്നില്ല.
ഏട്ടന്റെ രാത്രികള് വിവിധ് ഭാരതിയില്നിന്നൊക്കെ എത്രയോ കാതം നടന്നുകഴിഞ്ഞിരുന്നു. വിശാലമായ സ്വീകരണമുറിയുടെ അറ്റത്ത് എപ്പോഴും ടിവി എന്തെങ്കിലും വെളിപ്പെട്ടുകൊണ്ടിരിക്കും. രാത്രി വളരെ വൈകി ഉറങ്ങനൊരുങ്ങുമ്പോള് കിടപ്പുമുറിയില് ഏട്ടന് വേള്ഡ്സ്പെയ്സ് റേഡിയോ ഓണ് ചെയ്തു വെയ്ക്കും. ‘ഗന്ധര്വ്’ എന്ന ചാനലായിരുന്നു ഏട്ടന് പ്രിയങ്കരം. അതില് ഇരുപത്തിനാലു മണിക്കൂറും ഹിന്ദുസ്ഥാനി സംഗീതമായിരുന്നു. രാത്രി വല്ലപ്പോഴും ഉണരുമ്പോള് ഏതെങ്കിലും ഉസ്താദ് ഉറക്കമൊഴിച്ച് നമുക്കുവേണ്ടി പാടിക്കൊണ്ടിരിക്കും.
രണ്ടായിരാമാണ്ടിന്റെ തുടക്കത്തിലാണ് വേള്ഡ്സ്പെയ്സ് റേഡിയോവിനേപ്പറ്റി വാര്ത്തകള് വന്നു തുടങ്ങിയത്. ഇരുപത്തൊന്നാം നൂറ്റാണ്ടിന്റെ അത്ഭുതങ്ങളിലൊന്നായാണ് ഞാന് അതിനെ കണ്ടത്. ആദ്യമാദ്യമൊന്നും അതെന്താണെന്നുതന്നെ മനസ്സിലായിരുന്നില്ല എനിക്ക്. കേരളത്തില് കൊച്ചിയില് ചില റെസ്റ്റോറന്റുകളില് ഈ റേഡിയോ ഉണ്ട് എന്നു വാര്ത്ത വന്നിരുന്നു. ഉപഗ്രഹം വഴിയുള്ള പ്രക്ഷേപണമാണെന്ന് പിന്നീടാണ് മനസ്സിലാവുന്നത്. ഉപഗ്രഹത്തില്നിന്ന് ശബ്ദവീചികള് പിടിച്ചെടുക്കാന് നമ്മുടെ സാധാരണ റേഡിയോകള്ക്കാവില്ല. പ്രത്യേകതരം റേഡിയോ തന്നെ വേണം. കമ്പം മൂത്തപ്പോള് സുനിലിനോടു പറഞ്ഞ് ദുബായില്നിന്ന് യന്ത്രം വരുത്തി.
അനുഷ്ഠാനത്തിന്റെ പവിത്രതയോടെയാണ് പെട്ടി പൊളിച്ചത്. ഹിറ്റാച്ചിയുടെ മനോഹരമായ ഒരു റേഡിയോ. കോണിപ്പടി കയറിയെത്തുന്ന സ്ഥലത്ത് കിഴക്കോട്ട് അഭിമുഖമായി അതിന്റെ ഡിഷ് ഘടിപ്പിച്ചു. 30 ഡിഗ്രി ചെരിവില് വെച്ചാലേ നല്ല ഫലം കിട്ടൂ. മരങ്ങളുടെ തടസ്സം പാടില്ല. റേഡിയോവും സ്പീക്കറുകളും ഊണ്മുറിയിലാണ് സ്ഥാപിച്ചത്. കുറേക്കാലം ഊണിന് ഉപദംശമായിരുന്നു ഉപഗ്രഹറേഡിയോ.
റേഡിയോവില് പല തരത്തിലും ചാനലുകള് തിരഞ്ഞെടുക്കാം. ഭാഷ വഴി, ചാനലുകളുടെ സ്വഭാവം വഴി, രാജ്യങ്ങള് വഴി. നൂറ്റിയിരുപതോളം ചാനലുകള്. വാര്ത്തകള് വേണ്ടവര്ക്ക് അത്, സംഗീതം വേണ്ടവര്ക്ക് അത്. സംഗീതത്തില് റോക് വേണോ, പാശ്ചാത്യം വേണോ, ക്ലാസ്സിക്കല് വേണോ, ലളിതസംഗീതം വേണോ. സിഎന്എനും ബിബിസിയും ഒക്കെയുണ്ട്. ഡിജിറ്റല് പ്രക്ഷേപണത്തിന്റെ എല്ലാ ശബ്ദമേന്മയും. പുറമേ പരിപാടികള് പ്രോഗ്രാം ചെയ്തു വെയ്ക്കാനുള്ള സൗകര്യവുമുണ്ട്.
