ജനയുഗം വാര്‍ത്തകള്‍

Archive for the ‘ലേഖനം’ Category

ചെന്നിത്തല ‘കളങ്കിതര്‍’ എന്നുച്ചരിക്കുമ്പോള്‍ ചാണ്ടിയുടെ ഹൃദയം പിടയുന്നതെന്തുകൊണ്ട്?

Posted by ജനയുഗം വാര്‍ത്തകള്‍ on മാര്‍ച്ച് 7, 2011

ദിഗംബരന്‍

തിരഞ്ഞെടുപ്പുനാളുകളില്‍ ഉണര്‍ന്നെഴുന്നേല്‍ക്കുന്ന രാഷ്ട്രീയ കക്ഷികള്‍ കോണ്‍ഗ്രസും ലീഗും കേരള കോണ്‍ഗ്രസും ജെ എസ് എസും ആദിയായവയുമാണ്. ഇക്കാര്യത്തില്‍ ആരും അവരെ കുറ്റപ്പെടുത്തുകയില്ല. കാരണം കസേര പോയാല്‍ ഉറങ്ങുകയും കസേര തരപ്പെടുത്താനുള്ള സമയമാകുമ്പോള്‍ മാത്രം ഉണരുകയും ചെയ്യുന്ന കക്ഷികളാണ് അവര്‍. കേന്ദ്രം കേരളത്തെ അവഗണിച്ചാലും ഭക്ഷ്യധാന്യം വെട്ടിക്കുറച്ചാലും റയില്‍ പദ്ധതികളൊന്നും കേരളത്തിനു അനുവദിച്ചില്ലെങ്കിലും അതിഗാഢ നിദ്രയില്‍ അമര്‍ന്നിരിക്കും കോണ്‍ഗ്രസ് നേതൃത്വത്തിലുള്ള യു ഡി എഫ്. പൂര്‍വകാല വാണിഭങ്ങളിലും അഴിമതി വ്യവഹാരങ്ങളിലും മുഴുകി സുഖനിദ്രയില്‍ കഴിഞ്ഞുകൂടുകയാണ് ശീലം. പക്ഷേ തിരഞ്ഞെടുപ്പ് അടുത്താല്‍ ഞെട്ടിയുണര്‍ന്ന് പിച്ചും പേയും പറയുന്ന മാതിരിയില്‍ ആരോപണങ്ങളും ആക്ഷേപങ്ങളും ഉന്നയിക്കും. അതെല്ലാം ബൂമറാംഗ് പോലെ തിരിച്ചെത്തി മാറില്‍പ്പതിക്കുമെന്ന് വൈകിയാണെങ്കിലും ഐക്യ ജനാധിപത്യമുന്നണിക്ക് തോന്നിത്തുടങ്ങിയിട്ടുണ്ട്. കണ്ടാലും കൊണ്ടാലും പഠിക്കാത്തവരായതുകൊണ്ട് അവര്‍ക്കത് പ്രശ്‌നമല്ല താനും.
സ്ഥാനാര്‍ഥികള്‍ക്ക് തെല്ലും ക്ഷാമമില്ലാത്ത മുന്നണിയാണ് യു ഡി എഫ്. കോണ്‍ഗ്രസ് പാര്‍ട്ടിയാണ് സ്ഥാനാര്‍ഥി സുലഭതയില്‍ ഏറ്റവും മുന്നില്‍. കെ എസ് യു ക്കാരും യൂത്ത് കോണ്‍ഗ്രസുകാരും ഹൈക്കമാന്‍ഡിന് മുന്നില്‍ ഹാജരാക്കിയ പട്ടിക മാത്രം പരിഗണിച്ചാല്‍ പോലും കോണ്‍ഗ്രസ് കേരളത്തില്‍ കൂടുതല്‍ നിയമസഭാ മണ്ഡലങ്ങള്‍ സൃഷ്ടിക്കേണ്ടിവരും. ആകെ 140 മണ്ഡലങ്ങളല്ലേയുള്ളൂ. കെ എസ് യുക്കാര്‍ക്കും യൂത്ത് കോണ്‍ഗ്രസുകാര്‍ക്കും അവര്‍ നല്‍കിയ പട്ടികയിലെ മൂന്നിലൊന്നു നല്‍കിയാല്‍ പോലും 140 മണ്ഡലങ്ങള്‍ മതിയാവാതെ വരും. മുഖ്യമന്ത്രി പദം കിനാവുകാണുന്നവരായ പാവം പാവം ഉമ്മന്‍ചാണ്ടിയും പാര്‍ട്ടി പറഞ്ഞാല്‍ മത്സരിക്കുമെന്ന് ഉച്ചൈസ്തരം ഘോഷിക്കുന്ന രമേശ് ചെന്നിത്തലയും കാത്തുകാത്തിരുന്നൊടുവില്‍ ദയാദാക്ഷ്യണ്യത്തോടെ, കൃപാകടാക്ഷത്തോടെ കോണ്‍ഗ്രസില്‍ എത്തിപ്പെട്ട കെ മുരളീധരനും മത്സരിച്ച് മതിവരാത്ത ആര്യാടന്‍ മുഹമ്മദും തിരുവഞ്ചൂര്‍ രാധാകൃഷ്ണനും എം എം ഹസനും ജി കാര്‍ത്തികേയനും കെ സി ജോസഫും ആദിയായവരും എന്തു ചെയ്യും എന്ന ആവലാതി കോണ്‍ഗ്രസ് കൂടാരത്തില്‍ നിന്ന് ഗദ്ഗദ സ്വരത്തില്‍ പുറത്തുവന്നുകൊണ്ടിരിക്കുന്നു.
അറുപത് പേരുടെ പട്ടികയുമായി യൂത്ത്‌കോണ്‍ഗ്രസുകാര്‍ ഡല്‍ഹിക്ക് പറന്നത് ചാണ്ടിയും ചെന്നിത്തലയും ആര്യാടനും കെ സി ജോസഫും തിരുവഞ്ചൂര്‍ രാധാകൃഷ്ണനുമൊക്കെ പല്ലുകടിച്ചമര്‍ത്തിയാണെങ്കിലും സഹിക്കും. പക്ഷേ വൈദ്യശാസ്ത്രം പരാജയപ്പെട്ടാല്‍ മാത്രമേ കോണ്‍ഗ്രസിലെ ചെറുപ്പക്കാര്‍ക്ക് സീറ്റു കിട്ടുകയുള്ളൂ എന്ന് കെ എസ് യു ക്കാര്‍ സങ്കടപ്പെടുകയും തങ്ങളുടെ ആധി പരസ്യപ്രമേയത്തിലൂടെ സമൂഹത്തെ അറിയിക്കുകയും ചെയ്തത് അവര്‍ക്ക് സഹിക്കാനാവുന്നതിനും അപ്പുറത്തായിപ്പോയി. ഈയുള്ളവന്‍മാര്‍ മരിച്ചാലേ പ്രതീക്ഷയ്ക്ക് വകയുള്ളൂ എന്ന്, രാഹുല്‍ഗാന്ധിയുടെ വാഗ്ദാനപ്പെരുമഴയുടെ കാലത്തുപോലും കെ എസ് യുക്കാര്‍ പരസ്യ പ്രസ്താവന നടത്തിയാല്‍ അത് ഹൃദയ ഭേദകമെന്നല്ലാതെ മറ്റെന്തു പറയാനാണ്, ചാണ്ടിമാര്‍ക്കും ചെന്നിത്തലമാര്‍ക്കും ആര്യാടന്‍മാര്‍ക്കും തിരുവഞ്ചൂര്‍മാര്‍ക്കും കഴിയുക. നിസ്വാര്‍ഥ രാജ്യസേവകരാണ് തങ്ങളെന്ന് യൂത്ത് കോണ്‍ഗ്രസുകാരും കെ എസ് യുക്കാരും തെളിയിക്കുന്നത് തിരഞ്ഞെടുപ്പ്കാലത്ത് സ്വന്തം പേരുള്‍പ്പെടുന്ന പട്ടിക നല്‍കിയാണ്.
കുത്തുങ്ങള്‍, കുട്ടികള്‍ ഇത്ര കഠിന പ്രയോഗങ്ങള്‍ നടത്തി വേട്ടയാടാന്‍ തുടങ്ങിയാല്‍ കുഞ്ഞൂഞ്ഞുമാര്‍ക്ക് എന്തു ചെയ്യാനാവും! കുഞ്ഞുങ്ങള്‍ വൈദ്യശാസ്ത്രം പരാജയപ്പെട്ടാലേ തങ്ങള്‍ക്ക് രക്ഷയുള്ളൂവെന്ന് നിലവിളിക്കുമ്പോഴാണ് ഹൈക്കമാന്‍ഡ് പറഞ്ഞാല്‍ മത്സരിക്കുവാന്‍ തയ്യാറാണെന്ന് രമേശ് ചെന്നിത്തല മാധ്യമപ്രവര്‍ത്തകരോട് വെളിപ്പെടുത്തിയിരിക്കുന്നത്. ‘ഞാന്‍ റെഡിയാണ്, ഹൈക്കമാന്‍ഡിന്റെ മൂളല്‍കൂടി വേണം’ എന്നാണ് ചെന്നിത്തല പറഞ്ഞതിന്റെ സാരം. ലോക്‌സഭയില്‍ മത്സരിച്ച് തോറ്റപ്പോള്‍ കെ പി സി സി പ്രസിഡന്റാവാന്‍ ഡല്‍ഹിയിലെ കാലായകാലെല്ലാം തഴുകി. തെന്നലായിപോലും ഒഴുകാനാവാത്ത പാവം തെന്നല ബാലകൃഷ്ണപിള്ളയെയും കഥയില്ലാത്ത പി പി തങ്കച്ചനെയും തഴഞ്ഞ് ആ കസേര തരപ്പെടുത്തി. രാജ്യസഭാ സീറ്റുകളില്‍ ഒഴിവുവന്നപ്പോള്‍ ആവത് പണിപ്പെട്ടു ചെന്നിത്തലക്കാരന്‍ രമേശ്. വെട്ടിവീഴ്ത്താന്‍ നോക്കിയത് ചില്ലറക്കാരെയല്ല. ആദ്യഘട്ടത്തില്‍ രമേശ് പള്ളിക്കൂടത്തില്‍ ചേരുന്നതിനും മുമ്പ് കെ എസ് യു ഉണ്ടാക്കിയ വയലാര്‍ രവിയെ. അടുത്ത ഘട്ടത്തില്‍ രമേശ് കെ എസ് യു അംഗത്വമെടുക്കുന്നതിനു മുമ്പ് കെ പി സി  സി അധ്യക്ഷനായ എ കെ ആന്റണിയെ. തഴുകലിലും വാഴ്ത്തുപാട്ടിലും ഫലം കണ്ടില്ല. ഇപ്പോള്‍ ഇതാ നിയമസഭയിലേയ്ക്ക് ഒരു കൈനോക്കാന്‍ ഞാന്‍ ഒരുക്കം എന്ന് പരസ്യപ്രഖ്യാപനം നടത്തി മുന്നില്‍ വന്നിരിക്കുന്നു.
ഈ കളി ചാണ്ടിയ്ക്ക് നേരത്തേ പിടികിട്ടിയിരുന്നു. ചെന്നിത്തല കളി പഠിച്ച സ്ഥലത്തു നിന്നല്ല ചാണ്ടി കളി പഠിച്ചത്. ആരോപണവിധേയരും കളങ്കിതരും കോണ്‍ഗ്രസ് സ്ഥാനാര്‍ഥി പട്ടികയിലുണ്ടാവുകയില്ലെന്ന് ഉജ്ജ്വല പ്രഖ്യാപനം രമേശ് ചെന്നിത്തല നടത്തി. പാമോയില്‍ കുംഭകോണത്തില്‍ തന്നേക്കാള്‍ ഉത്തരവാദി അന്ന് ധനകാര്യ മന്ത്രിയായിരുന്ന ഉമ്മന്‍ചാണ്ടിയാണെന്ന് കോണ്‍ഗ്രസ് നേതാവ് കൂടിയായ ടി എച്ച് മുസ്തഫ കോടതിയില്‍ രേഖാമൂലം പറഞ്ഞതോടെ കളങ്കിത പരിവേഷത്തില്‍ കിടന്നു പുളയുന്ന തന്നെയാണ് രമേശ് ചെന്നിത്തല ലക്ഷ്യമിടുന്നതെന്ന് ഉമ്മന്‍ചാണ്ടിക്ക് തിരിച്ചറിയാന്‍ പ്രയാസമുണ്ടായില്ല. അതുകൊണ്ടുതന്നെ തെല്ലും വൈകാതെ കുഞ്ഞൂഞ്ഞ് പത്രദ്വാര്വാ വെളിപ്പെടുത്തി, കളങ്കിതര്‍ക്ക് സീറ്റില്ലെന്ന് രമേശ് പറയുകയില്ല. അത് പത്രക്കാരുടെ വ്യാഖ്യാനം മാത്രമാണ്. മെയ്‌വഴക്കമുള്ള രമേശ് ചെന്നിത്തലയും അത് ഏറ്റുപാടി’. കളങ്കിതര്‍ക്കും മത്സരിക്കാം. പക്ഷേ ഞാനും മത്സരിക്കും എന്നാണ് ചെന്നിത്തല പറഞ്ഞത്. ഹിമാലയ കുംഭകോണവും കൊലപാതകവും രമേശ് ചെന്നിത്തലയുടെ പങ്കാളിത്തത്തെക്കുറിച്ച് പഴയ സഹയാത്രികന്‍ ഉയര്‍ത്തിയ ആക്ഷേപവും എല്ലാം ഉമ്മന്‍ചാണ്ടി ചെന്നിത്തലയുടെ കാതില്‍ മൂളിയതുകൊണ്ടാണുപോല്‍ കളങ്കിതര്‍ക്കും മത്സരിക്കാം എന്ന അഭിപ്രായം രമേശ് ഉച്ചൈസ്തരം ഘോഷിച്ചതെന്ന് കോണ്‍ഗ്രസിലെ ഒരു കൂട്ടര്‍ പറയുന്നുവെന്ന് പിന്നാമ്പുറ കഥ. ഞാനും മത്സരിക്കാന്‍ റെഡി എന്ന ചെന്നിത്തലയുടെ പ്രഖ്യാപനം കുഞ്ഞൂഞ്ഞിനെ അലോസരപ്പെടുത്തുന്നുവെന്ന് മറ്റൊരു കൂട്ടര്‍.
എന്തായാലും ഒന്ന് വ്യക്തം. സ്ഥാനമോഹികളല്ലാത്തവരാണ് കെ എസ് യു, യൂത്ത് കോണ്‍ഗ്രസ് മുതല്‍ മൂത്ത കോണ്‍ഗ്രസുകാര്‍ വരെയുള്ളവര്‍. രാജ്യ സേവനം എന്നത് കസേരകള്‍ക്കായുള്ള മല്‍പ്പിടുത്തമാണെന്നതാണെന്ന് കോണ്‍ഗ്രസായ കോണ്‍ഗ്രസുകാര്‍ക്കൊക്കെ നിശ്ചയമുണ്ട്.
പറയാതെവയ്യ, കെ പി സി സി നിര്‍വാഹക സമിതി യോഗം കോഴിക്കോട്ട് ചേര്‍ന്നപ്പോള്‍ ഉച്ചഭക്ഷണ വേളയില്‍ ഉമ്മന്‍ചാണ്ടിയ്ക്ക് വായിലേയ്ക്ക് ഭക്ഷണം തിരുകിക്കയറ്റുന്ന രമേശ് ചെന്നിത്തലയുടെ ചിത്രം പത്രങ്ങളില്‍ അച്ചടിച്ചുവന്നിരുന്നു. അപ്പോള്‍ ഇത്രമാത്രം വലിയ പാരവയ്ക്കാനാണ് കോഴിക്കാല്‍ വിളമ്പിയതെന്ന് കുഞ്ഞൂഞ്ഞ് അറിഞ്ഞിരുന്നില്ലെന്നു മാത്രം. മുസ്തഫയെ കൊണ്ട് പാമോയില്‍ കേസിലെ ഉത്തരവാദിത്വത്തില്‍ നിന്ന് ഉമ്മന്‍ചാണ്ടിയ്ക്ക് ഒഴിഞ്ഞുമാറാനാവില്ലെന്നും തന്നേക്കാള്‍ മുമ്പ് പ്രതിയാവേണ്ടത് ചാണ്ടിയാണെന്നും പറയിച്ചത് ചെന്നിത്തലയാണെന്ന് ചാണ്ടി അനുകൂലികള്‍ കരുതുന്നുപോല്‍. എല്ലാം ഓരോ വിശ്വാസം, ഊഹം എന്ന് സമാശ്വസിക്കുകയേ നിര്‍വാഹമുള്ളൂ.

Posted in ലേഖനം | Tagged: , , | Leave a Comment »