ഇന്ത്യയില്നിന്നു മാത്രം നാല്പത്തഞ്ചോളം ചാനലുകളുണ്ടായിരുന്നു. ഇടമുറിയാത്ത ഹിന്ദുസ്ഥാനി സംഗീതത്തിന് ‘ഗന്ധര്വ്’, കര്ണാടകസംഗീതത്തിന് ‘ശ്രുതി’, പഴയ ഹിന്ദിചലച്ചിത്രഗാനങ്ങള്ക്ക് ‘ഫരിഷ്ത’. ‘സ്പന്ദന’, ‘സ്പര്ശ’, ‘മാസ്ത്രോ’ തുടങ്ങി വേറെയും സംഗീതചാനലുകള്. കൂട്ടത്തില് മലയാളവുമുണ്ടായിരുന്നു. ഏഷ്യാനെറ്റിന്റെ ‘ആര് എം റേഡിയോ’. ആര് എം എന്നാല് റെജി മേനോന്.
”ലോകത്തെവിടെയിരുന്നാലും മലയാളം കേള്ക്കുമാറാകണം” എന്ന മുദ്രാവാക്യവുമായാണ് ആര് എം റേഡിയോ ഉടലെടുത്തത്. നല്ല പാട്ടുകള് ധാരാളം ഉണ്ടായിരുന്നു ആര് എം റേഡിയോവില്. പക്ഷേ ഒരാഴ്ച കേട്ടുകഴിഞ്ഞാല് എല്ലാം ആവര്ത്തനമാണെന്നു മനസ്സിലാവും. അറിയിപ്പുകളും പാട്ടിന്റെ വിശദീകരണങ്ങളുമടക്കം എല്ലാം റെക്കോഡ് ചെയ്തവ. ഒരു പാട്ടു കഴിഞ്ഞാല് അടുത്തത് ഏതെന്ന് മുന്കൂട്ടി അറിയാവുന്ന അവസ്ഥ.
തുടക്കത്തിലെ പോരായ്മകളാവും അതൊക്കെ എന്നാണ് വിചാരിച്ചത്. വൈകാതെത്തന്നെ വാര്ത്തകളും തുടങ്ങുന്നുണ്ട് എന്ന് അറിയിപ്പുണ്ടായിരുന്നു. ആര് എം റേഡിയോവില് പരസ്യം ചെയ്യാന് നിരന്തരം അഭ്യര്ഥനകളും ഉണ്ടായിരുന്നു. പരസ്യവരുമാനം കൂടുകയും ചാനല് നല്ല നിലയിലാവുകയും ചെയ്താല് പാട്ടുകളടക്കമുള്ള പരിപാടികള് കൂടുതല് വൈവിധ്യം കൈവരിക്കും എന്ന് പ്രതീക്ഷിച്ചു.
ഞങ്ങള് ഉപഗ്രഹറേഡിയോ വാങ്ങി മൂന്നു കൊല്ലം കഴിയുംമുമ്പേ അത് പ്രവര്ത്തനരഹിതമായി. ഏരിയലിന്റെ സ്ഥാനം മാറ്റിമാറ്റിനോക്കിയിട്ടും ഒന്നും കേള്ക്കാനാവുന്നില്ല. പിന്നെയാണ് അറിയുന്നത് എല്ലാം പേ-ചാനലുകളായി മാറിക്കഴിഞ്ഞ വിവരം. വര്ഷംതോറും 1,200 ഉറുപ്പിക വരിസംഖ്യ ഏര്പ്പെടുത്തിയിരിക്കുന്നു. അതോടെ ഞങ്ങളുടെ ഉപഗ്രഹറേഡിയോ ഊണ്മുറിയിലെ ഒരു മൂലയില് പൊടിപിടിച്ചുകിടന്നു.