കോടീശ്വരന്‍മാരുടെ കൂത്തരങ്ങായി മാറുന്ന ക്രിക്കറ്റ് – സി കെ ചന്ദ്രപ്പന്‍

Posted by ജനയുഗം വാര്‍ത്തകള്‍ on ഏപ്രില്‍ 20, 2010

കോടീശ്വരന്‍മാരുടെ കൂത്തരങ്ങായി മാറുന്ന ക്രിക്കറ്റ്

സി കെ ചന്ദ്രപ്പന്‍

ഒരു നല്ല കളി, കോടികള്‍ കൈമാറുന്ന എന്തും ചെയ്യാന്‍ മടിക്കാത്ത അധാര്‍മിക ചൂതാട്ടമായി മാറുമ്പോള്‍ സൃഷ്ടിക്കപ്പെടുന്ന പ്രശ്‌നങ്ങളാണ് ഇന്ത്യന്‍ പ്രീമിയര്‍ ലീഗ് (ഐ പി എല്‍) ഇന്ന് നേരിടുന്നത്.
ഇന്ത്യന്‍ പ്രീമിയര്‍ ലീഗിന്റെ ആദ്യ കളിക്കുവേണ്ടി കളിക്കാരെ അവിശ്വസനീയമായ വന്‍ തുകകള്‍ക്ക് കാലിച്ചന്തയില്‍ കന്നുകാലികളെ ലേലം ചെയ്യുന്നതുപോലെ കച്ചവടം ചെയ്തപ്പോള്‍ത്തന്നെ ഏതാണ്ട് രണ്ടുവര്‍ഷങ്ങള്‍ക്കു മുമ്പ് 2008 ല്‍ ഈ പ്രശ്‌നം ലോക്‌സഭയില്‍ ഉന്നയിച്ചത് കമ്മ്യൂണിസ്റ്റ് നേതാവ് ഗുരുദാസ് ദാസ് ഗുപ്തയായിരുന്നു. അദ്ദേഹം അന്നു പറഞ്ഞത് ക്രിക്കറ്റിനെ വന്‍കിട കുത്തകകളും വലിയ രാഷ്ട്രീയ നേതാക്കന്‍മാരും ചേര്‍ന്ന് ചൂതാട്ടമാക്കി അധപ്പതിപ്പിക്കുന്നതിന്റെ അധാര്‍മികതയെക്കുറിച്ചും അപകടത്തെപ്പറ്റിയുമായിരുന്നു. സ്വയം ലേലം ചെയ്യപ്പെടാന്‍ അനുവദിച്ച, വന്‍തുകകളുടെ മിന്നലാട്ടത്തില്‍, സ്വന്തം നിലയും വ്യക്തിത്വവും മറന്ന ക്രിക്കറ്റിലെ വമ്പന്‍ കളിക്കാരോട് അദ്ദേഹം സഹതാപം രേഖപ്പെടുത്തി. ഈ പോക്ക് ക്രിക്കറ്റിനെ കച്ചവടച്ചരക്കാക്കി അധപ്പതിപ്പിക്കും എന്നദ്ദേഹം അന്നു താക്കീതു നല്‍കി.
ക്രിക്കറ്റിന്റെ, പ്രത്യേകിച്ച് വരാനിരിക്കുന്ന ഐ പി എല്ലിന്റെ മാസ്മരിക ശക്തിയില്‍ വിഭ്രാന്തി പൂണ്ടിരുന്ന അന്നത്തെ സാഹചര്യത്തില്‍ ആ പ്രസ്താവന അവഗണിക്കപ്പെട്ടു. എല്ലാറ്റിനെയും എതിര്‍ക്കുന്ന കമ്മ്യൂണിസ്റ്റുകാരുടെ ഒരു വികൃതി എന്ന മട്ടില്‍ ആ താക്കീത് ശ്രദ്ധിക്കപ്പെട്ടില്ല അന്ന്.
ശനിയാഴ്ച ഗുരുദാസ് ദാസ് ഗുപ്ത തൃശൂരില്‍ പത്രസമ്മേളനത്തില്‍ കൊച്ചി ഐ പി എല്‍ ടീം സംബന്ധിച്ച വിവാദത്തില്‍പ്പെട്ട ശശി തരൂരിനെ മന്ത്രിസഭയില്‍ നിന്നു പുറത്താക്കണമെന്നും ഐ പി എല്‍ നിരോധിക്കണമെന്നും ആവശ്യപ്പെട്ടു. ഒരു വെറും ചൂതാട്ടമായി അധപ്പതിച്ച ഐ പി എല്ലിന്റെ മേല്‍വിലാസത്തില്‍ വന്‍കിട മുതലാളിമാര്‍ നടത്തുന്ന കള്ളപ്പണ ഇടപാടുകളിലേക്ക് അദ്ദേഹം പ്രധാനമന്ത്രിയുടെ ശ്രദ്ധ ക്ഷണിക്കുകയും ചെയ്തു.
ഗുരുദാസ് ദാസ് ഗുപ്ത തൃശൂരില്‍ പറഞ്ഞ സംഗതി ഇന്ന് എല്ലാവരും ശ്രദ്ധിച്ചു. കാരണം ഐ പി എല്ലിന്റെ പിന്നില്‍ ഇന്ത്യയിലും വിദേശത്തുമുള്ള കുത്തകക്കമ്പനികളും അവരുടെ ഏജന്റുമാരും സജീവമായി പ്രവര്‍ത്തിക്കുന്നു എന്ന കാര്യത്തില്‍ ഇന്നാര്‍ക്കും തര്‍ക്കമില്ല.
ഈ വിഷയം സംബന്ധിച്ച ചില പ്രധാന വാര്‍ത്തകള്‍ ശ്രദ്ധിക്കുക. ബോര്‍ഡ് ഓഫ് കണ്‍ട്രോള്‍ ഫോര്‍ ക്രിക്കറ്റ് ഇന്‍ ഇന്ത്യ (ബി സി സി ഐ) എന്ന കേന്ദ്രമന്ത്രി ശരത് പവാര്‍ നയിക്കുന്ന വമ്പന്‍ ബോര്‍ഡിന് ഇന്‍കം ടാക്‌സ് നോട്ടീസ് നല്‍കിയിരിക്കുന്നു.
2008 ല്‍ ഐ പി എല്‍ തുടങ്ങുമ്പോള്‍ മുതല്‍ നടന്ന ടീമുകളുടെ ലേലം, കളിക്കാരുടെ ലേലം, ലേലങ്ങളില്‍ പങ്കെടുത്തവരുടെ വിവരങ്ങള്‍, അവരുടെ ധന സ്രോതസ് സംബന്ധിച്ച് ഐ പി എല്ലിനു നല്‍കിയ വിവരങ്ങള്‍, ബി സി സി ഐയും ഐ പി എല്ലുമായി ലാഭം പങ്കിട്ടതിന്റെ വിവരങ്ങള്‍, കളിക്കാര്‍ക്ക് ഏതുരീതിയില്‍, എങ്ങനെ, എത്ര പണം നല്‍കി, നികുതി നല്‍കിയതു സംബന്ധിച്ച വിവരങ്ങള്‍ തുടങ്ങി എല്ലാറ്റിന്റെയും എല്ലാ രേഖകളും ഏപ്രില്‍ 23ന് മുന്‍പ് ഇന്‍കം ടാക്‌സ് ഡിപ്പാര്‍ട്ട്‌മെന്റില്‍ നേരിട്ട് ഉത്തരവാദിത്വമുള്ള ഒരാളോ അല്ലെങ്കില്‍ ചുമതലപ്പെടുത്തുന്ന ഏജന്റോ വഴി സമര്‍പ്പിക്കുവാന്‍ നോട്ടീസ് നല്‍കിയിരിക്കുന്നു.
ഇതിനകം തന്നെ ഐ പി എല്‍ ഓഫീസ് ഇന്‍കംടാക്‌സ് ഡിപ്പാര്‍ട്ട്‌മെന്റ് റെയ്ഡ് ചെയ്തിരുന്നു. ഐ പി എല്‍ ചെയര്‍മാനെ ദീര്‍ഘമായി ചോദ്യം ചെയ്യുകയും ചെയ്തു. ഐ പി എല്‍ ക്രിക്കറ്റിനു വേണ്ടി വന്‍തുക മുടക്കിയത് ലോകത്തെയും ഇന്ത്യയിലേയും എണ്ണപ്പെട്ട കോടീശ്വരന്‍മാരാണ്. റിലയന്‍സും കൂട്ടുകാരും ചേര്‍ന്ന് 111.9 മില്യന്‍ ഡോളര്‍ മുടക്കിയാണ് സച്ചിന്‍ ടെന്‍ഡുല്‍ക്കര്‍ നയിക്കുന്ന മുംബയ് ഇന്ത്യന്‍സ് എന്ന ഐ പി എല്‍ ടീമിനെ സൃഷ്ടിച്ചിരിക്കുന്നത്. 111.6 മില്യന്‍ ഡോളര്‍ മുടക്കി അനില്‍ കുംബ്ലേ നയിക്കുന്ന റോയല്‍ ചലഞ്ചേഴ്‌സിനെ സൃഷ്ടിച്ചത് മദ്യ ചക്രവര്‍ത്തിയായ വിജയ് മല്ല്യയുടെ യു ബി ഗ്രൂപ്പാണ്; ബാംഗ്ലൂരിലെ ഡെക്കാന്‍ ക്രോണിക്കിള്‍ പത്ര ശൃംഖലയാണ് ഹൈദരബാദിലെ ഡെക്കാന്‍ ചാര്‍ജേഴ്‌സിന്റെ പിന്നില്‍. അവര്‍ മുടക്കിയത് 107.01 മില്യന്‍ ഡോളര്‍. 91 മില്യന്‍ ഡോളര്‍ മുടക്കി ഇന്ത്യ സിമന്റ്‌സ് സൃഷ്ടിച്ചതാണ് ചെന്നൈ സൂപ്പര്‍ കിംഗ്‌സ്. ഡല്‍ഹി ഡെയര്‍ ഡെവിള്‍സിന്റെ പിന്നില്‍ ജി എം ആര്‍ എന്ന കുത്തക; മുടക്കിയത് 84 മില്യന്‍ ഡോളര്‍. സിനിമയിലെ സൂപ്പര്‍ താരങ്ങള്‍ ഉടമസ്ഥരായ കൊല്‍ക്കത്ത നൈറ്റ് റൈഡേഴ്‌സിന്റെ കൂടെ റെഡ് ചില്ലി എന്റര്‍ടെയിന്‍മെന്റ് ലിമിറ്റഡ് മുടക്കിയത് 75.09 ദശലക്ഷം ഡോളര്‍. കിംഗ്‌സ് ഇലവന്‍ പഞ്ചാബിന്റെ പിന്നില്‍ ബോംബെ ഡെയിംഗ് മുടക്കിയത് 76 മില്യന്‍ ഡോളര്‍. രാജസ്ഥാന്‍ റോയല്‍സിന് 67 മില്യന്‍ മുടക്കിയത് ചെല്ലറാം ഗ്രൂപ്പ് ഉള്‍പ്പടെയുള്ളവര്‍. സിനിമാ താരങ്ങളായ ഷാരൂഖ് ഖാന്‍, പ്രീതിസിന്റ, ശില്‍പാ ഷെട്ടി തുടങ്ങിയവര്‍ ഈ ടീമുകളുമായി ബന്ധപ്പെട്ടവരാണ്.
ഐ പി എല്ലിന്റെ 2008, 2009 കളികളില്‍ നിന്നും ബി സി സി എല്ലിന് 578 കോടി രൂപ കിട്ടി. ഫ്രാന്‍ഞ്ചയ്‌സികള്‍ക്ക് (ടീം ഉടമകള്‍ക്ക്) കിട്ടിയത് 533 കോടി രൂപ. സ്റ്റേറ്റ് ക്രിക്കറ്റ് ഫെഡറേഷനുകള്‍ക്ക് ഐ പി എല്‍ വിഹിതമായി 202 കോടി രൂപ വേറെയും നല്‍കി ബി സി സി ഐ.
ഈ ടീമുകളുടെ ഫ്രാന്‍ഞ്ചയ്‌സികളുടെ പിന്നില്‍ പുറത്തറിയാതെ പ്രവര്‍ത്തിച്ച് ലാഭമുണ്ടാക്കുന്ന വന്‍ കമ്പനികള്‍ വേറെയുമുണ്ട്. ഈ വിവരങ്ങളൊക്കെയാണ് ഇന്‍കം ടാക്‌സ് അന്വേഷിക്കുന്നത്.
ഇക്കണ്ട കോടികളൊക്കെ ഇന്ത്യയിലെ സാധാരണക്കാരായ ക്രിക്കറ്റ് പ്രേമികള്‍ നല്‍കുന്ന തുകയാണ്. റോമന്‍ ഗ്ലാഡിയേറ്റര്‍മാരെപ്പോലെ ടീമുകളുടെ അടിമകളായി പൊരുതുന്ന ക്രിക്കറ്റ് താരങ്ങള്‍ കുത്തകകള്‍ക്ക് പണം സമ്പാദിക്കാന്‍ വഴിയൊരുക്കുന്നു.
വമ്പന്‍മാര്‍ വന്‍ പണം മുടക്കി നടത്തുന്ന ഈ ക്രിക്കറ്റ് മത്സരം വെറും ചൂതാട്ടമായി മാറുന്നതിന്റെയും അതിലെ വന്‍ ലാഭ സാധ്യതയിലേയ്ക്കും വിരല്‍ ചൂണ്ടുന്നു കൊച്ചിന്‍ ടീം ഉള്‍പ്പടെ രണ്ടു ടീമുകളുടെ ലേലം. പണ്ടത്തേതിന്റെ എത്ര ഇരട്ടി മുടക്കിയാണ് ഈ ടീമുകള്‍ സ്വന്തമാക്കിയത്, സമ്പന്നന്‍മാരുടെ കൂട്ടായ്മകള്‍. പണമെറിഞ്ഞു പണം വാരുക എന്ന തന്ത്രം അവര്‍ പ്രയോഗിക്കുന്നു.
ഈ കളിയിലാണ് തിരുവനന്തപുരം എം പിയും മന്ത്രിയുമായ ശശി തരൂര്‍ ചെന്നുപെട്ടതും വിവാദങ്ങളില്‍ കഥാപാത്രമായതും.
കേരളത്തിനൊരു ഐ പി എല്‍ ടീം സാധിച്ചതിന് താന്‍ ക്രൂശിക്കപ്പെടുന്നു എന്നാണ് തരൂരിന്റെ നിലപാട്. അദ്ദേഹത്തെ ഉത്തരേന്ത്യന്‍ ലോബി കുടുക്കിയിരിക്കുന്നു. അതുകൊണ്ട് കേരളം അദ്ദേഹത്തെ സഹായിക്കണം എന്നതാണ് കോണ്‍ഗ്രസില്‍ ചിലരുടെ നിലപാട്. എന്നാല്‍ മറ്റു പലരും പറയുന്നത് കോണ്‍ഗ്രസിനിതില്‍ കാര്യമില്ല എന്നാണ്.
ഐ പി എല്‍ ചെയര്‍മാന്‍ ലളിത് മോഡി പറയുന്നത് ശശി തരൂര്‍ അദ്ദേഹത്തെ നേരില്‍ വിളിച്ചു കൊച്ചി ഫ്രാഞ്ചൈസി ഷെയര്‍ ഹോള്‍ഡര്‍മാരുടെ വിവരങ്ങള്‍ പുറത്തുവിടരുത് എന്നു പറഞ്ഞുവെന്നാണ്. മോഡിയ്‌ക്കെതിരെ കൊച്ചിന്‍ ഐ പി എല്‍ ഫ്രാഞ്ചൈസികള്‍ ഒരാരോപണം ഉന്നയിച്ചിട്ടുണ്ട്. കൊച്ചിന്‍ ഐ പി എല്‍ ലേലം ഉറപ്പിച്ചതിനുശേഷം മോഡി തങ്ങളെ സമീപിച്ചത് 250 കോടി രൂപ തരാം, അവകാശം ഒഴിഞ്ഞാല്‍ എന്നാണ്.
വിഴുപ്പലക്കല്‍ – കൊള്ളപ്പണം പങ്കിടുന്നതു സംബന്ധിച്ച തര്‍ക്കം.
ഇതില്‍ ഒരു കേന്ദ്രമന്ത്രി ഇടപെടണമായിരുന്നുവോ?. അദ്ദേഹത്തിന്റെ അടുത്ത ഒരു സ്‌നേഹിതയ്ക്ക് കൊച്ചിന്‍ ഐ പി എല്‍ ടീമിന്റെ ഷെയറുകള്‍ ലഭിച്ചതും വിവാദമായി.
ഒരു ഇന്റര്‍നാഷണല്‍ എക്‌സിക്യുട്ടീവ് ആയി, യു എന്‍ ആസ്ഥാനത്തിലും മറ്റും ജോലി ചെയ്ത തരൂര്‍ ഒരിക്കലും ഒരു രാഷ്ട്രീയ പ്രവര്‍ത്തകനായിരുന്നില്ല. രാഷ്ട്രീയ പ്രവര്‍ത്തകര്‍ ഉയര്‍ത്തിപ്പിടിക്കേണ്ട മൂല്യങ്ങളെകുറിച്ച് അജ്ഞനാണദ്ദേഹം. ഗാന്ധിജി, പണ്ഡിറ്റ് നെഹ്‌റു, ഇന്ദിരാഗാന്ധി തുടങ്ങിയവരെക്കുറിച്ചെല്ലാം തരൂര്‍ പ്രകടിപ്പിച്ച അഭിപ്രായ പ്രകടനങ്ങള്‍ ഏറെ വിവാദങ്ങള്‍ സൃഷ്ടിച്ചിരുന്നു. സാധാരണ ജനങ്ങളുടെ വികാരങ്ങളും ജീവിതപ്രശ്‌നങ്ങളുമല്ല, തരൂരിനെ പോലുള്ളവരെ നയിക്കുന്നത്. പണമുണ്ടാക്കി ആര്‍ഭാടമായി ജീവിക്കുക, ജീവിതം ആസ്വദിക്കുക, ഇതാണ് അത്തരക്കാരുടെ ആദര്‍ശം.
അതുകൊണ്ടാണ് ലോക്‌സഭയിലേക്ക് തിരഞ്ഞെടുക്കപ്പെട്ട അദ്ദേഹം കോണ്‍ഗ്രസ് എം പിമാരുള്‍പ്പെടെ എല്ലാവരെപ്പോലെയും കേരള ഹൗസില്‍ താമസിക്കാതെ ഡല്‍ഹിയിലെ ഒരു സൂപ്പര്‍ ഫൈവ്സ്റ്റാര്‍ ഹോട്ടലില്‍ താമസിച്ചത്. കോണ്‍ഗ്രസ് എം പിമാര്‍ രാജ്യം നേരിടുന്ന പ്രയാസങ്ങള്‍ കണക്കിലെടുത്ത്, വിമാനത്തില്‍ എക്കോണമി ക്ലാസില്‍ യാത്ര ചെയ്യണം എന്ന് പാര്‍ട്ടി തീരുമാനിച്ചപ്പോള്‍ ശശി തരൂര്‍ ‘കന്നുകാലി ക്ലാസി’ലെ യാത്രയെക്കുറിച്ച് പറഞ്ഞ് വിവാദ പുരുഷനായത്.
തരൂര്‍ നേരിടുന്നത് രാഷ്ട്രീയത്തിലെ ഉയര്‍ച്ചയുടെയും താഴ്ചയുടെയും പ്രശ്‌നമാണെന്ന്, തമാശ പറഞ്ഞ പ്രധാനമന്ത്രി അവസാന തീരുമാനം എന്ത് എടുക്കും എന്നതിനെ ആശ്രയിച്ചിരിക്കുന്നു തരൂരിന്റെ രാഷ്ട്രീയഭാവി.
എന്നാല്‍ പ്രധാന പ്രശ്‌നം അതല്ല. ഇന്ത്യന്‍ കുത്തകകളും മറ്റു പണച്ചാക്കുകളും ചേര്‍ന്ന് ഒരു നല്ല ഗെയിമിനെ ചൂതാട്ടമാക്കി മാറ്റുന്നതു നല്ലതോ? ഇനി വരാനിരിക്കുന്നത് ”ഒത്തുകളി” വിവാദമാണ്. അതില്‍ തകരുന്നത് ക്രിക്കറ്റ് താരങ്ങളും ക്രിക്കറ്റുമായിരിക്കും.
ഈ അധപ്പതനത്തിലേക്ക് ക്രിക്കറ്റിനെ കൈപിടിച്ചു നടത്തുന്നത് മൂലധനവും അതിന്റെ അടങ്ങാത്ത ലാഭമോഹവും.
ഇതിനെതിരെ ക്രിക്കറ്റിനെ രക്ഷിക്കാന്‍, ക്രിക്കറ്റ് പ്രേമികളും ജനങ്ങളും സര്‍ക്കാരും മുന്നോട്ടുവരുമോ എന്നതാണ് ചോദ്യം

Posted in ലേഖനം | Tagged: , | Leave a Comment »

സിക്‌സറടിക്കാന്‍ മോഹിച്ചു, പക്ഷേ റണ്ണൗട്ടായി

Posted by ജനയുഗം വാര്‍ത്തകള്‍ on ഏപ്രില്‍ 20, 2010

സിക്‌സറടിക്കാന്‍ മോഹിച്ചു, പക്ഷേ റണ്ണൗട്ടായി

‘കനകം മൂലം കലഹം, കാമിനി മൂലം കലഹം’ എന്നത് സിനിമാ ഗാനത്തിലെ ഈരടികള്‍ മാത്രമല്ല . പണ്ടേയ്ക്ക് പണ്ടേയുണ്ടായ സംഭവങ്ങള്‍ തെളിയിച്ച സത്യവും ഇന്നും അരങ്ങേറുന്ന അനുഭവവുമാണ്. സ്വത്തിനും പണത്തിനും കാമിനിക്കും വേണ്ടിയുള്ള കലഹം പൗരാണിക കാലത്തുപോലുമുണ്ടായിരുന്നു. അത് വര്‍ത്തമാന കാലത്തും മാറ്റമില്ലാതെ തുടരുന്നു.
കേന്ദ്ര വിദേശകാര്യസഹമന്ത്രി ശശി തരൂരിന്റെ നിഷ്ഠൂര അനുഭവങ്ങള്‍ തെളിയിക്കുന്നതും കാമിനിയുടെയും കനകത്തിന്റെയും ഫലമായുണ്ടാവുന്ന ഉഗ്ര കലഹത്തിന്റെ ആഘാത പ്രത്യാഘാതങ്ങളാണ്. ലണ്ടനിലും കാനഡയിലും ന്യൂയോര്‍ക്കിലും ജീവിതത്തിലെ നല്ലകാലം മുഴുവന്‍ ചുറ്റിക്കറങ്ങിയ ശശി തരൂരിന് അവിടങ്ങളിലെ പണി തീര്‍ന്നപ്പോഴാണ് ഇന്ത്യയോട് ആദരവും രാജ്യത്തെ സേവിക്കണമെന്നുള്ള അഭിവാഞ്ജയും പൊട്ടിമുളച്ചത്. ഖദറിനെ അപഹസിച്ച തരൂരിന്, കോണ്‍ഗ്രസ് നേതാക്കളെ സന്ദര്‍ശിക്കുമ്പോള്‍ മാത്രം ഖദര്‍ ഇഷ്ടവേഷമായി. അവര്‍ക്കും ഖദറിനോട് പുച്ഛമാണെന്ന് പാവത്തിന് അറിയാതെ പോയി. മാംസപിണ്ഡം എന്ന് താന്‍ തന്നെ വിശേഷിപ്പിച്ച വ്യക്തി ആദരണീയയും അഭിവന്ദ്യയുമായ നേതാവായി പരിണമിച്ചു. മുന്‍പിന്‍ നോട്ടമില്ലാതെ ഇന്ദിരയെയും രാജീവിനെയും അപഹസിക്കുകയും പുച്ഛത്തോടെ വിശകലനം നടത്തുകയും ചെയ്ത തരൂര്‍ അവരെ ഈശ്വരതുല്യരായി കണ്ട് നമിക്കുകയും സ്തുതിക്കുകയും വാഴ്ത്തുകയും ചെയ്തു.
ഐക്യരാഷ്ട്രസഭാ ഉദ്യോഗസ്ഥനായിരിക്കുമ്പോള്‍ ഇന്ത്യയെ കാണാതിരിക്കുകയും അറിയാതിരിക്കുകയും ചെയ്ത ഈ സാമ്രാജ്യത്വ സ്തുതിപാഠകന് അവിടത്തെ പണിതീര്‍ന്നപ്പോഴാണ് പൊടുന്നനെ കോണ്‍ഗ്രസ്സിനോടുള്ള സ്‌നേഹം വഴിഞ്ഞൊഴുകിയത്. എല്ലാം കാലത്തിന്റെ കളികള്‍ എന്നു മാത്രമേ തരൂരിന് പോലും വിശദീകരിക്കാനാവുകയുള്ളു.
നൈമിഷിക വേഗതയില്‍ ആര്‍ക്കും കോണ്‍ഗ്രസുകാരനാവാമെന്നതുകൊണ്ട് ശശി തരൂരും കോണ്‍ഗ്രസായി. കോടീശ്വരനായതുകൊണ്ട് കോണ്‍ഗ്രസുകാര്‍ അഭിമാന വിജ്യംഭണത്തോടെ അദ്ദേഹത്തെ എതിരേറ്റു. പാര്‍ലമെന്റില്‍ കോടീശ്വരന്മാരും കുബേരന്മാരും തന്നെ വേണമെന്ന നിര്‍ബന്ധബുദ്ധി കോണ്‍ഗ്രസിനുള്ളതുകൊണ്ട് അദ്ദേഹത്തിന് പാര്‍ലമെന്റ് സീറ്റും കേന്ദ്രമന്ത്രിപദവിയും കിട്ടി. ഉടുമുണ്ടഴിച്ചും കസേരയേറു നടത്തിയും സോഡാകുപ്പി പ്രയോഗം നടത്തിയും കോണ്‍ഗ്രസ് പ്രവര്‍ത്തനത്തിന്റെ വിശിഷ്ടത തെളിയിച്ചവരെ വീണ്ടും വീണ്ടും ഈ വൈഭവം ആവര്‍ത്തിക്കുവാനായി നിയോഗിച്ചു. വെയിലുകൊണ്ടും മുദ്രാവാക്യം വിളിച്ചും പെട്ടിയെടുത്തും മുട്ടുതിരുമ്മിയും ക്ഷീണിച്ചവരെ വീണ്ടും വീണ്ടും ക്ഷീണിക്കുവാനായും ചുമതലപ്പെടുത്തി. മണ്ണും ചാരി നിന്നവന്‍ പെണ്ണും കൊണ്ടുപോയി എന്ന ചൊല്ല് അന്വര്‍ഥമാക്കണമെന്ന് കോണ്‍ഗ്രസ്സ് പാര്‍ട്ടിയ്ക്ക് നിര്‍ബന്ധമുണ്ടായിരുന്നതുകൊണ്ട് ശശി തരൂരിനെ വിദേശകാര്യ സഹമന്ത്രിയാക്കി.
മുതുക് നോവാതെ വേലി കടന്നതുകൊണ്ട് ഇന്ത്യയില്‍ സാധാരണ ക്ലാസില്‍ വിമാനത്തില്‍ യാത്ര ചെയ്യുന്നവര്‍ കന്നുകാലികളാണെന്ന് അദ്ദേഹത്തിന് അനുഭവപ്പെട്ടു. വിമാനം കണ്ടുമാത്രം പരിചയമുള്ളവര്‍ പുഴുക്കളാണെന്നും വിമാനം കണ്ടിട്ടില്ലാത്തവര്‍ കണ്ണില്‍ പെടാത്ത കൃമികളാണെന്നും വിലയിരുത്താന്‍ അദ്ദേഹത്തിന് കഴിഞ്ഞു. ശരിയായ കോണ്‍ഗ്രസ്സുകാരനാണ് ശശി തരൂരെന്ന് ഓര്‍ത്തോര്‍ത്തും പ്രചരിപ്പിച്ചും കോണ്‍ഗ്രസ്സുകാര്‍ കോള്‍മയിര്‍ കൊണ്ടു.
പ്രണയം മരിക്കുന്നില്ലെന്ന് ആര്‍ക്കാണ് അറിയാത്തത്? ആര്‍ക്കും അറിയില്ലെങ്കിലും ശശി തരൂരിന് അറിയാം. ‘ഇതിഹാസങ്ങള്‍ ജനിക്കുന്നതിന് മുമ്പ്, ഈശ്വരന്‍ ജനിക്കുന്നതിന് മുമ്പ്, പ്രകൃതിയും കാലവും ചേര്‍ന്ന് പ്രണയത്തെ, ദിവ്യപ്രണയത്തെക്കുറിച്ച് പാടിയിട്ടുണ്ടെന്ന് വയലാര്‍ എഴുതുന്നതിനും മുമ്പേ തരൂരിന് അറിയാവുന്നതാണ്. അതുകൊണ്ട് നിമിഷങ്ങള്‍ നീളുന്ന പ്രണയത്തിലും കേവല വര്‍ഷങ്ങള്‍ നീളുന്ന ദാമ്പത്യത്തിലും അദ്ദേഹം മുങ്ങിക്കുളിച്ചിട്ടുണ്ട്. വെളിപ്പെടുത്തപ്പെട്ടതും ഔദ്യോഗികവുമായ രണ്ട് വൈവാഹിക ജീവിതങ്ങള്‍ നയിച്ച് വിരസത പൂണ്ടതിനാല്‍ മൂന്നാമത്തെ വൈവാഹിക ജീവിതത്തിന്റേതായ റിലേ മത്സരത്തിന്റെ ബാറ്റണ്‍ കയ്യിലേന്തി നില്‍ക്കുമ്പോഴാണ് ചില വിരസരും പ്രണയവിരുദ്ധരും അസൂയാലുക്കളുമായ ആളുകള്‍ പ്രയാണത്തെ തടസ്സപ്പെടുത്താന്‍ മുന്നിട്ടിറങ്ങിയിരിക്കുന്നത്. ‘പ്രേമിയ്ക്ക, അനവതരവും പ്രേമിയ്ക്ക്’ എന്ന വിക്ടര്‍ ഹ്യൂഗോവിന്റെ വരികള്‍ ഈ കുബുദ്ധികള്‍ക്കറിയില്ല.
കേരളത്തിന്റെ ഒരേയൊരു ഇല്ലായ്മ ഐ പി എല്‍ ക്രിക്കറ്റ് ടീമാണെന്ന് തിരിച്ചറിഞ്ഞ് അതിനായി പൊരുതുകയും വിജയിക്കുകയും ചെയ്തതിന്റെ പേരിലാണ് ഈ കോലാഹലം. ഗുജറാത്തിലെ വ്യവസായികളുടെ പണമിറക്കി ഒരു ടീമുണ്ടാക്കിയാല്‍ അത് എങ്ങനെ കേരള ടീം ആകുമെന്ന് ചോദിച്ച് വശംകെടുത്തരുത്. കേരള ടീമിന്റെ സ്വന്തം ഗ്രൗണ്ടായി ഗുജറാത്തിലെ അഹമ്മദാബാദിനെ ശുപാര്‍ശ ചെയ്യുന്നതെങ്ങനെ എന്നും ചോദിക്കരുത്. ശശി തരൂര്‍ ഇടപെട്ടതുകൊണ്ട് അത് കേരളത്തിന്റെ ടീമാണ്. അത്രമാത്രം കരുതിയാല്‍ മതി.
സഹസ്രകോടീശ്വരന്മാര്‍ കള്ളപ്പണത്തെ വെളുപ്പിക്കാനും കൂടുതല്‍ കോടികള്‍ കൊയ്യാനും നടത്തുന്ന ചൂതാട്ടം എങ്ങനെ നടത്തണമെന്ന് ഉപദേശിച്ചതിലൂടെ കേരളത്തിന് സൗവര്‍ണ ശോഭയുള്ള ഭാഗ്യമുദ്രയാണ് തരൂര്‍ കൊണ്ടുവന്നതെന്ന കാര്യത്തില്‍ ഉമ്മന്‍ചാണ്ടിയ്ക്കും ചെന്നിത്തലയ്ക്കും കെ സുധാകരനും എന്തിന് പി കെ കുഞ്ഞാലിക്കുട്ടിയ്ക്കുപോലും സംശയമില്ല.
കൊച്ചി കേന്ദ്രീകൃതമായ ഐ പി എല്‍ ടീം വരുന്നതോടെ കേരളം അപ്പാടെ വികസിച്ച് പശ്ചിമഘട്ടം കടക്കും, അറബിക്കടലിനെ അതിജീവിക്കും. കേന്ദ്ര തരേണ്ട അരിയും ഗോതമ്പും മണ്ണെണ്ണയും പഞ്ചസാരയും തന്നില്ലെങ്കിലും വീണ്ടും വീണ്ടും വെട്ടിക്കുറച്ചാലും പട്ടിണിപാവങ്ങള്‍ക്ക് കുഴപ്പമുണ്ടാവാതെ ഐ പി എല്‍ ടീം നോക്കിക്കൊള്ളും. തൊഴിയില്ലാത്തവര്‍ കേരളത്തില്‍ ഇല്ലാതാകും. കേരളത്തോടുള്ള സ്‌നേഹം ഒന്നുകൊണ്ടുമാത്രം തരൂര്‍ മുന്നിട്ടിറങ്ങിയതാണ്. പക്ഷേ അതില്‍ പണമൊന്നും മുടക്കാതെ തരൂരിന്റെ പ്രതിശ്രുത വധുവായി കരുതപ്പെടുന്ന ഒരാളിന് 18 ശതമാനം സ്വതന്ത്ര ഓഹരികളുണ്ടായിപ്പോയി! പണം മുടക്കാതെയും 1550 കോടി ചെലവഴിച്ച ടീമില്‍ ഓഹരിയുണ്ടാക്കാമെന്ന് ബുദ്ധിയുള്ളവര്‍ക്കല്ലേ മനസ്സിലാക്കാന്‍ പറ്റൂ. ടീം ഒപ്പിച്ചെടുക്കാന്‍ പ്രതിശ്രുത വധു നന്നായി വിയര്‍പ്പൊഴുക്കി. ആ വിയര്‍പ്പിന്റെ കൂലിയാണ് പണം മുടക്കാതെയുള്ള 18 ശതമാനം ഓഹരി. പറഞ്ഞാല്‍ വിശ്വസിക്കണമെങ്കില്‍ വിയര്‍പ്പൊഴുക്കിയതിന്റെ ക്ഷീണമെത്രയേറെയെന്ന് മനസ്സിലാക്കണം.
ചാനലുകാരെയും പത്രക്കാരെയും കൊണ്ടും നിവൃത്തിയില്ലാതായി. അവര്‍ തോളിലേറ്റി നടക്കുകയും ഉപഹാരങ്ങള്‍ പറ്റുകയും പുകഴ്ത്തുകയും ചെയ്യും. തരം കിട്ടുമ്പോള്‍ തറയിലിട്ട് ചവിട്ടിമെതിക്കുകയും ചെയ്യും. 18 ശതമാനം ഓഹരി കിട്ടിയ ‘കഠിനാധ്വാനി’യായ വനിതയുമായി തരൂര്‍ മുട്ടിയിരുമ്മുന്നതും മുഖം ചേര്‍ത്തുവെയ്ക്കുന്നതും പ്രണയ വിവശനാകുന്നതും സുന്ദരി തോളില്‍ പിടിക്കുന്നതും വ്രീളാവിവശയായി പിച്ചുന്നതുമൊക്കെയായുള്ള ചലന-നിശ്ചല ചിത്രങ്ങള്‍ കാട്ടി അവര്‍ ആഘോഷിച്ചുകളഞ്ഞു.
വമ്പന്‍ സിക്‌സറടിക്കുകയായിരുന്നൂ മോഹം. പക്ഷേ റണ്ണൗട്ടായിപ്പോയി. സംശയം തീര്‍ക്കേണ്ട മൂന്നാം അമ്പയര്‍മാര്‍ക്ക് കാഴ്ചശക്തി നന്നേ കുറവാണെന്നതു മാത്രമായിരുന്നു പ്രതീക്ഷ. പക്ഷെ അവരുടെ കണ്ണുകള്‍ക്ക് പോലും കാഴ്ച നല്‍കാന്‍ പോന്നതായിരുന്നു തരൂരിന്റെ കളി. ശരിയ്‌ക്കൊന്ന് ‘ക്രിക്കറ്റ്’ കളിക്കാന്‍ പോലും സമ്മതിക്കുന്നില്ലെങ്കില്‍ തരൂര്‍ എന്തു ചെയ്യും?.