അതേസമയം ഈ റേഡിയോ കേരളത്തില് കൂടുതല്ക്കൂടുതല് പ്രചാരത്തിലായിക്കൊണ്ടിരുന്നു. വലിയ ഓഫീസുകളിലും റെസ്റ്റോറന്റുകളിലും വിനോദവസതികളിലും ആശുപത്രികളിലും ഒക്കെ ചാനല് മ്യൂസിക് ആയി ഉപഗ്രഹറേഡിയോ കയറിപ്പറ്റി. ഒരു സമയത്ത് നാലര ലക്ഷം വരിക്കാര് ഇന്ത്യയില് മാത്രമായി വേള്ഡ്സ്പെയ്സ് റേഡിയോ കരസ്ഥമാക്കി. അതാവട്ടെ ലോകത്തിലെമ്പാടുമുള്ള വരിക്കാരുടെ 95 ശതമാനത്തോളം വരുന്നതുമായിരുന്നു! ആകെ 130 രാജ്യങ്ങളില് പന്തലിച്ചുനില്ക്കുന്നതായിരുന്നു വേള്ഡ്സ്പെയ്സ് എന്നറിയുമ്പോള് നമുക്ക് അത്ഭുതപ്പെടാതിരിക്കാനാവില്ല.
എന്നിട്ടും വേള്ഡ്സ്പെയ്സ് റേഡിയോ തകര്ച്ച നേരിടുകയായിരുന്നു. പ്രധാനകാരണം പരസ്യവരുമാനമില്ലാത്തതുതന്നെ. 2008 ഒക്ടോബറില് വേള്ഡ്സ്പെയ്സ് തങ്ങളെ പാപ്പരായി പ്രഖ്യാപിക്കണമെന്ന് അപേക്ഷിച്ചു. ഏറ്റവും പ്രചാരത്തിലുള്ള ഇന്ത്യയിലെ പ്രക്ഷേപണം 2009 ഡിസംബര് 31ന് നിര്ത്തുകയും ചെയ്തു.
സാങ്കേതികവിദ്യ കുതിച്ചുചാടുന്ന ഇക്കാലത്ത് ഒരുപകരണം എത്രകാലം ജീവിക്കും എന്ന് ആര്ക്കും പ്രവചിക്കാനാവില്ല. പേജര് എന്ന വസ്തുവിനേപ്പറ്റി ഇന്നത്തെ യുവതലമുറ കേട്ടിട്ടുതന്നെയുണ്ടാവില്ല. ഏറ്റവും ആയുസ്സുകുറഞ്ഞ ഉപകരണമായിരുന്നു അതെന്ന് വിലയിരുത്തപ്പെട്ടിട്ടുണ്ട്. അതിനോടു തൊട്ടുതാഴെയാവും ഒരുപക്ഷേ ഉപഗ്രഹറേഡിയോവിന്റെ സ്ഥാനമെന്നു തോന്നുന്നു.
എന്താണ് വേള്ഡ്സ്പെയ്സ് റേഡിയോവിന്റെ പരാജയത്തിന്റെ കാരണം? കുറഞ്ഞപക്ഷം ഇന്ത്യയില്?
ഇന്ത്യയിലെ സ്വകാര്യമേഖലയിലുള്ള പുതിയ പുതിയ എഫ് എം ചാനലുകള് ഒരു കാരണമാവാം. 2005 മുതല് 250ല്പ്പരം എഫ് എം നിലയങ്ങള്ക്കുള്ള അനുമതിയാണ് സര്ക്കാര് ഇന്ത്യയില് നല്കിയത്. മൊബൈല് ഫോണിലുള്ള ലഭ്യത അവര്ക്ക് കൂടുതല് അനുകൂലമായി. വാഹനങ്ങളിലുള്ള സ്വീകരണികളും അവര്ക്കു സഹായകമായി. വീട്ടിലിരിക്കാന് ആര്ക്കം സമയമില്ലല്ലോ. അതുകൊണ്ട് ഇപ്പോള് റേഡിയോ കേള്ക്കല് അധികവും യാത്രയ്ക്കിടയിലാണ്. ഉപഗ്രഹറേഡിയോവാകട്ടെ, സ്വീകരണമുറികള് വിട്ടു പുറത്തുകടന്നില്ല. സ്വീകരണമുറികളിലാവട്ടെ ശബ്ദവും രൂപവുമായി ടെലിവിഷന്തന്നെ പ്രജാപതിയായിത്തുടര്ന്നു.
എഫ് എം നിലയങ്ങള് റേഡിയോ ജോക്കികളുടെ കൊഞ്ചലും കൊച്ചുവര്ത്തമാനവും കൊണ്ട് ശബ്ദായമാനമാണ്. വളരെ ഗഹനമായ ചോദ്യങ്ങള് ചോദിച്ച് ഉത്തരം തേടും. (ഇന്ന് എന്താഴ്ചയാണ്? ഓപ്ഷന് എ-ഞായറാഴ്ച, ഓപ്ഷന് ബി-ബുധനാഴ്ച, ഓപ്ഷന് സി-വെള്ളിയാഴ്ച. എന്നിട്ടും ഉത്തരം തോന്നാത്തവര്ക്ക് ഒരു ലോഹത്തിന്റെ പേരാണ് എന്ന് ‘ക്ലൂ’വും കൊടുക്കും. വെള്ളിയാഴ്ച എന്നു പറഞ്ഞാല് ഒരു ടീഷര്ട്ട് സമ്മാനം.) ഉപഗ്രഹചാനലില് പാട്ടു കേട്ടാല് ടീഷര്ട്ട് കിട്ടില്ലെന്നതുപോട്ടെ, വരിസംഖ്യ എണ്ണിക്കൊടുക്കുകയും വേണമെന്നു വന്നു. കല്പ്പറ്റ നാരായണന് പറഞ്ഞതുപോലെ ഒരുരുളയുണ്ണാന് പോലും സൗജന്യം ആവശ്യപ്പെടുന്ന നമ്മളുണ്ടോ പണം കൊടുത്ത് പാട്ടുകേള്ക്കുന്നു!
ഐപോഡിന്റേയും എംപിത്രീ പ്ലെയറുകളുടേയും പ്രചാരവും ഉപഗ്രഹറേഡിയോവിനെ പ്രതികൂലമായി ബാധിച്ചിരിക്കാം. ഡിജിറ്റല് ക്വാളിറ്റി എന്നു പറയുന്നുണ്ടെങ്കിലും അത് ഇഷ്ടസമയത്ത് ഇഷ്ടസ്ഥലത്തുവെച്ചു കേള്ക്കാനുള്ള സൗകര്യം ഉണ്ടായിരുന്നില്ലല്ലോ ഉപഗ്രഹറേഡിയോവില്. ഐപോഡും എംപീത്രീ പ്ലെയറും ഭാരക്കുറവുകൊണ്ടും വിലക്കുറവുകൊണ്ടും ആളുകളുടെ കയ്യില് നിറയുകയും ചെയ്തു. നിരവധി ഓണ്ലൈന് റേഡിയോകള് പ്രചാരത്തിലായതും ഇക്കാലത്താണ്.
അവസാനമായി പ്രധാനമായ മറ്റൊരു കാരണവുമുണ്ട്. ഉപഗ്രഹറേഡിയോവിലെ പരിപാടികള് ഉന്നതനിലവാരമാണ് പുലര്ത്തിയിരുന്നത്. അതുകൊണ്ടുതന്നെ അവ ജനപ്രിയവുമായില്ല. ശാസ്ത്രീയസംഗീതത്തിന്റെ ധാരാളിത്തം സാധാരണ കേള്വിക്കാരെ അകറ്റിയിരിക്കാം. ഇതു നമുക്കുള്ളതല്ല എന്ന് അവര് ധരിച്ചിരിക്കാം.
ഞങ്ങളുടെ ഊണു കഴിഞ്ഞപ്പോള് ഏട്ടനും ഏട്ടത്തിയമ്മയും പണി നിര്ത്തി ഒപ്പം ചേര്ന്നു. വൈകുവോളം വര്ത്തമാനം പറഞ്ഞിരുന്നു. കൂട്ടത്തില് ഞങ്ങളിലാരുടെയോ കണ്ണുകള് ഒന്നടഞ്ഞപ്പോള് ”ഇനി ഉറങ്ങാം” എന്നു പറഞ്ഞ് ഏട്ടന് എഴുന്നേറ്റു.
ബംഗളൂരില് നല്ല തണുപ്പുണ്ടായിരുന്നു. ഏട്ടത്തിയമ്മ വലിയ കമ്പിളിപ്പുതപ്പുകള് എടുത്തുതന്നു. രാവിലെ എങ്ങോട്ടും പോവേണ്ടതില്ലാത്തതുകൊണ്ട് എത്ര നേരമെങ്കിലും മൂടിപ്പുതച്ചുറങ്ങാം. അതിമനോഹരമായ ഒരു ഫെബ്രുവരി രാത്രി.