Posted in ലേഖനം | Tagged: | Leave a Comment »

‘രാജി വെച്ചു കളയും ഞാന്‍’ – ദിഗംബരന്‍

Posted by ജനയുഗം വാര്‍ത്തകള്‍ on ഏപ്രില്‍ 14, 2010

‘രാജി വെച്ചു കളയും ഞാന്‍’

കേന്ദ്ര ആഭ്യന്തരമന്ത്രി പി ചിദംബരം നിസ്സാരനല്ലെന്ന് അറിയാത്തവരായി അധികമാരും ഉണ്ടാവാന്‍ തരമില്ല. വിദേശത്തെ ഉന്നത സര്‍വകലാശാലയില്‍ നിന്ന് ബിരുദം നേടിയ മിടുമിടുക്കനാണ് അദ്ദേഹം. കീര്‍ത്തിമുദ്രകള്‍ ഒന്നല്ല ഒട്ടനവധിയാണ് ചിദംബരത്തിന്. ചെട്ടിയാര്‍ രാജപരമ്പരകളിലെ മുദ്രപതിപ്പിച്ച കിരീടം അദ്ദേഹം ഒളിപ്പിച്ചു വെച്ചിട്ടുണ്ട്. സമ്പന്നരില്‍ സമ്പന്നനായതുകൊണ്ട് പാവപ്പെട്ടവരെയും ദരിദ്രരെയും കണ്ടാല്‍ അറപ്പും അവരെക്കുറിച്ച് കേള്‍ക്കുന്നത് അലര്‍ജിയുമാണ് അദ്ദേഹത്തിന്. വിശക്കുന്നവന്റെ സ്വപ്നം ആഹാരമാണെന്ന മുഴുത്ത സത്യം അതുകൊണ്ടുതന്നെ അദ്ദേഹത്തിന് അറിഞ്ഞുകൂട. വിശക്കുന്നവന്‍ കൂടുതല്‍ കൂടുതല്‍ വിശക്കണമെന്നും ധനാഢ്യര്‍ കൂടുതല്‍ കൂടുതല്‍ ധനാഢ്യരാകണമെന്നും നിര്‍ബന്ധമുള്ളയാളാണ് ചിദംബരം. പലഘട്ടങ്ങളിലായി, പല മന്ത്രിസഭകളില്‍ വാണിജ്യ-ധനകാര്യ മന്ത്രി കസേരകള്‍ ലഭ്യമായപ്പോഴൊക്കെ വിശക്കുന്നവനെ കൂടുതല്‍ വിശക്കുവാനും ദരിദ്രനെ കൂടുതല്‍ ദരിദ്രനാക്കാനുമുള്ള ‘ജനോപകാരപ്രദമായ’ നടപടികള്‍ ഈ കുബേരന്‍ സ്വീകരിച്ചിട്ടുമുണ്ട്.
ഏതെങ്കിലും ഒരു പാര്‍ട്ടിയില്‍ തന്നെ നിലകൊള്ളണമെന്ന ശാഠ്യമൊന്നും ചിദംബരത്തിനുള്ളതായി അദ്ദേഹത്തിന്റെ ശത്രുക്കള്‍ പോലും ആരോപിക്കുകയില്ല. കോണ്‍ഗ്രസായത് കോണ്‍ഗ്രസ് ഒരു നല്ല കക്ഷിയാണെന്ന് തെറ്റിദ്ധരിച്ചിട്ടൊന്നുമല്ല. കോണ്‍ഗ്രസായാല്‍ അധികം ആയാസപ്പെടാതെ തന്നെ പാര്‍ലമെന്റിലെത്താം, മന്ത്രിയാവാം എന്നൊക്കെ തിരിച്ചറിഞ്ഞതുകൊണ്ടാണ്. പണക്കാരോടും രാജ പരമ്പരകളോടും നിസ്സീമമായ സ്‌നേഹം സ്വാതന്ത്ര്യാനന്തര ഇന്ത്യയിലെ കോണ്‍ഗ്രസിനുണ്ടെന്ന് ചിദംബരത്തിനറിയാമായിരുന്നു. ഖദര്‍ ധരിക്കണമെന്നും അതൊരു അടയാളമായി കൊണ്ടു നടക്കണമെന്നുമുള്ള ലളിതമായ കാര്യം മാത്രമേ കോണ്‍ഗ്രസാകാന്‍ വേണ്ടതുള്ളൂ എന്നതും ശിവഗംഗക്കാരനായ ചിദംബരത്തിനറിയാം. പക്ഷേ എപ്പോഴും കോണ്‍ഗ്രസായി നിന്നു കൊള്ളാമെന്നൊന്നും ആര്‍ക്കും വാക്കു കൊടുത്തിട്ടില്ലാത്തതുകൊണ്ട് ഇടയ്ക്ക് കോണ്‍ഗ്രസ് വിടുകയും ചെയ്യാമെന്ന് ചിദംബരത്തിന് നിശ്ചയമുണ്ട്.
കോണ്‍ഗ്രസിലെ ട്രബിള്‍ ഷൂട്ടറായിരുന്ന ജി കെ മൂപ്പനാര്‍ കോണ്‍ഗ്രസിന് ട്രബിള്‍ സൃഷ്ടിച്ചുകൊണ്ട് തമിഴ്മാനിലാ കോണ്‍ഗ്രസുണ്ടാക്കിയപ്പോള്‍ ചിദംബരവും ഒപ്പം കൂടി. കോണ്‍ഗ്രസില്‍ എവിടെയൊക്കെ പ്രശ്‌നമുണ്ടായാലും അതു പരിഹരിക്കാന്‍ ഓടി നടന്ന പ്രശ്നപരിഹാരി തന്നെ പ്രശ്‌നക്കാരനാവുമ്പോള്‍ കൂട്ടത്തില്‍ നില്‍ക്കേണ്ട കടമ തനിക്കുമുണ്ടെന്ന് ചിദംബരത്തിന് ഉള്‍വിളി ഉണ്ടായി. പക്ഷേ മൂപ്പനാര്‍ പ്രശ്‌നങ്ങളൊക്കെ പരിഹരിച്ച് കോണ്‍ഗ്രസിലേയ്ക്ക് മടങ്ങിയപ്പോള്‍ കൂടെപ്പോകാന്‍ ചിദംബരത്തെ കിട്ടിയില്ല. ആരും അറിയാത്തതും ഇന്ന് ചിദംബരത്തിനുപോലും ഓര്‍മ്മയില്ലാത്തതും ആരും കൂടെയില്ലാത്തതുമായ ഒരു പേരുമിട്ട് ഒരു കക്ഷിക്ക് ഒറ്റയ്ക്ക് നേതൃത്വം നല്‍കാനുള്ള വീരസാഹസികതയ്ക്ക് ചിദംബരം മുതിര്‍ന്നു കളഞ്ഞു.
എങ്ങനെയായാലും മന്ത്രിയായിരിക്കണമെന്ന വാശി ഉള്ളതുകൊണ്ട് ദേവഗൗഡ, ഐ കെ ഗുജ്‌റാള്‍ മന്ത്രിസഭകളിലും നുഴഞ്ഞുകയറി. 2004 ലെ തിരഞ്ഞെടുപ്പില്‍ ചിദംബരം മത്സരിച്ചത് കോണ്‍ഗ്രസ് ടിക്കറ്റിലല്ല. പക്ഷേ തിരഞ്ഞെടുപ്പ് കഴിഞ്ഞ് ആദ്യ യു പി എ മന്ത്രിസഭ വന്നപ്പോള്‍ അദ്ദേഹം കോണ്‍ഗ്രസ് പട്ടികയില്‍ മന്ത്രിയായി. മന്ത്രി പദവിയില്‍ മുന്തിയ ഇനമായ ധനകാര്യം തന്നെ സ്വന്തമായി. പക്ഷേ ഒരിക്കല്‍ ഉപേക്ഷിച്ച കോണ്‍ഗ്രസ് അംഗത്വം അദ്ദേഹം തിരിച്ചുവാങ്ങിയിരുന്നില്ല. കോണ്‍ഗ്രസ് മെമ്പര്‍ ഷിപ്പില്ലാതെ കോണ്‍ഗ്രസ് മന്ത്രിയായതു സഹിക്കാം. പക്ഷേ മെമ്പര്‍ഷിപ്പില്ലാതെ, സ്വന്തമായുണ്ടാക്കിയ ആരുമാരുമറിയാത്ത പാര്‍ട്ടിയെ ഉപേക്ഷിക്കാതെ കോണ്‍ഗ്രസ് പ്രവര്‍ത്തക സമിതിയിലും ഈ മന്നന്‍ പതിവായി പങ്കെടുത്തു. ചിദംബരത്തിന്റെ മഹത്വം പിടികിട്ടാന്‍ ഈ ഒറ്റ സംഭവം മാത്രം മതി. ഒരു മെമ്പര്‍ഷിപ്പില്‍ എന്തിരിക്കുന്നു? എന്ന് സോണിയാഗാന്ധിയെയും മന്‍മോഹന്‍ സിംഗിനെയും കൊണ്ട് പറയാതെ പറയിപ്പിക്കുവാന്‍ ചിദംബരത്തിന് സാധിച്ചു. 2009 ആയപ്പോള്‍ അദ്ദേഹം കോണ്‍ഗ്രസിന്റെ സ്ഥാനാര്‍ഥിയായി കൈപ്പത്തി ചിഹ്നത്തില്‍ മത്സരിച്ചു. അദ്ദേഹത്തിന്റെ ആരോരുമില്ലാത്ത കക്ഷിയെ അദ്ദേഹം എന്തു ചെയ്തുവെന്ന് ആരുമാരും ചോദിച്ചില്ല. ജനങ്ങളെ ബുദ്ധിമുട്ടിക്കാതിരിക്കാന്‍ ലയന സമ്മേളനം എന്ന പ്രഹസന നാടകം ഒഴിവാക്കി അദ്ദേഹം സഹായിച്ചു. ആരോരുമറിയാതെ, അദ്ദേഹം പോലും അറിയാതെ അദ്ദേഹം കോണ്‍ഗ്രസില്‍ ലയിച്ചു ചേര്‍ന്നു. മണ്ണില്‍ നഗ്നപാദനായി നടക്കുന്ന മനുഷ്യരെ കാണാന്‍ കഴിവില്ലാത്ത ചിദംബരത്തെ പോലുള്ളവര്‍ നേതൃത്വം നല്‍കുന്നതുകൊണ്ട് തമിഴ്‌നാട്ടില്‍ കോണ്‍ഗ്രസ് ഒരു മൈനര്‍ പാര്‍ട്ട്ണറാണ്. കരുണാനിധിയുടെയും ജയലളിതയുടെയും ദയാവായ്പ്പിനായി തരാതരം പോലെ തലകുനിക്കുകയും മുട്ടിലിഴയുകയും ചെയ്യുന്ന ഒരു ചിന്ന പാര്‍ട്ടി.
പാര്‍ട്ടി തമിഴ്‌നാട്ടില്‍ ചെറുതായതുകൊണ്ട് ചിദംബരത്തിന് നഷ്ടമൊന്നുമില്ല. വമ്പന്‍ സ്ഥാനങ്ങള്‍ ചിദംബരത്തിന് സ്വന്തമാകുമ്പോള്‍ പാര്‍ട്ടി വലുതാകണമെന്ന് കാംക്ഷിക്കുന്നതെന്തിന്? ധനമന്ത്രി പദവിയില്‍ സ്വച്ഛന്ദ വിഹാരം നടത്തുമ്പോഴാണ് ആഭ്യന്തര മന്ത്രി പദവി സ്വന്തമായത്. ബോംബ് സ്‌ഫോടന പരമ്പരകളും ഭീകരാക്രമണങ്ങളും ആവര്‍ത്തിച്ചുകൊണ്ടിരിക്കുമ്പോള്‍ മണിക്കൂറുകള്‍ക്കുള്ളില്‍ ആവര്‍ത്തിച്ചാവര്‍ത്തിച്ച് വേഷം മാറി ടെലിവിഷന്‍ ക്യാമറകള്‍ക്കു മുന്നില്‍ പ്രത്യക്ഷപ്പെട്ട് സൗന്ദര്യബോധം പ്രകടമാക്കിയ അഴകിയ രാവണനായ ആഭ്യന്തരമന്ത്രിയെ സഹിക്കവയ്യാതായപ്പോഴാണ് ശിവരാജ് പാട്ടീലിനെ കോണ്‍ഗ്രസ് ഒഴിവാക്കിയത്. പകരം മറ്റൊരു ‘അഴകുള്ള രാവണ’നെ പ്രതിഷ്ഠിച്ചു.
ആഭ്യന്തര മന്ത്രിയായ ശേഷം ‘അമ്പട ഞാനേ’ എന്ന മട്ടിലും ഭാവത്തിലുമായിരുന്നു ചിദംബരം. സംസ്ഥാനങ്ങളില്‍ സന്ദര്‍ശനം നടത്തി കോണ്‍ഗ്രസിതര സര്‍ക്കാരുകളെ പുലഭ്യം പറഞ്ഞ് ‘ഞാനൊരു മഹാകേമന്‍, എന്നെ കണ്ടു പഠിപ്പിന്‍’ എന്നു  പറയാതെ പറഞ്ഞ് ഞെളിഞ്ഞു നടക്കുകയായിരുന്നു ഈ വില്ലാളി വീരന്‍. അദ്ദേഹം ആഭ്യന്തര മന്ത്രിയായ ശേഷവും സ്‌ഫോടനങ്ങള്‍ക്കും തീവ്രവാദ പ്രവര്‍ത്തനങ്ങള്‍ക്കും മാവോയിസ്റ്റ് അതിക്രമങ്ങള്‍ക്കും തെല്ലും ക്ഷാമമുണ്ടായില്ല. അതെല്ലാം കിരീടത്തിലെ സുവര്‍ണ മുദ്രകളായി ചിദംബരവും മന്‍മോഹന്‍ സിംഗും കൊണ്ടു നടന്നു. ഒടുവില്‍ 76 അര്‍ധ സൈനികര്‍ കൊല്ലപ്പെട്ടപ്പോള്‍ ഹുങ്ക് നിലത്ത് വീണുടഞ്ഞു. ഇന്റലിജന്‍സ് സംവിധാനങ്ങളുടെ ദയനീയ പരാജയം ഉച്ചത്തില്‍ വിളിച്ചറിയിക്കപ്പെട്ടു.
മൂന്ന് ദിവസം തലപുകഞ്ഞാലോചിച്ചു. നാലാം നാള്‍ രാവിലെ പോംവഴി ബുദ്ധിരാക്ഷസന് തെളിഞ്ഞുകിട്ടി. വീഴ്ചയുടെ സര്‍വ്വ ഉത്തരവാദിത്വവും താന്‍ ഏറ്റെടുക്കുന്നതായി പരസ്യ പ്രഖ്യാപനം നടത്തി. പ്രധാനമന്ത്രിക്കും സോണിയാഗാന്ധിക്കും രാജിക്കത്ത് നല്‍കിയതായി രഹസ്യ പ്രഖ്യാപനവും നടത്തി. ചാനലുകാര്‍ ആഘോഷിച്ചു. പക്ഷേ ആഘോഷത്തിന് നിമിഷങ്ങളുടെ ആയുസ്സേയുണ്ടായുള്ളു. പ്രധാനമന്ത്രിയും കോണ്‍ഗ്രസ് അധ്യക്ഷയും രാജിക്കത്ത് നിര്‍ദ്ദയം കീറിക്കളഞ്ഞത്രേ, രാജി നല്‍കിയത് ആരും കണ്ടില്ല. കീറിയെറിഞ്ഞതും ആരും കണ്ടില്ല. എല്ലാം കണ്ടതും അറിഞ്ഞതും ചിദംബരം മാത്രം. അറിയിച്ചതും അദ്ദേഹം തന്നെ. ”ആറ്റിലേയ്ക്കച്യുതാ, ചാടല്ലേ, ചാടല്ലേ കാട്ടിലെ പൊയ്കയല്‍ പോയി നീന്താം” എന്ന് മന്‍മോഹന്‍ ചിദംബരത്തിന്റെ ചെവിയില്‍ മന്ത്രിച്ചുപോലും. മാലോകരെ കുടുകുടാ ചിരിപ്പിക്കുന്ന ഓരോരോ രാജി തമാശകള്‍. വിശക്കുന്നവരെയും പട്ടിണിക്കാരെയും ചിരിപ്പിക്കുന്നതിലും ചിദംബരത്തിന്റെയും കോണ്‍ഗ്രസിന്റെയും സംഭാവനകള്‍ പെരുത്തത് തന്നെ.

Posted in ലേഖനം | Leave a Comment »