സഫലമായ ഈ ബംഗളൂര്രാത്രിയില് ഗന്ധര്വ്വന്റെ കൂട്ട് ഉണ്ടാവില്ലല്ലോ എന്ന് അപ്പോഴാണ് ഞാന് ഓര്മ്മിച്ചത്. ഇന്നു രാത്രി ഇടയ്ക്ക് ഉണരുമ്പോള് ഉസ്താദുമാര് ഉറക്കമൊഴിച്ച് ഞങ്ങള്ക്കുവേണ്ടി പാടില്ലല്ലോ. കിടപ്പുമുറിയിലെ ഒരു മൂലയില് മൂടിപ്പുതച്ച് എപ്പോഴോ ഉറക്കമായ ഉപഗ്രഹറേഡിയോവിനെ ഞാന് സങ്കടത്തോടെ നോക്കി.
Posted in Uncategorized | Tagged: അഷ്ടമൂര്ത്തി | Leave a Comment »
വേരിലും കായ്ക്കുന്ന പഴമൊഴിച്ചക്ക – സി. രധാകൃഷ്ണന്
Posted by ജനയുഗം വാര്ത്തകള് on ജനുവരി 17, 2010
വേരിലും കായ്ക്കുന്ന പഴമൊഴിച്ചക്ക – സി. രധാകൃഷ്ണന്
1
2
3
Posted in Uncategorized | Tagged: സി. രധാകൃഷ്ണന്, Janayugam, Janayugom | Leave a Comment »
അരുണയ്ക്കു മരണം വിധിച്ചാലും! – അഷ്ടമൂര്ത്തി
Posted by ജനയുഗം വാര്ത്തകള് on ജനുവരി 8, 2010
അരുണയ്ക്കു മരണം വിധിച്ചാലും! – അഷ്ടമൂര്ത്തി
1
<
2
3
Posted in വിചാരം, Uncategorized | Tagged: അഷ്ടമൂര്ത്തി, Janayugam, Janayugom | Leave a Comment »
കോർപ്പറേറ്റ് ചതിയുടെ പിന്നാമ്പുറങ്ങൾ
Posted by ജനയുഗം വാര്ത്തകള് on ജനുവരി 26, 2009
കോർപ്പറേറ്റ് ചതിയുടെ പിന്നാമ്പുറങ്ങൾ
പി. എ. വാസുദേവൻ
1
2
3
Posted in Uncategorized | Tagged: ജനയുഗം, Janayugam, Janayugom | 1 അഭിപ്രായം »
കയറ്റുമതി രംഗത്ത് പ്രതിസന്ധി മൂര്ച്ഛിക്കുന്നു
Posted by ജനയുഗം വാര്ത്തകള് on നവംബര് 18, 2008
കയറ്റുമതി രംഗത്ത് പ്രതിസന്ധി മൂര്ച്ഛിക്കുന്നു
1
2
3
Posted in Uncategorized | Leave a Comment »
മുഖം നോക്കാതെ – കാക്കനാടന്
Posted by ജനയുഗം വാര്ത്തകള് on നവംബര് 2, 2008
മുഖം നോക്കാതെ
കാക്കനാടന്
1
2
3
Posted in Uncategorized | Tagged: കാക്കനാടന്, ജനയുഗം, മുഖം | 1 അഭിപ്രായം »
ലോക പാര്പ്പിട ദിനവും ലക്ഷം വീടുകളും-ബിനോയ് വിശ്വം
Posted by ജനയുഗം വാര്ത്തകള് on ഒക്ടോബര് 9, 2008
ലോക പാര്പ്പിട ദിനവും ലക്ഷം വീടുകളും
ബിനോയ് വിശ്വം
1
2
3
Posted in Uncategorized | Tagged: പാര്പ്പിട ദിനവും, ബിനോയ് വിശ്വം | 2 അഭിപ്രായങ്ങള് »
ഒരു ഒപ്പിന് നല്കേണ്ട കനകവില
Posted by ജനയുഗം വാര്ത്തകള് on ഒക്ടോബര് 9, 2008
ഒരു ഒപ്പിന് നല്കേണ്ട കനകവില
ദിഗംബരന്
1
2
3
4
Posted in Uncategorized | Tagged: ആണവകരാര് | Leave a Comment »
മാധ്യമക്കാഴ്ച
Posted by ജനയുഗം വാര്ത്തകള് on സെപ്റ്റംബര് 22, 2008
മാധ്യമക്കാഴ്ച
Posted in Uncategorized | Leave a Comment »