ആദിവാസി ക്ഷേമവും വനസംരക്ഷണവും – ബിനോയ് വിശ്വം

Posted by ജനയുഗം വാര്‍ത്തകള്‍ on ഏപ്രില്‍ 14, 2010

ആദിവാസി ക്ഷേമവും വനസംരക്ഷണവും 

ബിനോയ് വിശ്വം

വനവുമായി ഏറ്റവുമധികം ബന്ധമുള്ള ജനസമൂഹമാണ് ആദിവാസികള്‍. അവരുടെ ഉപജീവനം വനവുമായി ബന്ധപ്പെട്ടതാണ്. അതുകൊണ്ട് തന്നെ ആദിവാസിക്ഷേമം വനംവകുപ്പിന്റെ മുഖ്യധാരാ പ്രവര്‍ത്തനമായി കണ്ടുകൊണ്ടുള്ള നടപടികളാണ് ഇന്ന് വനംവകുപ്പ് സ്വീകരിച്ചിട്ടുള്ളത്. ആദിവാസികള്‍ക്കായുള്ള ഒറ്റപ്പെട്ട പ്രവര്‍ത്തനങ്ങള്‍ എന്ന ശൈലി മാറ്റി ആദിവാസി ഊരുകള്‍ കേന്ദ്രീകരിച്ച് സംയോജിത വികസന പ്രവര്‍ത്തനങ്ങള്‍ക്കാണ് ഇപ്പോള്‍ വനം വകുപ്പ് ഊന്നല്‍ നല്‍കുന്നത്. പങ്കാളിത്ത വനപരിപാലന പ്രവര്‍ത്തനങ്ങളുടെ ഭാഗമായി വനത്തിനുള്ളിലെ ഏതാണ്ട് എഴുന്നൂറോളം വരുന്ന ആദിവാസി ഊരുകള്‍ കേന്ദ്രീകരിച്ച് സൂക്ഷ്മാസൂത്രണ രേഖകള്‍ തയ്യാറാക്കിക്കഴിഞ്ഞു. ഇതിന്റെ അടിസ്ഥാനത്തില്‍ ആദിവാസി ഊരുകള്‍ കേന്ദ്രീകരിച്ച് 68 വന സംരക്ഷണ സമിതികളും ഇരുനൂറ് ഇക്കോ ഡവലപ്‌മെന്റ് കമ്മിറ്റികളും വികസന പ്രവര്‍ത്തനങ്ങള്‍ക്ക് നേതൃത്വം നല്‍കുന്നു. പാര്‍പ്പിടം, ഭക്ഷണം, ആരോഗ്യം, തൊഴില്‍ തുടങ്ങിയ അടിസ്ഥാന മേഖലകള്‍ കേന്ദ്രീകരിച്ചാണ് വികസന രേഖകള്‍ തയ്യാറാക്കിയിട്ടുള്ളത്. വളരെ കൂടുതല്‍ ആദിവാസി ഊരുകള്‍ സ്ഥിതിചെയ്യുന്ന വന്യജീവി സങ്കേതങ്ങളായ നെയ്യാര്‍, പേപ്പാറ, പെരിയാര്‍ ടൈഗര്‍ റിസര്‍വ്, പീച്ചി, വയനാട്, പറമ്പിക്കുളം എന്നിവിടങ്ങളില്‍ വനം വകുപ്പിന്റെ നേതൃത്വത്തിലുള്ള പ്രവര്‍ത്തനങ്ങള്‍ ഇതിനകം ശ്രദ്ധനേടിക്കഴിഞ്ഞു.
ആദിവാസികളുടെ പാര്‍പ്പിട പ്രശ്‌നം പരിഹരിക്കുന്നതില്‍ ഒരു പ്രധാന ഘടകം തടിയുടെ ലഭ്യതയില്ലായ്മയായിരുന്നു. വനാശ്രിത ജനതയുടെ ഈ പ്രധാന പ്രശ്‌നത്തിന് ശാശ്വതപരിഹാരം കാണുവാനുള്ള സൃഷ്ടിപരമായ നടപടിയാണ് ഈ സര്‍ക്കാര്‍ കൈക്കൊണ്ടത്. ഇ എം എസ് ഭവന പദ്ധതി, എം എന്‍ ലക്ഷംവീട് പുനര്‍നിര്‍മാണ പദ്ധതി, വനാവകാശ നിയമം എന്നിവയുടെ പരിധിയില്‍ വരുന്ന പട്ടികവര്‍ഗ കുടുംബങ്ങള്‍ക്ക് ഭവനനിര്‍മാണത്തിന് സര്‍ക്കാര്‍ തടി ഡിപ്പോയില്‍ നിന്ന് സൗജന്യമായി തടി ലഭ്യമാക്കുന്ന സംരംഭത്തിന് ഇന്ന്തുടക്കം കുറിക്കുകയാണ്. പാവങ്ങള്‍ക്കുവേണ്ടിയുള്ള ഈ പദ്ധതിയില്‍ പ്ലാവ്, ആഞ്ഞിലി, മരുത്, ഇരുള്‍, ചടച്ചി എന്നീ ഇനങ്ങളില്‍പ്പെട്ട തടി സൗജന്യമായി നല്‍കും.
സെറ്റില്‍മെന്റുകളില്‍ വസിക്കുന്ന ആദിവാസി കുടുംബങ്ങള്‍ക്ക് വീട് നിര്‍മിക്കാന്‍ സീനിയറേജ് വിലയുടെ 25 ശതമാനം മാത്രം ഈടാക്കി തടി ലഭ്യമാക്കുന്നതിനും ഇതിനകം സര്‍ക്കാര്‍ നടപടിയെടുത്തു. ഇതനുസരിച്ച് സെറ്റില്‍മെന്റിന് സമീപമുള്ള റിസര്‍വ് വനത്തിലെ ഉണങ്ങിയതും കാറ്റില്‍ വീണതുമായ ഒന്നര ക്യുബിക് മീറ്റര്‍ അളവില്‍ തടിയാണ് നല്‍കുന്നത്. ആദിവാസി സമൂഹത്തിന്റെ പ്രധാന ജീവനോപാധിയായ ഈറ്റയും മുളയും നാമമാത്ര വില ഈടാക്കി നല്‍കി വരുന്നു. ഓരോ ആദിവാസി കുടുംബത്തിനും ആഴ്ചയില്‍ രണ്ട് തലച്ചുമട് ഈറ്റയും പൂര്‍ണവളര്‍ച്ചയെത്തിയ അഞ്ച് മുളകളുമാണ് നല്‍കുന്നത്.
കൃഷി ഉപജീവനമായി സ്വീകരിച്ചിട്ടുള്ള ആദിവാസികളുടെ പരമ്പരാഗത ജൈവകൃഷി പ്രോത്സാഹിപ്പിക്കുന്നതില്‍ പുതിയ മാതൃക സൃഷ്ടിക്കാന്‍ നമുക്ക് കഴിഞ്ഞു. പെരിയാര്‍ വന്യജീവി സങ്കേതത്തിലെ വഞ്ചിവയല്‍ ഇക്കോ ഡവലപ്‌മെന്റ് കമ്മിറ്റിയും പെരിയാര്‍ ഫൗണ്ടേഷനും ചേര്‍ന്ന് ഉല്‍പാദിപ്പിച്ച നാല് ടണ്‍ കുരുമുളക് ജര്‍മനിയിലേക്ക് കയറ്റി അയച്ചാണ് മാതൃകയായത്. ആദിവാസികളുടെ ജൈവ ഉല്‍പന്നം ലോകവിപണിയില്‍ എത്തിച്ച മാതൃക മറ്റ് സെറ്റില്‍മെന്റുകളിലേക്കും വ്യാപിപ്പിക്കുന്നതിനുള്ള സാധ്യതകള്‍ കണ്ടെത്താന്‍ ശ്രമിക്കുകയാണ് വനം വകുപ്പ്.
വനമേഖലയിലെ തൊഴിലാളികളുടെ വേതനം 30 ശതമാനം കണ്ട് വര്‍ധിപ്പിക്കാന്‍ ഈ സര്‍ക്കാര്‍ നടപടിയെടത്തു. തുഛമായ വരുമാനം മാത്രമുണ്ടായിരുന്ന തൊഴിലാളികള്‍ക്ക് ഈ വര്‍ധന ഏറെ ആശ്വാസമായി. വന്യജീവി സങ്കേതങ്ങള്‍ ഉള്‍പ്പെടെയുള്ള വനപ്രദേശങ്ങളിലെ പരമാവധി തൊഴിലുകള്‍ ആദിവാസികള്‍ക്കാണ് ലഭ്യമാകുന്നത്. കാട്ടുതീ സംരക്ഷണ പ്രവര്‍ത്തനത്തിലും വന്യജീവി സങ്കേതങ്ങളിലെ സംരക്ഷണ മസ്ദൂര്‍മാരുടെ നിയമനത്തിലും ഇത് കര്‍ശനമായി പാലിക്കുന്നു.
കാടിനുള്ളില്‍ താമസിക്കുന്ന എല്ലാ ആദിവാസികള്‍ക്കും പട്ടികജാതിക്കാര്‍ക്കും വനം വകുപ്പ് ഇന്‍ഷ്വറന്‍സ് പരിരക്ഷ ഏര്‍പ്പാടാക്കിയിട്ടുണ്ട്. യുണൈറ്റഡ് ഇന്ത്യാ ഇന്‍ഷ്വറന്‍സ് കമ്പനിയുമായി ചേര്‍ന്ന് നടപ്പാക്കിയ ഈ പദ്ധതി പ്രകാരം അപകടമരണം സംഭവിച്ചാല്‍ ഒരു ലക്ഷം രൂപ വരെ ലഭിക്കും. പ്രകൃതിക്ഷോഭം, കാട്ടുമൃഗങ്ങളുടെ ആക്രമണം എന്നിവ മൂലം വീട് നഷ്ടപ്പെടുന്നവര്‍ക്ക് 5000 രൂപ വരെ ഇന്‍ഷ്വറന്‍സ് പരിരക്ഷയുണ്ട്. രോഗം മൂലമോ അപകടം മൂലമോ ആശുപത്രി ചികിത്സവേണ്ടിവന്നാല്‍ ആയിരം രൂപയും യാത്രാച്ചെലവിന് 500 രൂപയും ലഭ്യമാക്കും.
ആദിവാസി സെറ്റില്‍മെന്റുകളുടെ വൈദ്യുതീകരണത്തിനുള്ള വിവിധ പദ്ധതികള്‍ വനം വകുപ്പ് നടപ്പാക്കിയിട്ടുണ്ട്. വിവിധ ഡിവിഷനുകളിലെ സെറ്റില്‍മെന്റുകളുടെ വൈദ്യുതീകരണത്തിന് ആവശ്യമായ വനഭൂമി വനസംരക്ഷണ നിയമപ്രകാരം നല്‍കുകയും വൈദ്യുതീകരണ പദ്ധതികള്‍ക്ക് അംഗീകാരം നല്‍കുകയും ചെയ്തിട്ടുണ്ട്. തേക്കടിയിലെ മുന്നൂറില്‍പരം ആദിവാസി വീടുകള്‍ പൂര്‍ണമായും വൈദ്യുതീകരിക്കുന്ന ഒരു പദ്ധതി പട്ടികവര്‍ഗ വികസന വകുപ്പിന്റെ സഹായത്തോടെ നടപ്പാക്കിവരുന്നു.
സംസ്ഥാനത്തിന്റെ വിവിധ ഭാഗങ്ങളിലുള്ള ആദിവാസി കോളനികളില്‍ നിരവധി കുടിവെള്ള പദ്ധതികളാണ് വനംവകുപ്പ് നടപ്പാക്കിയിട്ടുള്ളത്. വടക്കേ വയനാട് ഡിവിഷനിലെ മംഗലശേരി, താഴെ മംഗലശേരി, കോളങ്ങോട് പാണിയ, തലപ്പുഴപൊയില്‍, തിരുനെല്ലികലുഗാഡി തുടങ്ങിയ കോളനികളില്‍ കുടിവെള്ള പദ്ധതികള്‍ നടപ്പാക്കി. തെക്കെ വയനാട് ഡിവിഷനിലെ 73 കോളനികളിലേക്കുള്ള പദ്ധതികള്‍ക്ക് അനുമതി നല്‍കി. റാന്നി, കണ്ണൂര്‍, അച്ചന്‍കോവില്‍, കോന്നി തുടങ്ങിയ ഡിവിഷനുകളിലേക്കും നിരവധി കോളനികളില്‍ ജലസംഭരണികള്‍ നിര്‍മ്മിക്കുകയും കുടിവെള്ള വിതരണ പദ്ധതികള്‍ നടപ്പാക്കുകയും ചെയ്തിട്ടുണ്ട്. ചിന്നാര്‍ വന്യജീവിസങ്കേതത്തിലെ ചമ്പക്കാട്ട് പട്ടികജാതി-പട്ടികവര്‍ഗ വികസന ഫണ്ടില്‍ നിന്നും 12.50 ലക്ഷം രൂപയുടെ കുടിവെള്ള-ജലസേചന പദ്ധതി നടപ്പാക്കി.
ആദിവാസി ക്ഷേമപ്രവര്‍ത്തനങ്ങളുടെ ഭാഗമായി ആദിവാസി ഊരുകളിലേക്ക് റോഡ് നിര്‍മാണങ്ങളും അറ്റകുറ്റപ്പണികളും വനംവകുപ്പ് നടപ്പാക്കുന്നുണ്ട്. നബാര്‍ഡിന്റെ സാമ്പത്തിക സഹായത്തോടെ അട്ടപ്പാടിയിലെ ആനവായി കോളനിയിലേക്കുള്ള 2.4 കിലോമീറ്റര്‍ റോഡ് വികസനം 60 ലക്ഷം രൂപ ചെലവിലാണ് നടപ്പിലാക്കിയത്. വയനാട് പാക്കം കുറുവ-പന്നിക്കല്‍ 4.16 കിലോമീറ്റര്‍ റോഡ് 64 ലക്ഷം രൂപ ചെലവിലും ഉദയക്കര-ചേകാടി 4.15 കിലോമീറ്റര്‍ റോഡ് 61 ലക്ഷം രൂപ ചെലവിലും നിര്‍മിച്ചു. സംസ്ഥാനത്തിന്റെ വിവിധ ഭാഗങ്ങളിലായി 20 ലധികം വനപാതകള്‍ നവീകരിക്കുന്നതിന് അനുമതി നല്‍കി. റാന്നി ഡിവിഷനിലെ കുറുമ്പം മൂഴി കോസ്വേകോളനി, മലയാറ്റൂര്‍ ഡിവിഷനിലെ മണികണ്ഠന്‍ചാല്‍-തിണ്ണക്കുത്തു, തിരുവനന്തപുരം ഡിവിഷനിലെ വിട്ടിക്കാവ്-മുത്തിപ്പാറകൂപ്പ് എന്നീ റോഡുകള്‍ക്ക് അനുമതി നല്‍കി.
അടിസ്ഥാന ഘടകങ്ങളില്‍ പ്രധാനമായ ആരോഗ്യ സംരക്ഷണം ആദിവാസികളെ സംബന്ധിച്ചിടത്തോളം ഒരു പ്രശ്‌നമായി പലപ്പോഴും കാണാറുണ്ട്. വനാന്തര്‍ഭാഗത്തെ സെറ്റില്‍മെന്റുകളില്‍ യഥാസമയം വൈദ്യസഹായം ലഭിക്കാത്തതുമൂലം അപകടങ്ങള്‍ ഉണ്ടാവുന്നത് വനം വകുപ്പിന്റെ ശ്രദ്ധയില്‍പ്പെട്ടിട്ടുണ്ട്. ഇതിനു പരിഹാരമെന്നോണമാണ് സെറ്റില്‍മെന്റുകള്‍ കേന്ദ്രീകരിച്ച് മെഡിക്കല്‍ ക്യാമ്പുകള്‍ സംഘടിപ്പിക്കുന്നത്. ഓരോ വര്‍ഷവും ഏതാണ്ട് നൂറോളം ക്യാമ്പുകള്‍ സംഘടിപ്പിക്കുന്നുണ്ട്. ഈ വര്‍ഷം വിവിധ ഡിവിഷനുകളിലായി നൂറിലധികം ക്യാമ്പുകള്‍ക്ക് പദ്ധതി തയ്യാറാക്കിയിട്ടുണ്ട്. വി എസ് എസ്, ഇ ഡി സി എന്നിവയുടെ ഫണ്ട് ഉപയോഗിച്ച് തുടര്‍ ചികിത്സയ്ക്കുള്ള സൗകര്യങ്ങളും ഏര്‍പ്പാടാക്കിയിട്ടുണ്ട്.
ലഘുവനവിഭവശേഖരണവും സംസ്‌ക്കരണവും വിപണനവും ആദിവാസികളുടെ ജീവനോപാധിക്കുള്ള പ്രധാനമാര്‍ഗമാണ്. ജൈവവൈവിധ്യ സംരക്ഷണത്തിനുള്ള ഉത്തരവാദിത്തവും വനാവകാശനിയമം ആദിവാസികള്‍ക്ക് നല്‍കുന്നുണ്ട്. 
ലഘുവനവിഭവങ്ങളുടെ സുസ്ഥിര പരിപാലനം, ശാസ്ത്രീയശേഖരണം, മൂല്യവര്‍ധന, വിപണനം എന്നിവയ്ക്കായി വനവികാസ ഏജന്‍സികള്‍ വഴി റെയ്ഞ്ചുതലത്തില്‍ വിഭവഭൂപടവും സൂക്ഷ്മാസൂത്രണ രേഖയും തയ്യാറാക്കിവരികയാണ്. ഈ രംഗത്ത് വനവികാസ ഏജന്‍സികളുടെ പ്രവര്‍ത്തനങ്ങള്‍ ഏകോപിപ്പിക്കുക, സംസ്‌കരണ സംവിധാനം ഏര്‍പ്പെടുത്തുക, വിപണന സൗകര്യമൊരുക്കുക, വിപണന മേളകള്‍ സംഘടിപ്പിക്കുക തുടങ്ങിയ കാര്യങ്ങള്‍ക്കായി സംസ്ഥാനതലത്തില്‍ ‘വനശ്രീ’ തുടങ്ങാന്‍ തീരുമാനിച്ചിട്ടുണ്ട്. വനംവകുപ്പ് ആസ്ഥാനത്ത് വനശ്രീയുടെ ഒരു സെല്‍ രൂപീകരിക്കാനുള്ള പ്രാരംഭപ്രവര്‍ത്തനങ്ങള്‍ നടന്നുവരുന്നു.
വനങ്ങളുടെ സ്വാഭാവികരീതികള്‍ക്ക് പോറലേല്‍ക്കാതെ സംരക്ഷിത വനമേഖലകള്‍ പൊതുജന പങ്കാളിത്തത്തോടെ പരിപാലിക്കുകയും അവ പൊതുജനങ്ങള്‍ക്ക് കാണാന്‍ അവസരമൊരുക്കുകയും ചെയ്യുന്ന ഇക്കോടൂറിസം പദ്ധതികള്‍ ഇതിനകം ശ്രദ്ധയാകര്‍ഷിച്ചിട്ടുണ്ട്. ഇക്കോടൂറിസം കേന്ദ്രങ്ങള്‍ ഭൂരിപക്ഷവും വനപ്രദേശത്തായതിനാല്‍ ഇതിന്റെ പ്രയോജനം മുഖ്യമായും ലഭിക്കുന്നത് ആദിവാസികള്‍ക്കാണ് എന്നതിനാലാണ് സര്‍ക്കാര്‍ ഈ പദ്ധതികളെ പ്രോത്സാഹിപ്പിക്കുന്നത്. അനുമതി നല്‍കിയ 56 പദ്ധതികളില്‍ പകുതിയിലധികം ഇതിനകം പ്രവര്‍ത്തനമാരംഭിച്ചുകഴിഞ്ഞു. നെയ്യാര്‍, തേക്കടി, വയനാട്, പറമ്പിക്കുളം തുടങ്ങിയ വന്യജീവി സങ്കേതങ്ങളിലെ ഇക്കോടൂറിസം പദ്ധതികളില്‍ നൂറുകണക്കിന് ആദിവാസികള്‍ക്ക് തൊഴില്‍ ലഭിക്കുന്നു.
ആദിവാസികള്‍ക്ക് വീടുകള്‍ നിര്‍മിച്ചുനല്‍കുന്ന പദ്ധതി ഉള്‍പ്പെടെ ആദിവാസിക്ഷേമം ഉറപ്പാക്കാനുള്ള പ്രതിജ്ഞാബദ്ധതയോടെയുള്ള നടപടികളാണ് വനം വകുപ്പ് നടപ്പാക്കിവരുന്നത്. പറമ്പിക്കുളം കടുവസങ്കേതത്തില്‍ ആദിവാസികള്‍ക്കായി 52 വീടുകള്‍ പൂര്‍ത്തിയാക്കി. മറ്റ് ആദിവാസി ഊരുകളിലേക്കും പദ്ധതി വ്യാപിപ്പിക്കാന്‍ തീരുമാനിച്ചിട്ടുണ്ട്. വനാന്തര്‍ഭാഗത്തുള്ള ആദിവാസികളുടെ സമഗ്രവികസനത്തിനായി പട്ടികവര്‍ഗവികസന വകുപ്പുമായി ചേര്‍ന്ന് പ്രത്യേക പദ്ധതികള്‍ക്ക് രൂപം നല്‍കിവരികയാണ്. പങ്കാളിത്ത വനപരിപാലനം ലക്ഷ്യമാക്കി വനസംരക്ഷണ സമിതികള്‍ വഴി വനവികാസ ഏജന്‍സികളുടെ മേല്‍നോട്ടത്തിലാവും പദ്ധതി. കൃഷിയുടെ വികസനം, വന്യമൃഗങ്ങളുടെ ആക്രമണങ്ങളില്‍നിന്നും കൃഷിയുടെ സംരക്ഷണം, കടക്കെണിയില്‍ നിന്നും ആദിവാസികളെ മോചിപ്പിക്കാനായി റിവോള്‍വിംഗ് ഫണ്ട് സ്ഥാപിക്കല്‍, മണ്ണ്-ജല സംരക്ഷണം, സ്ത്രീ ശാക്തീകരണം എന്നിവ പദ്ധതിയില്‍പ്പെടും. വനങ്ങളുടെ സംരക്ഷണവും പരിപാലനവും വനാശ്രീത സമൂഹത്തിന്റെ പങ്കാളിത്തത്തോടെ മാത്രമേ നടപ്പാകൂ എന്നുള്ളതിലുപരി കാടിന്റെ അവകാശികളായ അവരുടെ ക്ഷേമം ഉറപ്പാക്കേണ്ടത് പ്രകൃതിയോടുള്ള കടപ്പാടിന്റെ ഭാഗമാണ്.

Posted in ലേഖനം | Tagged: | Leave a Comment »

ഉമാഭാരതിയുടെ തിരിച്ചുവരവ്: ബി ജെ പിയില്‍ പ്രതിസന്ധി – എല്‍ എസ് ഹര്‍ദേനിയ

Posted by ജനയുഗം വാര്‍ത്തകള്‍ on ഏപ്രില്‍ 14, 2010

ഉമാഭാരതിയുടെ തിരിച്ചുവരവ്: ബി ജെ പിയില്‍ പ്രതിസന്ധി

 എല്‍ എസ് ഹര്‍ദേനിയ

മധ്യപ്രദേശിലെ ബി ജെ പി ഘടകവും സംസ്ഥാന സര്‍ക്കാരും പ്രതിസന്ധിയിലായി. ഉമാഭാരതിയെ ബി ജെ പി യില്‍ തിരിച്ചെടുക്കാന്‍ ബി ജെ പി പ്രസിഡന്റ് നിതിന്‍ ഗഡ്കാരി നടത്തുന്ന നീക്കമാണ് സംഘടനാതലത്തില്‍ പ്രതിസന്ധി സൃഷ്ടിച്ചിരിക്കുന്നത്. ഉമാഭാരതിയെ തിരിച്ചെടുത്താല്‍ സ്ഥാനമൊഴിയുമെന്നു  മുഖ്യമന്ത്രി ശിവരാജ്‌സിംഗ് ചൗഹാന്‍ ഭീഷണിപ്പെടുത്തിയതില്‍ നിന്നു പ്രതിസന്ധിയുടെ ആഴം വ്യക്തമാണ്.
ഭാരതീയ ജനശക്തിയില്‍നിന്നും താന്‍ രാജിവെക്കുന്നതായി മാര്‍ച്ച് 25 നാണ് ഉമാഭാരതി പ്രഖ്യാപിച്ചത്. ബി ജെ പിയില്‍ നിന്നും പുറത്തുവന്നശേഷം ഉമാഭാരതി രൂപം നല്‍കിയ പാര്‍ട്ടിയാണ് ഭാരതീയ ജനശക്തി. പാര്‍ട്ടിയുടെ പ്രസിഡന്റും ഉമാഭാരതിയാണ്. കഴിഞ്ഞ നിയമസഭാ-ലോക്‌സഭാ തിരഞ്ഞെടുപ്പുകളിലും ചില ഉപ തിരഞ്ഞെടുപ്പുകളിലും പാര്‍ട്ടി സ്ഥാനാര്‍ഥികളെ നിര്‍ത്തിയിരുന്നു. തിരഞ്ഞെടുപ്പില്‍ കാര്യമായ നേട്ടമുണ്ടാക്കാന്‍ കഴിഞ്ഞില്ലെങ്കിലും ചില മണ്ഡലങ്ങളില്‍ ബി ജെ പിയുടെ പരാജയം ഉറപ്പാക്കാന്‍ അവര്‍ക്ക് കഴിഞ്ഞിരുന്നു. സ്വന്തം പാര്‍ട്ടിയില്‍ നിന്നും ഉമാഭാരതി രാജിവെച്ചത് ബി ജെ പിയില്‍ തിരിച്ചുവരുന്നതിന്റെ മുന്നോടിയാണെന്ന് വ്യക്തമായിരുന്നു. നിതിന്‍ ഗഡ്കാരി ബി ജെ പി പ്രസിഡന്റ് സ്ഥാനം ഏറ്റശേഷം ഗോവിന്ദാചാര്യ, ഉമാഭാരതി തുടങ്ങി പാര്‍ട്ടിയില്‍ നിന്നും പുറത്തുപോയവരെ തിരിച്ചുകൊണ്ടുവരാന്‍ ശ്രമം നടത്തിവരികയായിരുന്നു. ഗോവിന്ദാചാര്യ ”രാഷ്ട്രീയ സ്വാഭിമാന്‍ അന്തോള”നില്‍ നിന്നും ഏതാനും ദിവസം മുമ്പ് രാജിവെച്ചിരുന്നു. ബി ജെ പിയില്‍ നിന്നും പുറത്തായശേഷം ഗോവിന്ദാചാര്യ രൂപം നല്‍കിയ സംഘടനയാണ് രാഷ്ട്രീയ സ്വാഭിമാന്‍ ആന്തോളന്‍. അതിന്റെ കണ്‍വീനര്‍ ഗോവിന്ദാചാര്യയാണ്. സംഘടനയുടെ ഭോപ്പാലില്‍ നടന്ന യോഗത്തില്‍വെച്ചാണ് ഗോവിന്ദാചാര്യ രാജി പ്രഖ്യാപിച്ചത്. ഉമാഭാരതിയുടെ മാര്‍ഗനിര്‍ദേശകനായാണ് ഗോവിന്ദാചാര്യ അറിയപ്പെടുന്നത്. അദ്ദേഹം ബി ജെ പിയിലേക്ക് തിരിച്ചുവരുമ്പോള്‍ ഒപ്പം ഉമാഭാരതിയുമുണ്ടാകുമെന്നാണ് പൊതുവേയുള്ള ധാരണ.
എന്നാല്‍ ഉമാഭാരതിയുടെ പുനപ്രവേശനത്തെ ശക്തമായി എതിര്‍ക്കാനാണ് ബി ജെ പി സംസ്ഥാന ഘടകത്തിന്റെ തീരുമാനം. ഉമാഭാരതി തിരിച്ചുവന്നാല്‍ ബി ജെ പിയുടെ സംസ്ഥാന ഘടകത്തില്‍ തമ്മിലടിക്ക് വഴിതുറക്കുമെന്ന് നേതാക്കന്മാര്‍ ചൂണ്ടിക്കാണിക്കുന്നു. തിരിച്ചുവരുമ്പോള്‍ ഉമാഭാരതിക്ക് പ്രധാനപ്പെട്ട ചുമതല നല്‍കേണ്ടിവരും. തന്നെ പീഡിപ്പിക്കുകയും പാര്‍ട്ടിയില്‍ നിന്ന് പുറത്തുപോകാന്‍ നിര്‍ബന്ധിതമാക്കുകയും ചെയ്ത നേതാക്കന്മാര്‍ക്കെതിരെ പ്രതികാരവാഞ്ഛയോടെയായിരിക്കും ഉമാഭാരതി പെരുമാറുകയെന്നതില്‍ സംസ്ഥാന നേതാക്കന്മാര്‍ക്ക് സംശയമില്ല.
എല്‍ കെ അദ്വാനിയും എ ബി വാജ്‌പേയിയും ഉള്‍പ്പെടെയുള്ള പ്രമുഖ നേതാക്കന്മാരെ പരസ്യമായി അവഹേളിക്കുകയും അവര്‍ക്കെതിരെ ഗുരുതരമായ ആരോപണങ്ങള്‍ ഉന്നയിക്കുകയും ചെയ്തതിന് പരസ്യമായി മാപ്പു പറയാതെ ഉമാഭാരതിയെ തിരിച്ചെടുക്കരുതെന്നാണ് ഭൂരിപക്ഷം നേതാക്കന്മാരുടെയും അഭിപ്രായം. അഴിമതിക്കാരുടെയും അവസരവാദികളുടെയും പാര്‍ട്ടിയായാണ് ബി ജെ പിയെ ഉമാഭാരതി വിശേഷിപ്പിച്ചത്. ദേശീയ വിരുദ്ധര്‍പോലും ബി ജെ പിയില്‍ നുഴഞ്ഞുകയറിയതായി അവര്‍ ആരോപിച്ചിരുന്നു. ഉമാഭാരതിയുടെ ആക്രമണങ്ങളുടെ ഒരു പ്രധാന ഇര മുഖ്യമന്ത്രി ശിവരാജ്‌സിംഗ് ചൗഹാനായിരുന്നു.
ഉമാഭാരതിയെ തിരിച്ചെടുക്കണമെന്നതില്‍ നിതിന്‍ ഗഡ്കാരി ഉറച്ചുനിന്നാല്‍ ബി ജെ പിയുടെ സംസ്ഥാന ഘടകം കുഴപ്പത്തിലാകുമെന്ന കാര്യം തീര്‍ച്ചയാണ്.
ഭരണതലത്തില്‍ സമീപ നാളുകളിലെടുത്ത ചില തീരുമാനങ്ങള്‍ വ്യാപകമായ പ്രതിഷേധത്തിനും എതിര്‍പ്പിനും വഴിവെച്ചിട്ടുണ്ട്. പാല്‍വില ലിറ്ററിന് രണ്ടു രൂപ വര്‍ധിപ്പിക്കാന്‍ എടുത്ത തീരുമാനമാണ് ഇതില്‍ ഒന്ന്. ഭോപ്പാല്‍ മുനിസിപ്പല്‍ കോര്‍പ്പറേഷന്‍ കുടിവെള്ള ചാര്‍ജ് മൂന്നിരട്ടി വര്‍ധിപ്പിച്ചതാണ് മറ്റൊന്ന്. ബി ജെ പിയാണ് ഭോപ്പാല്‍ മുനിസിപ്പല്‍ കോര്‍പ്പറേഷന്‍ ഭരിക്കുന്നത്. മുന്‍ മുഖ്യമന്ത്രി ബാബുലാല്‍ ഗൗറിന്റെ മകന്റെ ഭാര്യ കൃഷ്ണഗൗറാണ് കോര്‍പ്പറേഷന്‍ മേയര്‍.
കുടിവെള്ള ചാര്‍ജ് വര്‍ധിപ്പിച്ചതിനെതിരെ ഭോപ്പാലില്‍ ജനങ്ങള്‍ സമരത്തിലാണ്.
ഭീകരപ്രവര്‍ത്തനം നേരിടാനെന്ന പേരില്‍ സംസ്ഥാന സര്‍ക്കാര്‍ കൊണ്ടുവന്ന കരിനിയമവും വ്യാപകമായ പ്രതിഷേധത്തിനു വഴിവെച്ചിട്ടുണ്ട്. ഗുജറാത്ത് സര്‍ക്കാര്‍ രൂപം നല്‍കിയ നിയമത്തിന്റെ മാതൃകയിലുള്ള ഈ നിയമം വ്യാപകമായ പൗരാവകാശ ലംഘനത്തിനു വഴിയൊരുക്കും. ന്യൂനപക്ഷങ്ങളെ പീഡിപ്പിക്കാനായിരിക്കും ഈ നിയമം ബി ജെ പി സര്‍ക്കാര്‍ ഉപയോഗിക്കുകയെന്ന ഭീതി പരന്നിട്ടുണ്ട്.
സംസ്ഥാന സര്‍ക്കാരിന്റെ ഇത്തരം നടപടികള്‍ക്ക് എതിരെ ജനങ്ങളുടെ പ്രതിഷേധം ഉയരുന്നതിനിടയിലാണ് മന്ത്രിമാരുടെയും എം എല്‍ എമാരുടെയുമെല്ലാം ശമ്പളവും അലവന്‍സും കുത്തനെ കൂട്ടാന്‍ സര്‍ക്കാര്‍ തീരുമാനിച്ചത്. ഇതു സംബന്ധിച്ച ബില്‍ ചര്‍ച്ച കൂടാതെ നിയമസഭ പാസാക്കുകയും ചെയ്തു. ഇതോടെ രാജ്യത്ത് ഏറ്റവും കൂടുതല്‍ ശമ്പളവും അലവന്‍സും ലഭിക്കുന്ന നിയമസഭാ സാമാജികര്‍ മധ്യപ്രദേശിലായിരിക്കും.

Posted in ലേഖനം | Tagged: | Leave a Comment »

ജയില്‍ നിയമം: കാലാനുസൃതമായ ചുവടു വയ്പ്പ് – കോടിയേരി ബാലകൃഷ്ണന്‍

Posted by ജനയുഗം വാര്‍ത്തകള്‍ on ഏപ്രില്‍ 14, 2010

ജയില്‍ നിയമം: കാലാനുസൃതമായ ചുവടു വയ്പ്പ്

കോടിയേരി ബാലകൃഷ്ണന്‍

തട­വ­റ­കള്‍ എക്കാ­ലവും പൊ­തു­സ­മൂ­ഹ­ത്തില്‍ നിന്നും വള­രെ അകന്നു നില്‍ക്കുന്ന സ്ഥാ­പ­ന­ങ്ങ­ളാ­ണ്. നിഷ്ഠൂ­ര­ന്മാരും വെറു­ക്ക­പ്പെ­ട്ട­വ­രു­മായ കുറ്റ­വാ­ളി­കളെ ശിക്ഷ­യുടെ ഭാഗ­മായി പാര്‍പ്പി­ക്കുന്ന നിഗൂഢ സ്വഭാ­വ­മുള്ള ചില കേന്ദ്ര­ങ്ങ­ളാ­യാ­ണ് നമ്മുടെ സാഹിത്യകൃതി­ക­ളിലും മറ്റും ജയി­ലു­കളെ അവ­ത­രി­പ്പി­ച്ചി­ട്ടു­ള്ള­ത്.
നമ്മുടെ രാജ്യത്തെ ജയി­ലു­ക­ളുടെ പൊതു­സ്ഥിതി വളരെ ദയ­നീ­യ­മാ­ണെന്ന് ഇത് സംബ­ന്ധിച്ച് പഠനം നട­ത്തിയ കമ്മി­ഷ­നു­കളും വ്യക്തി­കളും റി­പ്പോ­ര്‍ട്ട് ചെയ്തി­ട്ടു­ണ്ട്. അടി­യ­ന്ത­രാ­വ­സ്ഥ­ക്കാ­ലത്തെ അതി­ക്ര­മ­ങ്ങ­ളെ­ക്കു­റിച്ച് അന്വേ­ഷിച്ച ഷാ കമ്മി­ഷനും ഇന്ത്യന്‍ ജയി­ലു­ക­ളുടെ ശോച്യാ­വസ്ഥ വിവ­രി­ക്കു­ന്നു. ജസ്റ്റിസ് വി ആര്‍ കൃ­ഷ്ണ­യ്യര്‍ ജയില്‍ മന്ത്രി­യായ കാലത്ത് തയ്യാ­റാ­ക്കിയ 1958 ലെ കേരള പ്രിസണ്‍സ് റൂള്‍സ് അനു­സ­രി­ച്ചാണ് കേര­ള­ത്തില്‍ ജയി­ലു­ക­ളുടെ ഭരണം നടന്നു വന്നി­രു­ന്ന­ത്. ഇന്നും പ്രസ­ക്ത­മായ ഒട്ടേറെ കാര്യ­ങ്ങള്‍ ഈ ചട്ട­ങ്ങ­ളില്‍ ഉണ്ട്. 1980 ല്‍ രൂപീ­കൃ­ത­മായ ‘മുള്ള കമ്മി­ഷന്‍’ ആ­ണ് സമ­ഗ്ര­മായ പഠനം നട­ത്തിയ മറ്റൊരു സമി­തി. ജയില്‍ നവീ­ക­ര­ണ­ത്തിന് ഉത­കുന്ന ഒട്ടേറെ ഫല­പ്ര­ദ­മായ നിര്‍ദ്ദേ­ശ­ങ്ങള്‍ ഏക­ദേശം 500 പേജു­കളുള്ള ബൃഹ­ത്തായ ഈ പഠന റിപ്പോര്‍ട്ടി­ലു­ണ്ട്. കുറ്റ­കൃ­ത്യ­ത്തിന് ആധാ­ര­മായ സാഹ­ചര്യം എങ്ങ­നെ­യു­ണ്ടായി?, കു­റ്റ­കൃത്യം എങ്ങനെ തട­യാം?, കുറ്റ­കൃത്യം ചെയ്ത­വരെ മാ­തൃകാ പൗര­ന്മാ­രായി മാറ്റി­യെ­ടു­ക്കേ­ണ്ടത് എങ്ങനെ?, വിചാ­ര­ണ­ത്ത­ട­വു­കാ­രുടെ സൂക്ഷിപ്പ് തുട­ങ്ങിയ കാര്യ­ങ്ങ­ളി­ലെല്ലാം ഇത്തരം കമ്മി­ഷ­നു­ക­ളുടെ ആ­ധി­കാ­രി­ക­മായ ശുപാര്‍ശ­കളെ ഗൗര­വ­ത­ര­മായി ഉള്‍ക്കൊ­ണ്ടു­കൊ­ണ്ടാണ് സമ­ഗ്ര­മായ ഒരു നി­യമം കേരളം ഇപ്പോള്‍ ആവി­ഷ്‌ക്ക­രിച്ച് നിയ­മ­സഭ അംഗീ­ക­രി­ച്ചി­ട്ടു­ള്ള­ത്. പുതിയ നിയ­മ­ത്തി­ന്റെ പേരു­തന്നെ അത് പി­ന്തു­ട­രുന്ന വീക്ഷ­ണത്തെ പ്രതി­ഫ­ലി­പ്പി­ക്കു­ന്നു. ജയില്‍ നിയ­മം, തട­വു­കാര്‍ക്കുള്ള നിയമം എന്നിങ്ങ­നെ­യുള്ള പേരു­ക­ള്‍ക്ക് പക­ര­മായി പ്രിസ­ണു­കളും സംശു­ദ്ധീ­ക­രണ സാ­ന്മാ­ര്‍­ഗീ­ക­രണ സേവന നട­ത്തിപ്പ് നി­യമം എന്നാണ് പുതിയ നി­യമം അറി­യ­പ്പെ­ടു­ന്ന­ത്. തട­വു­കാരെ സംശു­ദ്ധീ­ക­രി­ക്കു­കയും സാന്മാര്‍ഗീ­ക­രി­ക്കു­കയും ചെ­യ്യുക എന്നത് ജയില്‍ സ്ഥാപ­ന­ങ്ങ­ളു­ടെയും ഉദ്യോ­ഗ­സ്ഥ­രു­ടേയും പ്രാഥ­മിക ധര്‍മ്മ­മായി പരി­ഗ­ണി­ക്ക­പ്പെ­ട്ടി­രി­ക്കുന്ന നി­യമം തികച്ചും കാലി­കവും ദീ­ര്‍­ഘ­വീ­ക്ഷ­ണ­ത്തോടെ രൂപ­പ്പെ­ടു­ത്തി­യി­ട്ടു­ള്ള­തു­മാ­ണ്.
1991-93 കാല­ഘ­ട്ട­ത്തില്‍ കേര­ള­ത്തിലെ ജയി­ലു­കളെ സംബ­ന്ധിച്ച് പഠനം നട­ത്തിയ എ പി ഉദ­യ­ഭാ­നു­വിന്റെ നേതൃ­ത്വ­ത്തി­ലുള്ള കമ്മിറ്റി തട­വു­കാര്‍ക്ക് മനു­ഷ്യന്‍ എന്ന നില­യി­ലുള്ള അന്തസ്സ് പാലിച്ചു കൊണ്ട് ജീ­വി­ക്കു­ന്ന­തി­നുള്ള സാഹ­ചര്യം ഉറ­പ്പാ­ക്ക­ണ­മെന്ന് നിര്‍ദ്ദേ­ശി­ക്കു­ക­യു­ണ്ടാ­യി. ഈ നിര്‍ദ്ദേ­ശവും ജസ്റ്റിസ് വി ആര്‍ കൃ­ഷ്ണ­യ്യര്‍ കമ്മി­റ്റി­യുടെ നിര്‍ദ്ദേ­ശ­ങ്ങളും പുതിയ നിയമ നിര്‍­മാണ ഘട്ട­ത്തില്‍ സര്‍­ക്കാര്‍ പരി­ഗ­ണി­ച്ചു. ത­ട­വു­കാരും മനു­ഷ്യ­രാ­ണെ­ന്നും അവര്‍ക്കും ചില അവ­കാ­ശ­ങ്ങ­ളു­ണ്ടെന്നും നിയ­മ­ത്തി­ന്റെ 35-ാം വകുപ്പ് പ്രഖ്യാ­പി­ക്കു­ന്നത് ഈ പശ്ചാ­ത്ത­ല­ത്തി­ലാ­ണ്. തട­വു­കാ­രുടെ അവ­കാ­ശ­ങ്ങള്‍ എന്ന­തി­നൊപ്പം അവ­രുടെ കട­മ­കളും പുതിയ നി­യമം വിശ­ദീ­ക­രി­ക്കു­ന്നു­ണ്ട്. അ­ത്രയും തന്നെ പ്രാധാന്യം ജീവ­നക്കാ­രുടെ അ­വ­കാ­ശ­ങ്ങ­ള്‍­ക്കും കട­മ­കള്‍ക്കു­മു­ണ്ടെ­ന്ന­തി­നാല്‍ നില­വിലെ നിയ­മ­ത്തി­ന്റെ ഈ വിഷ­യ­ത്തി­ലുള്ള ദൗ­ര്‍ബല്യം പരി­ഹ­രി­ക്കാന്‍ പു­തി­യ നിയ­മ­ത്തിന് സാധിക്കും. ശി­ക്ഷാ കാലാ­വധി പൂര്‍ത്തി­യാ­ക്കിയോ നിയ­മ­പ്ര­കാ­ര­മുള്ള ഇള­വു­കള്‍ക്ക് വിധേ­യ­മായോ പുറ­ത്തു­വ­രുന്ന തട­വു­കാര്‍ നാം ലക്ഷ്യം വെയ്ക്കു­ന്ന­തു­പോ­ലെ ഉത്തമ പൗര­ന്മാ­രാ­യി­ത്തീ­രു­ന്ന­തിന് സഹാ­യി­ക്കാ­നായി അവര്‍ക്ക് തൊഴി­ല­ധി­ഷ്­ഠിത ജോലി­ക­ളില്‍ പരി­ശീ­ലനം നല്‍കു­ന്ന­തിന് നിയമം അനു­ശാ­സി­ക്കു­ന്നു. തട­വു­കാ­രുടെ പരി­ശീ­ല­ന­ത്തി­നായി 34 വ്യ­ത്യ­സ്ത ട്രേഡു­ക­ളാണ് നിയ­മ­ത്തി­ല്‍ ഉള്‍ക്കൊ­ള്ളി­ച്ചി­രി­ക്കു­ന്ന­ത്.
തട­വു­കാര്‍ക്ക് ക്ഷേമ­നിധി എ­ന്ന ആശയം പുതിയ നിയ­മം വ­ഴി യാഥാര്‍ഥ്യ­മാ­ക്കു­ക­യാ­ണ്. കുടും­ബ­ത്തിന്റെ നെ­ടും­­തൂ­ണായ ഗൃഹ­നാ­ഥന്‍ കുറ്റ­വാ­ളി­യായി ജയി­ലി­ലെ­ത്തു­ന്ന­തോടെ ശിക്ഷ കുടുംബം മുഴു­വന്‍ അനു­ഭ­വി­ക്കേ­ണ്ടുന്ന സാ­ഹ­ച­ര്യം­ ഉ­രു­ത്തി­രി­യു­ന്നു. സമൂ­ഹ­ത്തിന്റെ മുന്നി­ലുള്ള അപ­കര്‍ഷ­ത­കള്‍ക്ക­തീ­ത­മായി ഉ­ണ്ടാ­കുന്ന സാമ്പ­ത്തിക പ്രതി­സ­ന്ധി­കള്‍ കുടും­ബ­ത്തി­നു­ള്ളി­ല്‍ കുറ്റ­കൃ­ത്യ­ങ്ങ­ളെയും കുറ്റ­വാ­ളി­ക­ളെയും വീണ്ടും സൃ­ഷ്ടി­ക്കാ­നി­ട­യാ­ക്ക­രു­തെന്ന ഉന്ന­താ­ദര്‍ശ­മാണ് തട­വു­കാ­രു­ടെ വെല്‍ഫെ­യര്‍ ഫണ്ടിന്റെ രൂ­പ­വല്‍ക്ക­രണം നിയ­മ­ബ­ദ്ധ­മാ­ക്കാ­ന്‍ സര്‍ക്കാ­രിനെ പ്രേരി­പ്പി­ച്ച­ത്.
തട­വു­കാ­രുടെ ആരോ­ഗ്യവും ജയി­ലി­നു­ള്ളിലെ ശുചി­ത്വവും വ്യക്തി­പ­ര­മായ ശുചി­ത്വ­പ­രി­പാ­ല­നവും ജയില്‍ ആശു­പത്രി ഭര­ണവും നിയ­മ­ത്തിന്റെ പരി­ധി­യില്‍ പുനര്‍­നി­ശ്ച­യി­ച്ചി­ട്ടു­ണ്ട്. ജയി­ലി­നു­ള്ളിലെ സ്‌കൂള്‍, നഴ്‌സ­റി, ക്രഷ്, ജയില്‍ ലൈ­ബ്ര­റി, മത­-­ധാര്‍മ്മിക ഉപ­ദേ­ശ­ക­രുടെ സേവ­നം, പ്രിസ­ണേ­ഴ്‌സ് വെല്‍ഫെ­യര്‍ ഫണ്ട്, പുന­ര­ധി­വാസം എന്നി­വ­യ­ട­ങ്ങുന്ന തടവു­കാ­രുടെ ക്ഷേമം എന്ന തര­ത്തില്‍ പ്രത്യേക നിബ­ന്ധ­ന­കള്‍ ഈ നിയമം സാധി­ത­പ്രാ­യ­മാ­ക്കു­ന്നു. പഴയ നിയ­മ­ത്തില്‍ വ്യക്ത­മാ­ക്കാ­തിരുന്ന ഈ ഭാഗ­ത്തിന് വിപു­ല­മായ ഊന്ന­ലാണ് പുതിയ നിയമം നല്‍കു­ന്ന­ത്.
തട­വു­കാ­രുടെ ശിക്ഷ­യി­ള­വ്, ശിക്ഷാ­കാലം പൂര്‍ത്തി­യാ­ക്കു­ന്ന­തിന് മുമ്പുള്ള വിടു­തല്‍ എ­ന്നിവ മാന­സിക പരി­വര്‍ത്ത­ന­ത്തി­നുള്ള മാര്‍ഗ­മായി പല വിദ­ഗ്ധരും ചൂണ്ടി­ക്കാ­ണി­ച്ചി­ട്ടു­ണ്ട്. 10 വര്‍ഷം വരെ ശിക്ഷാ കാലാ­വ­ധി പൂര്‍ത്തി­യാ­ക്കി­യ­വരെ സൂ­ക്ഷ്മ­മായ പരി­ശോ­ധ­നയ്ക്കും വില­യി­രു­ത്ത­ലിനും ശേഷം  സര്‍ക്കാര്‍ വിട്ട­യ­യ്ക്കു­ക­യു­ണ്ടാ­യി. ദീര്‍ഘ­കാല തട­വു­കാ­രുടെ പരോള്‍ സംബ­ന്ധി­ച്ച നിബ­ന്ധ­ന­കളെ ഈ നിയ­മം വ്യവ­സ്ഥാ­പി­ത­മാ­ക്കു­ന്നു.
ജയി­ലു­കള്‍ക്കു­ള്ളിലെ പ­രാതി പരി­ഹാര കമ്മി­റ്റി­ക­ളുടെ രൂ­പീ­ക­രണം സുപ്ര­ധാ­ന­മായ ഒ­രു ചുവ­ടു­വെ­യ്പ്പാ­ണ്. ജയി­ലു­കള്‍ക്കു­ള്ളില്‍ ന്യായ­മായ പ­രാ­തി­കള്‍ ജനാ­ധി­പ­ത്യ­പ­ര­മാ­യി അ­വ­ത­രി­പ്പി­ക്കു­ന്ന­തിന് ഈ ക­മ്മി­റ്റി­കള്‍ അവ­സരം നല്‍­കും. ജയി­ലു­ക­ളില്‍ സൗക­ര്യ­ങ്ങ­ളേ­ര്‍പ്പെ­ടു­ത്തു­മ്പോള്‍ തന്നെ അച്ച­ടക്കം ഉറ­പ്പാ­ക്കു­ന്ന­തില്‍ നി­യമം വിട്ടു­വീഴ്ച ചെയ്യു­ന്നി­ല്ല.
പുതിയ നിയമം കൊണ്ടു വ­രു­ന്ന­തിന് മുമ്പു­തന്നെ ജയി­ലു­ക­ളുടെ നവീ­ക­ര­ണ­ത്തിന് സര്‍­ക്കാര്‍ ഒട്ടേറെ നട­പ­ടി­കള്‍ സ്വീ­ക­രി­ക്കു­ക­യു­ണ്ടാ­യി. തട­വു­കാ­രുടെ വേതന പരി­ഷ്‌ക്ക­ര­ണം, ജയില്‍ ഉപ­ദേ­ശക സമി­തി­ക­ളുടെ പുനഃ­സം­ഘാ­ട­നം, തൊ­ഴി­ല്‍ പരി­ശീ­ല­നം, ജയി­ലില്‍ ഉന്നത വിദ്യാ­ഭ്യാസ സൗകര്യം ഏര്‍പ്പെ­ടു­ത്തല്‍ എന്നിവ എ­ടു­ത്തു പറ­യേ­ണ്ട­തു­ണ്ട്. സെ­ന്‍­ട്രല്‍ ജയി­ലു­ക­ളിലെ തട­വു­കാ­ര്‍­ക്ക് എഫ് എം റേഡിയോ ഉപ­യോ­ഗി­ക്കു­ന്ന­തി­നുള്ള അനു­വാദം നല്‍കി. സെന്‍ട്രല്‍ ജയി­ലു­ക­ളിലും നെട്ടു­കാല്‍ത്തേരി തുറന്ന ജയി­ലിലും തട­വു­കാ­ര്‍ക്ക് ഉപ­യോ­ഗി­ക്കാന്‍ കോയി­ന്‍ ബോക്‌സ് ടെല­ഫോണ്‍ സൗ­കര്യം ഏര്‍­പ്പെ­ടു­ത്തി. പ­രോ­ള്‍ നിയ­മ­ങ്ങള്‍ ഉദാ­ര­മാ­ക്കി. 
ജയി­ലു­ക­ളിലെ തട­വു­കാ­രുടെ ബാഹുല്യം ഇന്ത്യ­യൊ­ട്ടാകെ നില­നില്‍ക്കുന്ന ഒരു വലിയ പ്രശ്‌ന­മാ­ണ്. രണ്ട­ര­ല­ക്ഷം തട­വു­കാരെ പാര്‍പ്പി­ക്കാ­ന്‍ സൗക­ര്യ­മുള്ള ഇന്ത്യന്‍ ജ­യി­ലു­ക­ളില്‍ 38 ശത­മാനം അ­ധിക തട­വു­കാര്‍ താമ­സി­ക്കു­ന്നു. കേര­ള­ത്തിലെ സ്ഥിതിയും വ്യത്യ­സ്ത­മാ­യി­രു­ന്നി­ല്ല. സം­സ്ഥാ­നത്തെ 41 ജയി­ലു­ക­ളില്‍ 4 വര്‍ഷം മുമ്പ് പി ഡബ്ല്യൂ ഡി നട­ത്തിയ ഒരു പഠ­ന­ത്തില്‍ ഇ­വിടെ 3665 തടവു­കാരെ പാര്‍പ്പി­ക്കു­വാ­നുള്ള സൗക­ര്യ­മാ­ണു­ള­ള­ത്. എന്നാല്‍ തട­വു­കാ­­രുടെ എണ്ണം ആറാ­യിരം കവി­യും. ത­ട­വു­കാ­രില്‍ അധി­കവും വി­ചാ­രണ തട­വു­കാ­രാ­ണ്. വിചാ­രണ നീണ്ടു പോകു­ന്നതു മൂ­ലം തട­വു­കാ­രുടെ എണ്ണ­ത്തില്‍ കുറവു വരു­ത്താന്‍ സാധി­ക്കു­ന്നി­ല്ല. ഈ പ്രശ്‌ന­ത്തി­നൊരു പരി­ഹാരം എന്ന നില­യ്ക്കാണ് ജയി­ലു­ക­ളില്‍ വീഡിയോ കോ­ണ്‍ഫ­റന്‍സിംഗ് സൗകര്യം കൊ­ണ്ടു­വ­രു­ന്ന­തിന് നിയമ ഭേ­ദ­ഗതി വരു­ത്തി­യ­ത്. വീഡിയോ കോണ്‍ഫ­റന്‍സിം­ഗിന് ആവ­ശ്യ­മായ ഉപക­ര­ണ­ങ്ങളും സ്ഥാ­പിച്ചു കഴി­ഞ്ഞു. സര്‍ക്കാര്‍ 8 പുതിയ ജയി­ലു­ക­ളാണ് തുറ­ന്ന­ത്. ചീമേ­നി തു­റന്ന ജയില്‍, കണ്ണൂര്‍ വനിതാ ജയില്‍, ഹോ­സ്ദുര്‍ഗ്, ചിറ്റൂര്‍, വിയ്യൂര്‍, മാന­ന്ത­വാടി സബ് ജയി­ലു­കള്‍ ക­ണ്ണൂര്‍, കോഴി­ക്കോ­ട് സ്‌പെ­ഷ്യ­ല്‍ സബ് ജയി­ലു­കള്‍ എന്നിവ ആരം­ഭി­ച്ചു. 4 ജയി­ലു­ക­ളുടെ പണി പൂര്‍ത്തീ­ക­രിച്ചു വരു­ന്നു. 
ഇപ്പോള്‍ പാസാ­ക്കിയ പുതി­യ നിയമം നിയ­മ­സ­ഭ­യില്‍ അവ­ത­രി­പ്പി­ച്ച­തി­നെ­ത്തു­ടര്‍ന്ന് നടന്ന ചര്‍ച്ച­കള്‍ തന്നെ ഈ നിയ­മ­ത്തിന്റെ അനി­വാ­ര്യ­തയെ പ്രതി­ഫ­ലി­പ്പി­ക്കു­ന്ന­താ­ണ്. രാഷ്ട്രീ­യ­മായ കാര­ണ­ങ്ങ­ളാല്‍ പര­സ്പര വിരു­ദ്ധ നില­പാ­ടെ­ടു­ക്കുന്ന നിയ­മ­സ­ഭാം­ഗ­ങ്ങള്‍ പോലും നിയ­മത്തെ പൊതു­വില്‍ സ്വാഗതം ചെയ്യു­കയും ഫല­പ്ര­ദ­മാ­ണെന്ന് തോന്നുന്ന ഭേദ­ഗതി നിര്‍ദ്ദേ­ശ­ങ്ങള്‍ സമര്‍­പ്പി­ക്കു­ക­യു­മാ­യി­രു­ന്നു. ഉള്‍­ക്കൊ­ള്ളാ­വുന്ന എല്ലാ നിര്‍­ദ്ദേ­ശ­ങ്ങളും സ്വീക­രി­ക്കു­ന്ന­തില്‍ സര്‍ക്കാ­രിന് തുറന്ന മന­സ്സാണ് ഉണ്ടാ­യി­രു­ന്ന­ത്.

Posted in ലേഖനം | Tagged: | Leave a Comment »

കോണ്‍ഗ്രസും സംഘടനാ തിരഞ്ഞെടുപ്പും ചില തമാശകളും

Posted by ജനയുഗം വാര്‍ത്തകള്‍ on ഏപ്രില്‍ 6, 2010

കോണ്‍ഗ്രസും സംഘടനാ തിരഞ്ഞെടുപ്പും ചില തമാശകളും

കോണ്‍ഗ്ര­സിന്റെ ചരി­ത്ര­മെ­ഴു­തിയ എ ഐ സി സി അധ്യ­ക്ഷന്‍ ആരെന്ന് ഇപ്പോ­ഴത്തെ എ ഐ സി സി അധ്യ­ക്ഷ­യാ­യ സോണി­യാ­ഗാ­ന്ധി­യോട് ചോ­ദി­ച്ചാല്‍ അവര്‍ മാനത്തെ അ­മ്പിളി അമ്മാ­വനെ നോക്കി­നി­ല്‍ക്കും. ചോദ്യം വീണ്ടും ആ­വര്‍ത്തി­ക്കുന്നത് കോണ്‍ഗ്ര­സു­കാ­­ര­നാ­ണെ­ങ്കില്‍ കടുത്ത അ­ച്ച­ടക്ക നട­പടി നേരി­ടേ­ണ്ടി­വ­രും. കോണ്‍ഗ്ര­സില്‍ ആര്‍­ക്കും ഏതു സമ­യവും കിട്ടുന്ന (മു­ര­ളീ­ധ­രനു മാത്രം കിട്ടാ­ത്ത) മെമ്പര്‍ഷിപ്പ് ഞൊടി­യി­ട­യ്ക്കു­ള്ളില്‍ അപ്ര­ത്യ­ക്ഷ­മാ­വും.

എ ഐ സി സി അധ്യ­ക്ഷ­യാ­യ സോണി­യ­യോട് ഈ ചോ­ദ്യ­മുയര്‍ത്തിയാല്‍ ഇതൊ­ക്കെ­യാണ് പകരം ലഭി­ക്കു­ന്ന­തെ­­ങ്കില്‍ രാഹുല്‍ഗാ­ന്ധി­യോ­ടോ രമേശ് ചെന്നി­ത്ത­ല­യോ­ടോ ഉമ്മന്‍ചാ­ണ്ടി­യോടോ മൂ­ക്കും മുമ്പേ പഴു­ത്തു­പോയ യൂ­ത്തു­കാ­ര­നായ ലിജു­വി­നോടോ ചോ­ദി­ച്ചിട്ട് ഫല­മു­ണ്ടാ­വു­ക­യി­ല്ലെന്ന് ഏതു മര­മ­ണ്ടനും അറി­യാം.

എ ഐ സി സി അധ്യ­ക്ഷ­നാ­യി സാക്ഷാല്‍ ഗാന്ധിജി നി­യോ­ഗിച്ച പട്ടാഭി സീതാ­രാ­മ­യ്യ, സുഭാഷ് ചന്ദ്ര­ബോ­സിനു മു­ന്നി­ല്‍ തോറ്റു തുന്നം­പാ­ടി. പ­ക്ഷേ സീതാ­രാ­മയ്യ നിസ്സാ­ര­നാ­യി­രു­ന്നി­ല്ല. കോണ്‍ഗ്ര­സിന്റെ ച­രി­ത്ര­മെ­ഴു­താന്‍ കഴിവും പ്രാ­പ്തി­­യു­മു­ണ്ടാ­യി­രുന്ന പ്രതി­ഭാ­ധ­ന­നാ­ണ്. അദ്ദേ­ഹ­ത്തിന്റെ കോണ്‍ഗ്രസ് ചരിത്രം സ്വാത­ന്ത്ര്യ സമ­ര­ച­രി­ത്ര­ത്തിന്റെ കൂടി ഭാഗ­മാ­യി­രു­ന്നൂ. കോണ്‍ഗ്ര­സു­കാ­രില്‍ ബഹു­ഭൂ­രി­പക്ഷം അ­തു വായി­ച്ചി­ല്ലെ­ന്നതും ഇന്നും വായി­ക്കു­ന്നി­ല്ലെ­ന്നതും പട്ടാഭി സീതാ­രാ­മ­യ്യയ്ക്ക് അഭി­മാ­ന­ത്തി­ന് വക നല്‍കു­ന്നു.

സീതാ­രാ­മയ്യ എന്ന് ആരെ­ങ്കിലും പറ­ഞ്ഞാല്‍ അത് ഏത് അയ്യ എന്ന് ചോദി­ക്കു­ന്ന­വ­രാണ് കോണ്‍ഗ്ര­സിന്റെ മേലറ്റം മുതല്‍ ചുവ­ട­റ്റം­വരെയുള്ള­വര്‍. അവര്‍ക്ക് സീതാ­റാം കേസ­രി­യെ­ക്കു­റിച്ച് വാചാ­ല­മാ­വാന്‍ അറി­യാം. കോണ്‍ഗ്ര­സിനെ കാ­ഴ്ചബംഗ്ലാ­വിലെ അപൂര്‍വ വ­സ്­തു­വാ­ക്കാന്‍ യത്‌നിച്ച സീ­താറാം കേസ­രി­യെ­ക്കു­റിച്ച് അ­റി­യാ­വു­ന്ന­വര്‍ക്ക് ബോസി­നോ­ട് തോറ്റെ­ങ്കിലും പിന്നീട് കോ­ണ്‍ഗ്രസ് അധ്യ­ക്ഷ­നാ­യ, ച­രി­ത്രം എഴു­താന്‍ പ്രാപ്തി­യു­ണ്ടാ­യി­രുന്ന പട്ടാഭി സീതാ­രാ­മ­യ്യ­യെ­ക്കു­റിച്ച് കേട്ടു­കേള്‍വി­പോ­ലു­മി­ല്ല. അതാണ് കോണ്‍­ഗ്ര­­സിന്റെ ഉയര്‍ച്ചയും മുന്നേ­റ്റ­വും ധൈഷ­ണി­ക­മായ വളര്‍ച്ച­യും.

ധൈഷ­ണി­ക­മായ വളര്‍ച്ച ഉത്തും­ഗ­ത­യി­ലെ­ത്തി­യതു­കൊ­ണ്ടാണ് യൂത്ത് കോണ്‍ഗ്ര­സു­കാര്‍ തിര­ഞ്ഞെ­ടു­പ്പു­കള്‍ക്കെ­തി­െര കല­ഹി­ക്കു­ന്ന­ത്. മെഡി­ക്കല്‍-എന്‍ജി­നീ­യ­റിംഗ് പ്രവേ­ശ­ന­ത്തിന് പോലും ടാലന്റ് വേണ്ടെന്ന് നിശ്ച­യി­ച്ച­വ­രാണ് കെ എസ് യു-­യൂത്ത് കോണ്‍­ഗ്രസ് നേതൃത്വ ആരോ­ഹ­ണ­ത്തി­നായി ടാലന്റ് ഹണ്ട് നട­ത്തണം എന്ന് ശഠി­ക്കു­ന്ന­തെന്ന് യൂത്തന്‍മാര്‍ പരി­ഹ­സി­ക്കു­ന്നത് തമാ­ശ­യായി കാണേ­ണ്ട അതിലും തിരി­ച്ച­റി­യ­പ്പെ­ടേണ്ട വലിയ കാര്യ­ങ്ങ­ളു­ണ്ട്.

കേര­ള­ത്തില്‍ ആവു­ന്നത്ര പുകി­ലു­ണ്ടാക്കി നോക്കി. അ­സംബ്ലി സീറ്റ് വേണം, ലോക്‌­സ­ഭാ സീറ്റ് വേണം, കോണ്‍­ഗ്രസ് നേതൃ­സ്ഥാ­നത്ത് കസേ­ര­­കള്‍ വേണം എന്നി­ങ്ങനെ പ്ര­മേ­യ­ങ്ങ­ളി­ലൂ­ടേയും പത്ര സമ്മേ­ള­ന­ങ്ങ­ളി­ലൂ­ടെയും ആവര്‍ത്തി­ച്ചാ­വര്‍ത്തിച്ചു പറ­ഞ്ഞു. ‘ക്യാ ഫലം’ എന്ന് ഹിന്ദി­യില്‍ പരി­ഹ­സിച്ചു ചോദി­ച്ചു­കൊണ്ട് മൂത്ത കോണ്‍ഗ്ര­സു­കാര്‍ പു­ഞ്ചി­രി­ച്ചു.

ആ പുഞ്ചിരി കണ്ട് സഹി­ക്ക­വ­യ്യാ­ത്തതു കൊണ്ടാണ് യൂ­ത്തു­കാര്‍ ഡല്‍ഹിയ്ക്ക് പോയ­ത്. കസേ­ര­വേ­ണം, കസേര വേണം എന്ന് ആവര്‍ത്തി­ച്ചാ­വ­ര്‍ത്തിച്ച് പറ­ഞ്ഞ­പ്പോള്‍ കടും കൈ പ്രയോ­ഗ­മാണ് ഡല്‍ഹി  ആസ്ഥാ­ന­ക്കാര്‍ പ്രഖ്യാ­പി­ച്ച­ത്. യൂത്ത് കോണ്‍ഗ്ര­സില്‍ തിര­ഞ്ഞെ­ടുപ്പ് നട­ത്തും. അടി­യ­ന്ത­ര­മായി അത് നട­പ്പാക്കി തുട­ങ്ങും. കൂടു­തല്‍ കൂടു­തല്‍ ക­സേ­ര വേണ­മെന്ന് പറഞ്ഞു ചെ­ന്ന­പ്പോള്‍ ഉള്ള കസേര പോ­കുന്ന പണി­യാണ് ഡല്‍­ഹി അടു­ക്ക­ള­വാ­സി­കള്‍ പുറ­ത്തെ­ടു­ത്ത­ത്.

ജീവ­നുള്ള കാല­ത്തോളം കസേര വിടി­ല്ലെന്ന് പറ­ഞ്ഞി­രി­ക്കു­ന്ന­വ­രുടെ കൂടാ­ര­മായ കോണ്‍ഗ്ര­സി­ലാ­വട്ടെ തിര­ഞ്ഞെ­ടു­പ്പു­മി­ല്ല, തിര­യാ­നുള്ള ഭാവ­വു­മി­ല്ല. കസേര കൈപ്പി­ടി­യി­ലൊ­തു­ക്കിയ പല­രെയും കണ്ടു­കി­ട്ടാന്‍ പോലു­മി­ല്ല. അവരെ തിര­യാന്‍ പോലും മന­സ് വരാ­ത്ത­വ­രാണ് യൂത്ത­ന്‍മാര്‍ക്കി­ട­യില്‍ തിര­ഞ്ഞെ­ടുപ്പ് നട­ത്താന്‍ പോവു­ന്ന­ത്.

തിര­ഞ്ഞെ­ടുപ്പ് എന്ന് കേള്‍­ക്കു­ന്ന­തു­തന്നെ കോണ്‍ഗ്ര­സു­കാര്‍ക്ക് അലര്‍ജി­യാ­ണ്. സ്വാത­ന്ത്ര്യ­ത്തിന് മുമ്പ് കോണ്‍ഗ്ര­സില്‍ തിര­ഞ്ഞെ­ടുപ്പ് നട­ന്നി­ട്ടു­ണ്ടാ­വാം. ഗാന്ധി­ജിയും നെ­ഹ്‌റു­വും ബോസും സീതാ­രാ­മ­യ്യ­­യു­മൊക്കെ മത്സ­രി­ച്ചി­രി­ക്കാം. അതിനും മുമ്പ് ഗോഖ­ലെയും ബാനര്‍ജി­യു­മൊക്കെ മത്‌സ­രി­ച്ചി­രി­ക്കാം. പക്ഷേ സ്വാത­ന്ത്ര്യ­ല­ബ്ധി­ക്കു­ശേഷം നെഹ്‌റു­വി­നു­ശേഷം ഇന്ദി­ര, ഇന്ദി­രയ­യ്ക്കു­ശേഷം രാജീ­വ്, രാ­ജീ­വിനു ശേഷം സോണിയ എന്ന­താണ് പ്രമാ­ണം. കുടും­ബ­ത്തില്‍ നിന്ന­ല്ലാതെ മറ്റാരും പാടി­ല്ലെ­ന്നത് കോണ്‍ഗ്രസ് ഭര­ണ­ഘ­ട­ന­യിലെ അലി­ഖിത തത്വ­സം­ഹി­ത­യാ­ണ്. ഇതി­നി­ട­യില്‍ കാമ­രാജും ദേവ­രശും നര­സിം­ഹ­റാ­വുവും സീതാറാം കേസ­രി­യു­മൊക്കെയുണ്ടാ­യി­രി­ക്കാം. അതൊക്കെ നാട­ക­ങ്ങ­ള്‍ക്കി­ട­യിലെ കോമ­ഡി­രം­ഗ­ങ്ങ­ളായി കണ­ക്കാ­ക്കി­യാല്‍ മതി. കേര­ള­ത്തിലും കോണ്‍ഗ്ര­സില്‍ തിര­ഞ്ഞെ­ടുപ്പ് എന്നത് അത്യ­പൂര്‍വ­ങ്ങ­ളില്‍ അപൂര്‍വ­മായ സംഭ­വ­മാ­ണ്. 1992 ല്‍ നടന്ന കെ പി സി സി തിര­ഞ്ഞെ­ടുപ്പ് കഴി­ഞ്ഞാല്‍ കഴിഞ്ഞ പത്തൊ­മ്പത് വര്‍ഷ­ത്തി­നി­ട­യില്‍ ഒരു തിര­ഞ്ഞെ­ടുപ്പ് കേര­ള­ത്തിലെ കോണ്‍ഗ്ര­സി­ലു­ണ്ടാ­യി­ട്ടി­ല്ല. അതിനു മുമ്പ് തിര­ഞ്ഞെ­ടുപ്പ് സ­മ­യ­ബ­ന്ധി­ത­മായി നടന്നു എ­ന്ന് ആരും തെറ്റി­ദ്ധ­രി­ക്ക­രു­ത്. നോമി­നേ­ഷ­നു­ക­ളി­ലൂടെ കെ പി സി സി അധ്യ­ക്ഷന്‍­മാ­രെ തിര­ഞ്ഞെ­ടു­ക്കുന്ന കഠിന പ്ര­വൃ­ത്തി­യാണ് കോണ്‍ഗ്ര­സി­ലു­ണ്ടാ­യി­രു­ന്നു­ത്. 1992 ല്‍ ഇരു മെയ്യാ­ണെ­ങ്കിലും ഒരു കര­ളാ­ണേ എന്ന മട്ടില്‍ ജീവിച്ച ആന്റ­ണിയും വയ­ലാര്‍ രവിയും തമ്മില്‍ മത്‌സ­രി­ച്ചു. പാവ­ങ്ങ­ളില്‍ പാവ­മായി നടി­ക്കു­ന്ന­തി­ല്‍ ബിരു­ദാ­ന­ന്തര ബിരുദം നേ­ടിയ ആന്റണി പഠിച്ച പണി പ­തി­നെട്ടും പയ­റ്റി­യിട്ടും തോറ്റ് തു­ന്നം­പാ­ടി.

രവി­യ്ക്കു­ശേഷം തെന്ന­ല, മു­ര­ളീ­ധ­രന്‍, പി പി തങ്ക­ച്ചന്‍, ര­മേ­ശ്‌ചെ­ന്നി­ത്തല എന്നി­വ­രൊ­ക്കെ കെ പി സി സി അധ്യ­ക്ഷ­­രാ­യി. പക്ഷേ തിര­ഞ്ഞെ­ടു­പ്പ് എന്നൊന്ന് അവര്‍ ആ സമ­യ­ങ്ങ­ളില്‍ സ്വപ്ന­ത്തില്‍ പോ­ലും കേട്ടി­ല്ല, കണ്ടി­ട്ടി­ല്ല, അറി­ഞ്ഞി­ല്ല.

യൂത്തര്‍മാര്‍ നെഗ­ളി­ക്കു­മ്പോള്‍ തിര­ഞ്ഞെ­ടുപ്പ് നട­ത്തുമെന്ന് പേടി­പ്പി­ക്കു­ക­യാണ് മൂ­ത്ത­വര്‍. യൂത്തന്‍മാര്‍ക്ക് ആ­കെ­യൊ­രാ­ശ്രയം ചെറു­പ്പ­ക്കാ­രില്‍ ചെറു­പ്പ­ക്കാ­ര­നായി ഇ­പ്പോഴും കോണ്‍ഗ്ര­സില്‍ നില­കൊ­ള്ളുന്ന മുല്ലപ്പള്ളി രാമ­ച­ന്ദ്ര­ന്‍ മാത്ര­മാ­ണ്. യൂത്തില്‍ തിര­ഞ്ഞെ­ടുപ്പ് നട­ത്തുക­യാ­ണെ­ങ്കില്‍ മൂത്ത­തിലും തിര­ഞ്ഞെ­ടുപ്പ് വേണ­മെന്ന് മുല്ല­പ്പള്ളി ശഠി­ക്കു­ന്ന­തു­വഴി യൂത്തു­കാര്‍ക്കു­ണ്ടാ­വുന്ന ഉള്‍പ്പു­ളകം വിവ­ര­ണാ­തീ­ത­മാ­ണ്. നോമി­നേ­ഷ­നി­ലൂടെ കെ പി സി സി എ­ക്‌സി­ക്യൂ­ട്ടീ­വിലും ഉപാ­ധ്യ­ക്ഷ പദ­വി­യി­ലു­മൊക്കെ വന്ന മുല്ല­പ്പള്ളി കേന്ദ്ര­മ­ന്ത്രി­യാ­യതു കൊ­ണ്ട് മുന്‍പിന്‍ നോക്കാതെ ഇപ്പോള്‍ അഭി­പ്രായ പ്രക­ടനം നട­ത്താം. പക്ഷേ ചെന്നി­ത്ത­ല­യ്­ക്കും വാഴ­യ്ക്കനും തറ­യി­ലും മറ്റ് ആദി­യായ സ്ഥല­നാ­മ­കാ­രി­കള്‍ക്കൊന്നും മുല്ല­പ്പ­ള്ളി­യുടെ അഭി­പ്രായം മധു­രി­ച്ചി­റ­ക്കാ­നാ­വി­ല്ല. കാരണം അവ­ര്‍ക്ക് കേന്ദ്ര­മന്ത്രി പദ­വി­യൊ­ന്നു­മി­ല്ല.

യൂത്ത് കോണ്‍ഗ്ര­സു­കാര്‍ ബുദ്ധി­യി­ല്ലാ­ത്ത­വ­രാ­ണെന്ന് ആരു­മാരും പറ­യി­ല്ല. കേര­ള­ത്തിലെ കോണ്‍ഗ്ര­സു­കാര്‍ക്ക് ഒരു പദവി മാത്രം നിര്‍ബ­ന്ധ­മാ­ക്ക­ണ­മെന്ന യൂത്തു­കാ­രുടെ ഡിമാന്റില്‍ ബുദ്ധി തുളു­മ്പി­നില്‍ക്കു­ന്നു­ണ്ട്. ‘കേര­ള­ത്തി­ലെ’ എന്ന് അവര്‍ പ്രത്യേകം പ­റ­­ഞ്ഞി­ട്ടു­ണ്ട്. ഡല്‍ഹി­യില്‍ സോണി­യയ്ക്ക് മൂന്നു പദവി കൈവ­ശ­മി­രി­ക്കു­ന്നു­വെന്ന് കേര­ള­ത്തിലെ യൂത്ത് കോണ്‍ഗ്ര­സു­കാര്‍ക്ക­റി­യാം. ബുദ്ധി­യി­ല്ലാ­തെ­യല്ലാ യൂത്ത് കോണ്‍ഗ്ര­സു­കാ­രുടെ കളി. മുല്ല­പ്പ­ള്ളി­യുടെ കളിയും ബുദ്ധി­പൂര്‍വം തന്നെ. അവ­രുടെ കളി­ക­ളെ­യാകെ തകി­ടം­മ­റി­ക്കു­വാന്‍ രംഗ­പ്ര­വേശം ചെയ്തി­രി­ക്കു­ന്ന­വ­രുടെ ക­ളി­കളും ബുദ്ധി­പൂര്‍വം ത­ന്നെ. മൊത്ത­ത്തില്‍ ബുദ്ധി­യു­ടെ അതി­പ്ര­സരം. ചരി­ത്ര­മെ­ഴു­തു­മ്പോള്‍ പട്ടാഭി സീതാ­രാ­മ­യ്യയ്ക്ക് ബുദ്ധി­യുടെ ഈ അതി­പ്ര­സരം മുന്‍കൂ­ട്ടി­കാ­ണാന്‍ കഴി­ഞ്ഞി­ല്ല. പാവം പട്ടാഭി!

Posted in ലേഖനം | Leave a Comment »

മണിപ്പുര്‍ പ്രക്ഷോഭത്തിന് കേരളത്തിന്റെ ഐക്യദാര്‍ഢ്യം – അഡ്വ. പ്രശാന്ത് രാജന്‍

Posted by ജനയുഗം വാര്‍ത്തകള്‍ on ഏപ്രില്‍ 1, 2010

മണിപ്പുര്‍ പ്രക്ഷോഭത്തിന് കേരളത്തിന്റെ ഐക്യദാര്‍ഢ്യം

അഡ്വ. പ്രശാന്ത് രാജന്‍

സ്വാതന്ത്ര്യവും ജനാധിപത്യവും പൗരാവകാശങ്ങളും സംരക്ഷിക്കാന്‍ മണിപ്പുര്‍ ജനത നടത്തിവരുന്ന ഉജ്വലമായ പ്രക്ഷോഭത്തിന് ഏപ്രില്‍ 10ന് പ്രബുദ്ധ കേരളം ഐക്യദാര്‍ഢ്യം പ്രഖ്യാപിക്കും. സംസ്ഥാനത്തെ 14 ജില്ലാകേന്ദ്രങ്ങളില്‍ എ ഐ വൈ എഫ് നേതൃത്വത്തില്‍ സംഘടിപ്പിക്കുന്ന ഐക്യദാര്‍ഢ്യ സമ്മേളനം‘അഫ്‌സപ’എന്ന കിരാത നിയമത്തിനെതിരെയുള്ള പ്രതിഷേധ വേദികളായി മാറും.

1958ല്‍ വടക്കു കിഴക്കന്‍ സംസ്ഥാനങ്ങള്‍ക്കായി രൂപീകരിച്ച  അഫ്‌സപ’1980 മുതലാണ് മണിപ്പുരില്‍ പ്രാബല്യത്തിലാക്കിയത്. അന്നുമുതല്‍ക്ക് മണിപ്പുരി ജനതയ്ക്ക് നഷ്ടമായതാണ് സൈ്വര്യവും സ്വച്ഛന്ദവും സമാധാനപരവുമായ ജീവിതം. ഈ കിരാത നിയമത്തിന്റ മറവില്‍ കൊലചെയ്യപ്പെട്ടവര്‍ എത്രയെന്നതിന് കണക്കുകള്‍ പോലുമില്ല. നിരവധി പേര്‍ അര്‍ധ സൈനിക വിഭാഗങ്ങളുടെ ശാരീരിക അതിക്രമങ്ങള്‍ക്കും ബലാല്‍സംഗത്തിനും വിധേയമായി. നിയമം നല്‍കുന്ന പ്രത്യേക അധികാരങ്ങള്‍ ജനാധിപത്യ വിരുദ്ധവും നഗ്നമായ ഭരണഘടനാ ലംഘനവുമാണ്. നിയമവിരുദ്ധതയുടെ കറുത്ത ദിനങ്ങള്‍ ആരംഭിച്ചതു മുതല്‍ മണിപ്പുര്‍ ജനതയുടെ പ്രക്ഷോഭത്തിന്റെ മുന്‍പന്തിയില്‍ കമ്മ്യൂണിസ്റ്റ് പാര്‍ട്ടിയും എ ഐ വൈ എഫും നിലകൊണ്ടിരുന്നു.
മഹാത്മാഗാന്ധി ലോക ജനതയ്ക്ക് മുന്നില്‍ സമര്‍പ്പിച്ച അക്രമരഹിത സമരമാര്‍ഗമാണ്  സത്യഗ്രഹവും നിരാഹാരവും.’പല സന്ദര്‍ഭങ്ങളിലും ലോകത്തിലെ അധികാര കേന്ദ്രങ്ങളും ഭരണകൂടങ്ങളും ഈ സമരമുറയ്ക്ക് മുമ്പില്‍ കീഴടങ്ങിയിട്ടുണ്ട്. ഇന്ന് ഈ സമര മാര്‍ഗം മഹാത്മജിയുടെ നാട്ടില്‍ പരിഹാസ്യമായ കോമഡി ഷോയാണ്. ആത്മാര്‍ഥത ലവലേശമില്ലാത്ത രാഷ്ട്രീയ അഭ്യാസം. എന്നാല്‍ മണിപ്പുരിലെ ഇറോം ചാനു ഷര്‍മ്മിളയെ ആ പട്ടികയില്‍പ്പെടുത്താനാവില്ല. എന്നിട്ടും പക്ഷേ, വിശ്വസിക്കാന്‍ തന്നെ പ്രയാസകരമായ തരത്തില്‍ ജനാധിപത്യ ഇന്ത്യയില്‍ നടന്നുവരുന്ന ഈ പെണ്‍ പോരാട്ടം എന്തുകൊണ്ട് ജനാധിപത്യ സമൂഹം കാണാതെ പോകുന്നു? ആരാണ് അതിന് ഉത്തരവാദി? സമാധാനത്തിനുള്ള നൊബേല്‍ പുരസ്‌കാര ജേത്രിയായ ഇറാനിലെ മനുഷ്യാവകാശ പ്രവര്‍ത്തക ഷിറിന്‍ ഇബാദി ഇന്ത്യയില്‍ വന്ന് ഇറോം ചാനു ഷര്‍മ്മിളയെ സന്ദര്‍ശിച്ചതിന് ശേഷം മാത്രമാണ് ലോകചരിത്രത്തില്‍ സമാനതകളില്ലാത്ത ഈ സമരം ഇന്ത്യന്‍ പത്രത്താളുകളില്‍ ചെറുതായെങ്കിലും വാര്‍ത്തയായത്.
അവള്‍ മരിച്ചാല്‍ അതിനുത്തരവാദി ഇന്ത്യന്‍ പാര്‍ലമെന്റായിരിക്കും. കോടതിക്കും പട്ടാളത്തിനും അനങ്ങാപ്പാറ നയം പിന്തുടരുന്ന ഭരണാധികാരികള്‍ക്കുമായിരിക്കും അതിന്റെ ഉത്തരവാദിത്വം. കടമ നിറവേറ്റാത്ത നിങ്ങള്‍ പത്രക്കാരും ആ മരണത്തിന് കാരണക്കാരായിരിക്കും. മാധ്യമ പ്രവര്‍ത്തകര്‍ക്ക് മുമ്പില്‍ ഷിറിന്‍ ഇബാദി പൊട്ടിത്തെറിച്ചു. 2006 നവംബര്‍ 26ന് ഡല്‍ഹിയിലെ ഓള്‍ ഇന്ത്യാ ഇന്‍സ്റ്റിറ്റിയൂട്ട് ഓഫ് മെഡിക്കല്‍ സയന്‍സസില്‍ പൊലീസ് കസ്റ്റഡിയില്‍ കഴിഞ്ഞ ഇറോം ചാനുവിനെ സന്ദര്‍ശിച്ചതിന് ശേഷമായിരുന്നു ഇബാദിയുടെ രോഷപ്രകടനം.
വൈദ്യശാസ്ത്രം അതിശയിച്ചു നില്‍ക്കുകയാണ് ഇറോം ചാനു ഷര്‍മിളയുടെ മുന്നില്‍. 2000 നവംബര്‍ നാലിനാണ് ഇറോം നിരാഹാര സമരം ആരംഭിക്കുന്നത്. ഇറോം സമരം ആരംഭിച്ചതു മുതല്‍ ഒരു തുള്ളി വെള്ളം കുടിച്ചിട്ടില്ല. അന്നനാളത്തിലൂടെ ഒരു തുള്ളി വെള്ളം അറിയാതെ ഇറങ്ങിപ്പോയാലോ എന്നു പേടിച്ച് പല്ലു തേയ്ക്കാന്‍ പോലും വെള്ളം ഉപയോഗിക്കുന്നില്ല. ഏറ്റെടുത്തിരിക്കുന്ന മഹത്തായ ലക്ഷ്യം പൂര്‍ത്തികരിക്കാന്‍ സ്വയം അര്‍പ്പിച്ച ഈ സമരത്തിന് ഒരു പോറല്‍ പോലും വീഴാന്‍ ഇച്ഛാശക്തിയും മനക്കരുത്തും അവളെ അനുവദിക്കുന്നില്ല. 2009 നവംബര്‍ നാലിന് ഇറോമിന്റെ സഹന സമരം 10-ാം വര്‍ഷത്തിലേക്ക് കടന്നിരിക്കുകയാണ്. 9 വര്‍ഷക്കാലം ജലപാനമിറക്കാതെ ജീവിച്ചിരിക്കുക എന്നത് തന്നെ ലോകാത്ഭുതമായി കാണേണ്ടതാണ്. അവളുടെ ചിത്രത്തിലേക്ക് സൂക്ഷിച്ച് നോക്കുക. മൂക്കിലൂടെ കടത്തി വിട്ടിരിക്കുന്ന ഒരു ഫെഡ് ട്യൂബ് കാണാം. പൊലീസും ഡോക്ടര്‍മാരും ചേര്‍ന്ന് ബലമായി അവളില്‍ കടത്തിവിട്ടിരിക്കുന്നതാണ് ആ ട്യൂബ്. വിറ്റാമിനുകളും പ്രോട്ടീനുകളും ബലാല്‍ക്കാരത്തിലൂടെയാണെങ്കിലും അകത്ത് ചെല്ലുന്നതായിരിക്കാം അവള്‍ ജീവിച്ചിരിക്കുന്നതിന്റെ കാരണം.
ജീവിതം മരണത്തിന് അര്‍പ്പിച്ചുകൊണ്ടുള്ള രാഷ്ട്രീയ പോരാട്ടമാണിത്. സമാനതകളില്ലാത്ത ഈ സഹന സമര പോരാട്ടത്തോട് മുഖം തിരിച്ചു നില്‍ക്കുന്നത് ലോകത്തിലെ ഏറ്റവും വലിയ ജനാധിപത്യ രാജ്യമെന്ന് വിശേഷിപ്പിക്കുന്ന ഇന്ത്യയിലാണെന്ന് രാഷ്ട്രീയ വിദ്യാര്‍ഥികളെങ്കിലും തിരിച്ചറിയേണ്ടതുണ്ട്.
എന്താണ് അഫ്‌സപാ? (ആംഡ് ഫോഴ്‌സസ് സ്‌പെഷല്‍ പവേഴ്‌സ് ആക്ട്-1958)
1958ല്‍ വടക്കു കിഴക്കന്‍ സംസ്ഥാനങ്ങള്‍ക്ക് വേണ്ടി ഇന്ത്യന്‍ പാര്‍ലമെന്റ് പാസാക്കിയ നിയമമാണ് അഫ്‌സപ. ഭീകര പ്രവര്‍ത്തനങ്ങളെ നേരിടുക എന്ന ഉദ്ദേശ്യത്താല്‍ ജനങ്ങളെ സംരക്ഷിക്കുന്നതിന് വേണ്ടിയുണ്ടാക്കിയ ഈ നിയമം 1980 മുതലാണ് മണിപ്പുരില്‍ നടപ്പിലാക്കാന്‍ തുടങ്ങിയത്. 1980ല്‍ മണിപ്പുരില്‍ നിരോധിക്കപ്പെട്ട സംഘടനകളുടെ എണ്ണം നാലു മാത്രമായിരുന്നു. അഫ്‌സപ നിലവില്‍ വന്നതിന് ശേഷം സര്‍ക്കാര്‍ കണക്ക് പ്രകാരം നിരോധിക്കപ്പെട്ട സംഘടനകളുടെ എണ്ണം ഇന്ന് 40 ആണ്. 100ല്‍ അധികം ഭീകര സംഘടനകള്‍ മണിപ്പുരില്‍ പ്രവര്‍ത്തിക്കുന്നതായാണ് അനൗദ്യോഗിക റിപ്പോര്‍ട്ടുകള്‍. നിയമം രാജ്യത്തിന് ഗുണമോ ദോഷമോ എന്ന് പരിശോധിക്കേണ്ട സമയം തന്നെ അതിക്രമിച്ചിരിക്കുകയാണ്.
അഫ്‌സപ സെക്ഷന്‍ 4-അനുസരിച്ച് കമ്മിഷണര്‍ റാങ്കിലുള്ള ഏതൊരു ഉദ്യോഗസ്ഥനും ഒരു പ്രദേശത്തെ കലാപ ബാധിത പ്രദേശമായി പ്രഖ്യാപിക്കാനുള്ള അധികാരമുണ്ട്. പ്രഖ്യാപിക്കപ്പെടുന്ന മേഖലയില്‍ നിനച്ചിരിക്കാതെ ജനാധിപത്യവും സ്വാതന്ത്ര്യവും അപ്രത്യക്ഷമാകും പൗരാവകാശങ്ങള്‍ നിഷേധിക്കപ്പെടും. പിന്നെ നിയമപാലകര്‍ക്ക്  എന്തും ചെയ്യാം. സംശയം തോന്നുന്ന ആരെയും അറസ്റ്റ് ചെയ്യാം, വെടിവച്ച് കൊല്ലാം. ഏത് സ്ഥാപനവും വീടും രാത്രിയെന്നോ പകലെന്നോ ഇല്ലാതെ പരിശോധിക്കാം. ആണ്‍-പെണ്‍ വ്യത്യാസമില്ലാതെ ആരെയും അറസ്റ്റ് ചെയ്യാം, തടങ്കലില്‍ വയ്ക്കാം. അറസ്റ്റ് ചെയ്യപ്പെട്ട ആളുടെ യാതൊരു വിവരവും ബന്ധുക്കളെയോ വേണ്ടപ്പെട്ടവരെയോ അറിയിക്കേണ്ടതില്ല. അവര്‍ക്കു മേല്‍ ദേദ്യമുറകള്‍ പ്രയോഗിക്കാം. നിയമത്തിന്റെ മറവില്‍ സൈനികരും ഉദ്യോഗസ്ഥരും കിരാതമായ അക്രമമാണ് ജനങ്ങള്‍ക്കു മേല്‍ അഴിച്ചുവിടുന്നത്. മണിപ്പുരിലെ സാധാരണ സ്ത്രീകള്‍ സേനാ ഉദ്യോഗസ്ഥരുടെ ഇംഗിതങ്ങള്‍ക്ക് വഴങ്ങിയില്ലെങ്കില്‍ അവളെയും കുടുംബാംഗങ്ങളെയും ഏതെങ്കിലും നിരോധിത സംഘടനയിലെ അംഗമാണെന്ന് മുദ്രകുത്തി പീഡിപ്പിക്കുകയോ എതിര്‍ത്താല്‍ കൊന്നുതള്ളുകയോ ചെയ്യും. സൈന്യവുമായുള്ള ഏറ്റുമുട്ടലില്‍ മരിച്ചവരുടെ സംഖ്യ ഔദ്യോഗികമായി വെളിപ്പെടുത്തിയിരിക്കുന്നത് ഇരുപതിനായിരമാണെങ്കില്‍ അരലക്ഷത്തിലേറെ പേര്‍ കൊലചെയ്യപ്പെട്ടിട്ടുണ്ടെന്നാണ് സാമൂഹ്യ സന്നദ്ധ സംഘടനകള്‍ റിപ്പോര്‍ട്ട് ചെയ്യുന്നത്. അഫ്‌സപയ്‌ക്കെതിരെ തീക്ഷ്ണമായ അനവധി സമരങ്ങള്‍ മണിപ്പുരില്‍ നടന്നിട്ടുണ്ട്. 2001ല്‍ പ്രക്ഷോഭകാരികള്‍ ഇംഫാല്‍ നഗരത്തിന് തന്നെ തീയിട്ടു. നിയമസഭാ മന്ദിരം ആക്രമിക്കുകയും സ്പീക്കറെ ബന്ദിയാക്കുകയും ചെയ്തു. ജനാധിപത്യപരവും ജനാധിപത്യ വിരുദ്ധവുമായ നിരവധി പ്രക്ഷോഭങ്ങള്‍ക്കും കലാപങ്ങള്‍ക്കും മണിപ്പുര്‍ സാക്ഷ്യം വഹിച്ചു.
ക്രൂരതയുടെ ഉദാഹരണങ്ങള്‍
2004 ജൂൈലയിലാണ് നിരോധിക്കപ്പെട്ട പീപ്പിള്‍സ് ലിബറേഷന്‍ ആര്‍മിയില്‍ അംഗമാണെന്ന് അരോപിച്ച് 32കാരിയായ സാമൂഹ്യപ്രവര്‍ത്തക തഞ്ചം മനോരമയെ അസം റൈഫിള്‍സ് അറസ്റ്റ് ചെയ്തത.് പിന്നീട് ആര്‍ക്കും യാതൊരു വിവരവും ലഭ്യമായില്ല. നാലാം ദിവസം വൈകുന്നേരം ഇംഫാലിന്റെ പ്രാന്ത പ്രദേശത്ത് ചേതനയറ്റ അവരുടെ മൃതദേഹം കണ്ടെത്തുകയായിരുന്നു. മനോരമ അതിക്രൂരമായി ബലാല്‍സംഗത്തിന് ഇരയായിരുന്നു.
2006 ജൂലൈ 23നാണ് മണിപ്പുരിനെ  ഞെട്ടിച്ച മറ്റൊരു സംഭവത്തിന് ഇംഫാല്‍ മാര്‍ക്കറ്റ് സാക്ഷ്യം വഹിച്ചത്. മാര്‍ക്കറ്റിലെ ടെലിഫോണ്‍ ബൂത്തില്‍ നില്‍ക്കുകയായിരുന്ന സഞ്ജിത് എന്ന ചെറുപ്പക്കാരന്‍. വളരെ പെട്ടെന്നാണ് പാരാമിലിട്ടറിയുടെ വാഹനം വന്ന് കടയ്ക്ക് മുമ്പില്‍ നിര്‍ത്തിയത്. നിമിഷങ്ങള്‍ക്കകം സഞ്ജിത്തിനെയും കൂട്ടികൊണ്ട് പുറത്തേയ്ക്ക്. പിന്നെ ജനങ്ങള്‍ കണ്ടത് വെടിയേറ്റ് മരിച്ച സഞ്ജിത്തിനെ പട്ടാള വാഹനത്തിലേക്ക് എടുത്ത് എറിയുന്നതായിരുന്നു.
2000 നവംബര്‍ 1. പട്ടാപ്പകല്‍ ബസ് സ്റ്റോപ്പില്‍ നിന്ന ഗ്രാമീണരായ പത്ത് യാത്രക്കാരെ പാരാമിലിട്ടറി ഫോഴ്‌സിന്റെ കീഴിലുള്ള അസം റൈഫിള്‍സ് സേനാംഗങ്ങള്‍ വെടിവച്ചുകൊന്നു. പിറ്റേന്നത്തെ ലോക്കല്‍ പത്രങ്ങളില്‍ ഭീതിജനകമായ ചിത്രങ്ങള്‍ സഹിതം വാര്‍ത്തകള്‍ വന്നു. ദേശീയ പത്രങ്ങള്‍ക്ക് ഇത് വാര്‍ത്തയായിരുന്നില്ല. ഈ സംഭവം പിന്നീട് മാലോം കൂട്ടക്കൊല എന്നറിയപ്പെട്ടു. കലാപകാരികള്‍ എന്ന് മുദ്രകുത്തിയാണ് ഇവര്‍ക്ക് നേരെ സേന വെടിയുതിര്‍ത്തത്. വെടിയേറ്റുമരിച്ചവരില്‍ 18 വയസ്സുകാരനും 62 വയസ്സ് പ്രായമായ സ്ത്രീയും ഉണ്ടായിരുന്നു. 1998 ലെ ധീരതയ്ക്കുള്ള കുട്ടികളുടെ അവാര്‍ഡ് ജേതാവായിരുന്ന സിനാം ചന്ദ്രമണി ആയിരുന്നു കൊലചെയ്യപ്പെട്ട 18കാരന്‍.
ഇറോം നിരാഹാരം ആരംഭിക്കുന്നു
1972 മാര്‍ച്ച് 14 നാണ് ഇറോമിന്റെ ജനനം. ഇറോം നന്ദസിംഗിന്റെയും ഇറോം ഒങ്ബി സഖിദേവിയുടെയും 9 മക്കളില്‍ മൂത്തപുത്രി. കുട്ടിക്കാലം മുതലേ കവിതയും എഴുത്തും വായനയുമായിരുന്നു ഇറോമിന്റെ കളിക്കൂട്ടുകാര്‍. ഹൈസ്‌കൂള്‍ വിദ്യാഭ്യാസത്തിന് ശേഷം പത്രപ്രവര്‍ത്തനത്തില്‍ താല്‍പര്യം പുലര്‍ത്തി. മനുഷ്യാവകാശ പ്രവര്‍ത്തനങ്ങളിലും പങ്കുകൊണ്ടു. 2000 നവംബറില്‍ മനുഷ്യാവകാശ സംഘടന പ്ലാന്‍ ചെയ്ത സമാധാന റാലിയില്‍ പങ്കെടുക്കാന്‍ ഇംഫാലില്‍ എത്തിയതാണ് ഇറോമിനെ സഹനസമരത്തിന് തുടക്കം കുറിക്കാന്‍ ഇടയാക്കിയത്. മാലോം കൂട്ടക്കൊലയുടെ ദാരുണമായ രംഗങ്ങള്‍ കണ്ടാണ് ഇറോം അതിനെതിരെ പ്രത്യക്ഷ സമരത്തിനിറങ്ങിയത്. അവിടെ വച്ച് ഇറോം പ്രതിജ്ഞ ചെയ്തു. ‘ഈ കിരാത നിയമം അവസാനിക്കുംവരെ ഞാന്‍ പോരാടും. മണിപ്പുരിലെ ജനതയ്ക്കുവേണ്ടി ഞാന്‍ ഈ  ദൗത്യം ഏറ്റെടുക്കുകയാണ്.’ 28-ാം വയസ്സില്‍ 2000 നവംബര്‍ രണ്ടി ന്‘അഫ്‌സപാ എന്ന കരിനിയമത്തിനെതിരെ മഹാത്മാഗാന്ധിയുടെ സഹന സമരത്തെ അതിന്റെ പത്തിരട്ടി കാഠിന്യത്താല്‍ അവള്‍ ഏറ്റെടുത്തു.
സമരം മൂന്നു ദിവസം പിന്നിട്ടപ്പോള്‍ പൊലീസ് ഇറോമിനെ അറസ്റ്റ് ചെയ്തു. ഇന്ത്യന്‍ ശിക്ഷാ നിയമം 309 വകുപ്പ് അനുസരിച്ച് ആത്മഹത്യാ കുറ്റം ചുമത്തി കേസെടുത്തു. ഇറോം കസ്റ്റഡിയിലും നിരാഹാരം തുടര്‍ന്നു. 309-ാം വകുപ്പുനുസരിച്ച് പരമാവധി ഒരു വര്‍ഷം വരെ മാത്രമേ തടവില്‍ പാര്‍പ്പിക്കാന്‍ നിയമമുള്ളൂ. ഒരു വര്‍ഷം കഴിയുമ്പോള്‍ പുറത്തുവിടും. വീണ്ടും അറസ്റ്റ്. ഇത് തുടര്‍ന്നു പോന്നു. 2006 ഒക്‌ടോബര്‍ രണ്ടിന് ജയില്‍ മോചിതയായ ഇറോം പൊലീസിന്റെ കണ്ണുവെട്ടിച്ച് സഹ പ്രവര്‍ത്തകരുടെ സഹായത്താല്‍ ഡല്‍ഹിയില്‍ വിമാനമിറങ്ങി. കേന്ദ്ര സര്‍ക്കാരിന്റെ കണ്ണു തുറപ്പിക്കാന്‍ രാജ്ഘട്ടില്‍ പ്രമാണമര്‍പ്പിച്ച് ജന്തര്‍മന്ദിറില്‍ സമരം ആരംഭിച്ചു.
ഡല്‍ഹിയിലായാല്‍ ഇറോമിന്റെ സമരം പുറംലോകം അറിയും എന്നു മനസ്സിലാക്കിയ സര്‍ക്കാര്‍ ആരും അറിയാതെ 4-ാം ദിവസം പാതിരാത്രിയില്‍ ഇറോമിനെ അറസ്റ്റ് ചെയ്ത് ഓള്‍ ഇന്ത്യാ ഇന്‍സ്റ്റിറ്റിയൂട്ട് ഓഫ് മെഡിക്കല്‍ സയന്‍സസില്‍”ജൂഡിഷ്യല്‍ കസ്റ്റഡിയില്‍ പാര്‍പ്പിച്ചു. അവിടെ വച്ചാണ് ഇറാനിലെ മനുഷ്യാവകാശ പ്രവര്‍ത്തക ഷിറിന്‍ ഇബാദി ഇറോമിനെ സന്ദര്‍ശിക്കുന്നത്.
എ ഐ വൈ എഫും
മണിപ്പുര്‍ പ്രക്ഷോഭവും
ഇന്ത്യയിലെ പ്രധാന എ ഐ വൈ എഫ് ഘടകങ്ങളില്‍ ഒന്നാണ് മണിപ്പുരിലേത്. ദേശീയ സ്വാതന്ത്ര്യ സമര പോരാളികളുടെയും സാമ്രാജ്യത്വ വിരുദ്ധ സമര നായകരുടെയും പിന്‍തലമുറക്കാരാണ് മണിപ്പുരിലെ കമ്മ്യൂണിസ്റ്റ് പാര്‍ട്ടി അംഗങ്ങളും എ ഐ വൈ എഫ് പ്രവര്‍ത്തകരും.‘അഫ്‌സപ’എന്ന കിരാത നിയമത്തിനെതിരെ രക്തരൂക്ഷിതമായ നിരവധി പ്രക്ഷോഭങ്ങള്‍ക്ക് എ ഐ വൈ എഫും കമ്മ്യൂണിസ്റ്റ് പാര്‍ട്ടിയും നേതൃത്വം നല്‍കിയിട്ടുണ്ട്. ആര്‍മിയും അസം റൈഫിള്‍സും നിരവധി എ ഐ വൈ എഫ് പ്രവര്‍ത്തകരെ സൈന്യത്തെ ആക്രമിച്ചുവെന്നാരോപിച്ച് ‘അഫ്‌സപ’നിയമത്തിന്റെ മറവില്‍ വെടിവച്ച് കൊലപ്പെടുത്തിയിട്ടുണ്ട്. എ ഐ വൈ എഫിന്റെയും കമ്മ്യൂണിസ്റ്റ് പാര്‍ട്ടിയുടെയും ഇടപെടലിലൂടെ 2008 ആഗസ്റ്റ് 13ന് ഒക്രം ഇബോബിസിംഗ് ഗവണ്‍മെന്റിനെകൊണ്ട് കേന്ദ്ര സര്‍ക്കാരില്‍ സമ്മര്‍ദം ചെലുത്തി ഗ്രേറ്റര്‍ ഇംഫാല്‍ ഏരിയായിലെ 7 അസംബ്ലി മണ്ഡലങ്ങളില്‍‘അഫ്‌സപ’നിയമം പിന്‍വലിപ്പിച്ചിരുന്നു.
2008ല്‍ മണിപ്പുരില്‍ അധികാരത്തിലിരുന്ന സെക്യുലര്‍ പ്രോഗ്രസീവ് ഫ്രണ്ട് സര്‍ക്കാര്‍ സി പി ഐക്ക് കൂടി പങ്കാളിത്തമുള്ള ഗവണ്‍മെന്റായിരുന്നു. മണിപ്പുരിലെ ആകെയുള്ള രണ്ട് ലോക്‌സഭാ സീറ്റുകളില്‍ ഒന്നില്‍ സി പി ഐ എം പിയുമായിരുന്നു.
മണിപ്പുര്‍ നിയമസഭയില്‍ സി പി ഐയുടെ അഞ്ച് അംഗങ്ങളുടെ പിന്തുണയിലാണ് ഒക്രം ഇബോബി സിംഗ് ഗവണ്‍മെന്റ് അധികാരത്തിലിരുന്നത്. ഈയവസരത്തില്‍ സമ്മര്‍ദതന്ത്രം കൂടി ഉപയോഗിച്ചാണ് ഏഴ് അസംബ്ലി മണ്ഡലങ്ങളുടെ പരിധിയില്‍ നിന്നും സി പി ഐ‘അഫ്‌സപ പിന്‍വലിപ്പിച്ചത്.
മണിപ്പുര്‍ ജനതയുടെ പ്രക്ഷോഭത്തിന് പിന്തുണ നല്‍കാനും ഇന്ത്യയിലെ ജനകോടികളുടെ മനസ്സിലേക്ക് സമരത്തെ ശ്രദ്ധിപ്പിക്കാനുമുള്ള ചരിത്ര ദൗത്യം എ ഐ വൈ എഫ് ഏറ്റെടുത്തിരിക്കുകയാണ്. കിരാത നിയമം പിന്‍വലിക്കണമെന്നാവശ്യപ്പെട്ടുകൊണ്ട് സമരത്തിന്റെ ആദ്യപടിയായി വിവിധ സംസ്ഥാനങ്ങളില്‍ നിന്നായി 20 ലക്ഷം കത്തുകള്‍ രാഷ്ട്രപതിക്ക് അയച്ചുകൊടുക്കും. ഏപ്രില്‍ 10ന് ഇതിന്റെ ഭാഗമായാണ് കേരളത്തില്‍ എ ഐ വൈ എഫിന്റെ നേതൃത്വത്തില്‍ മണിപ്പുര്‍ ഐക്യദാര്‍ഢ്യ സമ്മേളനങ്ങള്‍ സംഘടിപ്പിച്ചിരിക്കുന്നത്. പ്രബുദ്ധ കേരളത്തിന്റെ സാമൂഹ്യ-സാംസ്‌കാരിക-രാഷ്ട്രീയ മനസ്സുകളെ  ഒന്നടങ്കം ഈ പരിപാടിയുമായി ബന്ധിപ്പിക്കാനുള്ള പരിശ്രമത്തിലാണ് എ ഐ വൈ എഫ് അന്നേ ദിവസം ഒരു ലക്ഷം കത്തുകള്‍ കേരളത്തില്‍ നിന്നും രാഷ്ട്രപതിക്ക് അയച്ചുകൊടുക്കും.

Posted in ലേഖനം | Tagged: , | Leave a Comment »

മലനിരകളിലെ അഗ്നി – പി വത്സല

Posted by ജനയുഗം വാര്‍ത്തകള്‍ on ഏപ്രില്‍ 1, 2010

മലനിരകളിലെ അഗ്നി

പി വത്സല

എവിടെ തീ പിടിച്ചാലും അതിലൊരു അനിയന്ത്രിതാവസ്ഥ ഒളിഞ്ഞിരിപ്പുണ്ട്. അത് ആദികാലം മുതല്‍ക്ക് മനുഷ്യനെ ആശങ്കാകുലനും അന്ധവിശ്വാസിയുമാക്കി. തീയെ ഹോമകുണ്ഡത്തിലാവാഹിച്ച് അനുഷ്ഠാന ക്രിയകള്‍ നടത്തുന്നത് ലോകമെമ്പാടുമുണ്ടായിരുന്ന ആദി സമൂഹങ്ങളുടെ സമ്പ്രദായമായിരുന്നു. പരിഷ്‌കൃത രൂപത്തില്‍, വിളക്കുകളും ഊര്‍ജ്ജ ഉറവിടങ്ങളും ഉണ്ടായപ്പോള്‍ വ്യത്യാസം വന്നു എന്നുമാത്രം.
പക്ഷേ, തിരുനെല്ലിയിലെ ഒറ്റപ്പെട്ട വനഭാഗത്ത്, വനത്തില്‍ പെടാതെ നില്‍ക്കുന്നൊരു വയലോരത്ത് വീടിന്നു തീപിടിക്കാന്‍ ഒരു സാധ്യതയുമില്ല എന്നു വിചാരിച്ചു. ഓരോ രാത്രിയും പാചകം കഴിയുമ്പോള്‍ ശേഷിച്ച വിറക് വെറുതെ കുത്തിക്കെടുത്തുകയല്ല, അവയെ പാത്രത്തിലെ വെള്ളത്തില്‍ മുക്കിക്കൊല്ലുകയും ചെയ്തുപോന്നു, ഞാന്‍. പാവാടപ്രായത്തില്‍ ഒരു തീയനുഭവമുണ്ടായി തുണി കരിഞ്ഞത് ഇന്നും മനസ്സിലുണ്ട്.
അങ്ങനെ-പാതിരാവില്‍ എന്തോ ഒരപശബ്ദം കേട്ടു ഞെട്ടിയുണര്‍ന്നപ്പോള്‍, താഴെ അരിവയ്പുകാരന്‍ (ഞങ്ങളുടെയല്ല, അന്തര്‍ജ്ജനം വീടുകാവലിന്നേല്‍പ്പിച്ചുപോയ വേലക്കാരന്‍) ഗോപാലന്റെ നിലവിളി. മുറിയില്‍ എല്ലാവരും ഉറങ്ങിക്കിടക്കുന്നു. ഞാന്‍ എണീറ്റു മാളിക വരാന്തയിലെത്തി. പുറത്ത് പകല്‍പോലെ വെളിച്ചം. മഞ്ഞവെളിച്ചം. പ്രഭാതത്തിന്റെ അടുത്തെങ്ങും എത്തിയിട്ടില്ല.
അപ്പോള്‍ പ്രധാന കെട്ടിടത്തിന്റെ പുറകിലെ വാഴത്തോപ്പിനെ വെളിച്ചം വാരിവിഴുങ്ങാന്‍ ശ്രമിക്കുന്നു. അതിന്നടുത്തെങ്ങും ചെല്ലാതെ നമ്മുടെ ഗോപാലന്‍ കെട്ടിടത്തിന്റെ മുന്‍വരാന്തയിലുള്ള അവന്റെ കിടപ്പുമുറിയില്‍ നിന്നും പുറത്തുവന്നു. വരാന്തയിലൂടെ തെക്കു വടക്ക് മണ്ടി നടക്കുന്നു. തലയില്‍ കൈ വച്ചാണ് ഓട്ടം. തൊട്ടു പുറകിലെ കെട്ടിടത്തിന്റെ, ഏറ്റവും പുറകിലെ വൈക്കോല്‍ പുതച്ച ഞാലിക്കാണ് തീപ്പറ്റിയതെന്നു അവന്‍ അറിഞ്ഞു തന്നെയില്ല. ഞാന്‍ തിരിച്ച് കിടപ്പുമുറിയിലേക്കോടി. അപ്പോള്‍ ഭര്‍ത്താവ് കുഞ്ഞിനെപ്പുണര്‍ന്ന് എണീറ്റു. സഹോദരിയും സഹോദരനും എണീറ്റു. വരാന്തയില്‍ വന്നു ഒരു വിഹഗവീക്ഷണം നടത്തി. തീ പടരുകതന്നെയാണ്. വൈക്കോല്‍ മേഞ്ഞും, പുത്തന്‍ തടിയില്‍ പൂര്‍ണമായും തീര്‍ത്തും നിലകൊള്ളുന്ന മാളിക ഏതു നിമിഷവും അഗ്നിയുടെ വായിലെത്താം.
എന്റെ അനിയന്‍ രവി (അന്നു മെഡിക്കല്‍ വിദ്യാര്‍ഥി) കിടന്ന മെത്ത, വളരെ പ്രയാസപ്പെട്ടു ചുരുട്ടിയെടുത്തു വരാന്തയിലെ കിളിവാതിലിന്റെ അഴിയില്ലാക്കള്ളിയിലൂടെ നടുമുറ്റത്തേക്കെറിഞ്ഞു. പുറകെ അവന്‍ മെത്തയുടെ നേര്‍ നടുക്ക് ഒരഭ്യാസിയുടെ മികവോടെ ചാടി വീണു. ശേഷിച്ചവര്‍, അനിയത്തി, ഞാന്‍, കുടുംബം കയര്‍ക്കോണി തേടി. ഭാഗ്യത്തിന് അത് ഒരു ഉറച്ച കൈവള്ളിപോലെ പടിഞ്ഞാറെ മുറ്റത്തേക്ക് ഞാന്നു കിടപ്പുണ്ട്. തീത്തിളക്കം അതിന്മേല്‍ ബീഷണമായിരിക്കുന്നു.
കോണിയുടെ കയറില്‍ പിടിച്ച് വീഴാതെ, താഴെയെത്തി. അപ്പോഴും ഗോപാലന്‍ അലറുകതന്നെയാണ്. തീ പടരുന്നത് അവന്‍ കാണുന്നില്ല. ഭാഗ്യത്തിനു പടിഞ്ഞാറെ കുന്നില്‍ ചെരിവില്‍ നിന്നു കാര്യസ്ഥന്‍ രാമന്‍ നായരും, വയലിന്നക്കരെ നിന്നു അപരിചിതരായ നാട്ടുകാരും ഓടിക്കൂടി. കൈമിടുക്കോടെ ഞാലിയുടെ കെട്ടുകള്‍ അരിഞ്ഞു വീഴ്ത്തി. തീ, പ്രധാന കെട്ടിടത്തെ തൊട്ടതേയില്ല. ഞാലിയിലെ വിറകടുപ്പും, കാലികള്‍ക്കുള്ള കഞ്ഞിവയ്ക്കുന്ന ചെമ്പുപാത്രവുമെല്ലാം തീ പറ്റി കോലം കെട്ടി അവശേഷിച്ചു. പിറ്റേന്നു കരുവാളിച്ച വാഴത്തോപ്പ് കുറ്റബോധത്തോടെ മുഖം കുനിച്ചു നിന്നു.
നേരം പുലരും വരെ, ഞങ്ങള്‍ നടുമുറ്റത്തു വിരിച്ച മെത്തകളില്‍ ഇരുന്നും കിടന്നും കഴിച്ചുകൂട്ടി. രാമന്‍നായരുടെ മുഖത്തു നിഴലിച്ച ആശ്വാസത്തിന്നു അന്തമില്ല.
ഭഗവാന്‍ രക്ഷിച്ചു. തിരുനെല്ലിപ്പെരുമാളിന്റെ കാരുണ്യത്തിനു അളവുണ്ടോ! അയാള്‍ ഉരുവിട്ടു.
കുട്ടിക്ക് ഒന്നും പറ്റീട്ട്ല്ല്യല്ലൊ! അയാള്‍ അവളുടെ ഉറങ്ങിയ മുഖത്തു സൂക്ഷിച്ചു നോക്കി. എങ്ങനെ തീപ്പറ്റി എന്നതിന് ഒരു തുമ്പും കിട്ടുന്നില്ല. ഗോപാലന്റെ വയ്പും തീനും  പകല്‍ നേരത്തുതന്നെ കഴിയും? പിന്നെ എവിടെ ഒളിച്ചിരുന്നു തീ? നടുപ്പാതിരയ്ക്കു വാ പിളര്‍ത്താന്‍.
ഉറവിടം രാമന്‍നായര്‍ തന്നെ കണ്ടെത്തി.
രാത്രി തീ പടര്‍ന്നു പിടിക്കുമെന്നു ഭയന്നു, ഗോപാലന്‍ തണുക്കാത്ത അടുപ്പിലെ കനലുകള്‍ പൂണ്ടു കിടക്കുന്ന ചാരം, അപ്പാടെ കോരിയെടുത്തു ഞാലിയിലെ ഉമിക്കൂമ്പാരത്തില്‍ ചൊരിഞ്ഞതാണ്. ഉച്ച തിരിഞ്ഞു നീറിത്തുടങ്ങിയ അഗ്നി ഉമിയെ ദഹിപ്പിച്ചു കഴിഞ്ഞു, കൂടുതല്‍ തീറ്റ തേടി കൈ നീട്ടി. ഗോപാലന്ന് തന്റെ ഉത്തരവാദിത്ത ബോധം അതിരു കവിഞ്ഞതാണ് ആപത്തുണ്ടാക്കിയത്. രാമന്‍ നായര്‍ സംഭവത്തിന്റെ കാരണം ആ പാതിരാനേരത്തുതന്നെ ചികഞ്ഞെടുത്തു.
അന്നു രാത്രി ഗോപാലനും ഉറങ്ങീട്ടുണ്ടാവില്ല.
വെളിച്ചമോടിയപ്പോള്‍ അവന്‍ തന്റെ ഭാണ്ഡവുമായി എന്നേക്കുമായി സ്ഥലം വിട്ടു. പാലക്കാട്ടെ ഏതോ ഒരു കുഗ്രാമത്തിലേക്ക്. അന്തര്‍ജ്ജനം വന്നു ചേര്‍ന്നാല്‍ ഉണ്ടാകാവുന്ന അനുഭവങ്ങള്‍ അവനെ കൂടുതല്‍ ഭയപ്പെടുത്തിയിരിക്കണം.
അങ്ങനെ അതിഥി മന്ദിരത്തില്‍ ഞങ്ങള്‍ തീര്‍ത്തും ഒറ്റപ്പെട്ടു. ഇനിയിപ്പോ നങ്ങേമ അന്തര്‍ജ്ജനത്തിന്റെ അറപ്പുരയ്ക്ക് ഞങ്ങള്‍ കാവല്‍ നില്‍ക്കേണ്ടിവരും. ആവട്ടെ!
അതുകൊണ്ട് പ്രശ്‌നം തീരുന്നില്ല. പകല്‍ നേരത്തും തുടര്‍ന്നുള്ള ദിവസങ്ങളിലും നാട്ടുകാരും വീട്ടുകാരും ക്ഷേമമന്വേഷിച്ചു വരവായി. കോഴിക്കോട്ടു നിന്നു വന്നു പാര്‍ക്കുന്ന അതിഥികളുടെ അന്തല്യായ്മയുടെ ആഴം അളന്നുകൊണ്ടാണ് അവര്‍ വന്നത്. നഗരത്തിലെ വീട്ടമ്മയ്ക്ക് വിറകടുപ്പും പുല്‍പ്പുരയും കൈകാര്യം ചെയ്യാനുള്ള വിവരല്ല്യായ്മ്മയെ കുറിച്ചു അവര്‍ വേണ്ടുവോളം ചിന്തിച്ചു.
എങ്ങനെ പറ്റി തീയ് എന്നായിരുന്നു ആദ്യ ചോദ്യം. ഗോപാലന്റെ ചരിതം പറയാന്‍ എനിക്കു മനസ്സുണ്ടായിരുന്നില്ല. ഇരമുട്ടി, ആ പാവം പയ്യനു നാടുവിടേണ്ടിവന്നതിനെപ്പറ്റിയാണ് ഞാന്‍ ആലോചിച്ചു കൊണ്ടിരുന്നത്. ഒരു പാടുപേര്‍ ദൂരസ്ഥലത്തുനിന്നുപോലും നടന്നെത്തി. വാര്‍ത്ത ശരിക്കും തീപ്പോലെതന്നെ പടര്‍ന്നിരിക്കുന്നു. അതിനേക്കാള്‍ വേഗതയില്‍.
ഒരാള്‍ മാത്രം വന്നില്ലല്ലൊ, എന്നായി ഭര്‍ത്താവ്.
ആ ആള്‍ നീട്ടറയിലെ ഞങ്ങളുടെ അദൃശ്യനായ ആതിഥേയനാണ്. അദ്ദേഹം ഊരുചുറ്റല്‍ കഴിഞ്ഞു സ്ഥലത്തെത്തിയതറിയാം. അങ്ങനെ, തീയും പുകയും വല്ലാതെ കെട്ടടങ്ങിത്തണുത്തപ്പോള്‍, ഒരുച്ചനേരത്ത് മധുരമായ ഒരു പുഞ്ചിരിയും ചുണ്ടില്‍ മുറുക്കാന്‍ ചോപ്പുമായി ‘മാഷ്’ വന്നു ചേര്‍ന്നു.
കുഞ്ഞുമാഷ്!
ഞാനദ്ദേഹത്തെ, കളപ്പുര ഹാളില്‍ സ്വാഗതം ചെയ്തു. കോഴിക്കോട്ടു നിന്നു കൊണ്ടുപോയ ഒരു കപ്പ് ചായ തയ്യാറാക്കി സല്‍ക്കരിച്ചു. കോഴിക്കോടന്‍ വറുത്തകായ് ഒരു ഇലക്കീറ്റില്‍ വിളമ്പി. രുചിയോടെ ചായ കുടിച്ചും, കായ്‌വറുത്തത് കൊറിച്ചും അയാള്‍ കുശലാന്വേഷണത്തിന്റെ വാതില്‍പ്പൊളി തുറന്നെങ്കിലും മറഞ്ഞുനിന്നു.
അവസാനം എന്റെ ഭര്‍ത്താവ് ചോദിച്ചു.
”വിവരം അറിഞ്ഞു, ഇല്ലെ?”
”അറിഞ്ഞില്ലെങ്കിലും തെറ്റായാണ് ധരിച്ചത്. നിങ്ങളുടെ കൈപ്പിഴയാലാണ് വീട് കത്തിയത് എന്നു നിനച്ചു. അദ്ദേഹം ചിരിച്ചില്ല.
”അതു മനസ്സിലായി”.
”എങ്ങനെ?” കുഞ്ഞുമാഷ്.
”നിങ്ങള്‍ വരാന്‍ വൈകിയാല്‍ ഊഹിച്ചുകൂടെ!”
പിന്നെ കുറേ നേരം നാട്ടുവര്‍ത്തമാനത്തില്‍ മുഴുകി. ഇദ്ദേഹം തിരുനെല്ലി ഗ്രാമത്തിലെ ആദ്യത്തെ മാഷാണ്. പഠിപ്പുള്ള യുവാവ്. അതില്‍ അഭിമാനി. ഒരു സാധാരണ അധ്യാപകനല്ല. മനസ്സിനും ചിന്തയ്ക്കും ആഴമുള്ള ദേഹം. ധാരാളം വായിച്ചിട്ടുണ്ട്. അതേക്കാളുപരി, നാടുചുറ്റി സഞ്ചരിച്ചിട്ടുണ്ട്. നാഗരികതയ്ക്കും ശുദ്ധഗ്രാമീണതയ്ക്കും ഇടയിലൊരു പാലമായി ഇദ്ദേഹം ഇന്നും നിലകൊള്ളുന്നു.
വീട്ടിനു തീപ്പിടിച്ച ഒരൊറ്റ അനുഭവം ഞങ്ങളുടെ മനസ്സില്‍ പുക നിറയ്ക്കാന്‍ വേണ്ടത്ര മതിയായിരുന്നു. മനം മടുപ്പോടെ, നാടും കാടും അനുഭവിക്കുകയെന്ന ദൗത്യം ഉപേക്ഷിക്കാനതുമതി. പക്ഷേ രണ്ടുമാസത്തെ കഠിനമായ ഒരുക്കത്തിന്നുശേഷമാണല്ലോ പുറപ്പാട്. മുന്നൊരുക്കങ്ങള്‍ മുഴുവനും ഒരൊറ്റയാള്‍പ്പോരാട്ടമായിരുന്നു, എനിക്ക്. പിഴവില്ലാതെ, സൂചി മുതല്‍, അത്യാവശ്യം ഔഷധങ്ങള്‍ വരെ കൊണ്ടുപോരേണ്ടിയിരുന്നു. ഒറ്റക്കടയും ഇല്ലാത്ത ഒരു വനഗ്രാമം. ഇന്നും ഒരു സൈക്കിളോ, ഓട്ടോ റിക്ഷയോ ഓടാത്ത ഗ്രാമവഴികള്‍. യാത്രകള്‍ മുന്‍മാസങ്ങള്‍ എന്റെ മനസ്സില്‍ ദൃഢ നിശ്ചയത്തിന്റെ രേഖകള്‍ കൊത്തിയിരുന്നത് ഞാന്‍ പുറകെപ്പുറകെയാണ് അറിഞ്ഞത്.
ഇന്നും സഞ്ചാരസ്വാതന്ത്ര്യമില്ലാത്ത സ്ത്രീയുടെ അന്നത്തെ അവസ്ഥ നിങ്ങള്‍ക്ക് ഊഹിക്കാന്‍ കഴിയും. ഗൃഹകാര്യങ്ങള്‍ക്കല്ലാതെ ഒരു സ്ത്രീ അവധിക്കാലത്ത് സഞ്ചരിക്കുന്നതെന്തിന് എന്ന ചോദ്യം. തീര്‍ഥാടനത്തിനെങ്കില്‍ ശരി. ഇവിടെ ഒരു ശരികേടുണ്ട് എന്ന തോന്നലുകള്‍ പലയിടത്തും ഉണ്ടായിരുന്നു. അഞ്ചുമാസം മാത്രമായ കുഞ്ഞ്, കാനനവാസം, ഗതാഗതമില്ലായ്മ, ‘വിപരീത’ കാലാവസ്ഥ.
എന്റെ മനസ്സിന്റെ ആദ്യത്തെ സ്വതന്ത്ര സഞ്ചാര പഥങ്ങളാണ്, ഈ യാത്രയിലൂടെ തുറന്നു കിട്ടിയത് എന്ന് ഞാന്‍ വിചാരിക്കുന്നു. അത് എളുപ്പമല്ല എന്നും അനുഭവജ്ഞാനം ഒരെഴുത്തുകാരിക്കും വേണം എന്നു സമൂഹം (നമ്മുടെ) എന്നെങ്കിലും ചിന്തിച്ചിട്ടുണ്ടാവും എന്നും എനിക്കുതോന്നുന്നില്ല. വേണമെങ്കില്‍ കാല്‍ച്ചോട്ടില്‍ കുഴിച്ചോളൂ. മനസ്സിന്റെ കതക് തുറക്കരുത്!

Posted in ലേഖനം | Tagged: | Leave a Comment »